بوكستان الەم چەمپيوناتى بولماۋى دا مۇمكىن — باق

اقش-تاعى بوكس ساراپشىلارى ناۋرىز جانە مامىر ايلارىندا وتەتىن ايەلدەر جانە ەرلەر اراسىنداعى الەم چەمپيوناتتارىنا بويكوت جاريالاعان مەملەكەتتەردىڭ قاتارى كوبەيەتىن بولسا، جارىستىڭ بولماۋى مۇمكىن ەكەنىن ايتتى.

قازىر توعىز ەلدىڭ بوكس فەدەراتسيالارى الەم چەمپيوناتتارىنا بويكوت جاريالاپ ۇلگەردى. ولاردىڭ اراسىندا اقش، چەحيا، انگليا، كانادا، يرلانديا بوكس فەدەراتسيالارى بار. ودان كەيىن قاتارعا شۆەتسيا، پولشا، شۆەيتساريا مەن نيدەرلاند قوسىلدى.

بۇل ءتىزىمدى قۇراما شتاتتاردىڭ بوكس فەدەراتسياسى باستاپ تۇر. بوكستان اقش قۇراماسى حالىقارالىق وليمپيالىق كوميتەتكە ايەلدەر جانە ەرلەر اراسىنداعى الەم چەمپيوناتتارىنا قاتىسپايتىنىن ءبىرىنشى بولىپ حابارلاما جىبەردى.

الدىن الا ايتا كەتەيىك، ايەلدەر چەمپيوناتى ءۇندىستاننىڭ استاناسى – نيۋ-دەليدە 15-31 ناۋرىز ارالىعىندا جالاۋ كوتەرەتىن بولسا،  1-14 مامىر كۇندەرى وزبەكستاننىڭ تاشكەنت قالاسىندا ەرلەر باسەكەسىندە شارشى الاڭنىڭ ارقانى كەرىلەدى.

امەريكالىقتار 9 اقپان كۇنى حالىقارالىق بوكس اسسوتسياتسياسىنىڭ (IBA) الەم چەمپيوناتتارىنا رەسەي جانە بەلارۋس قۇرامالارىنىڭ جىبەرۋ جونىندە شەشىم قابىلداۋىنا نارازىلىق رەتىندە بويكوت جاريالادى.

بويكوت تۋرالى اقپار اقش بوكس فەدەراتسياسىنىڭ (USA Boxing) سايتىندا ۇيىمنىڭ اتقارۋشى ديرەكتورى مايكل ماكەتيدىڭ اتىنان جارىق كوردى. حابارلامادا رەسەي جانە بەلارۋس ەلدەرىنىڭ بوكسشىلارىنىڭ الەم چەمپيوناتتارىنا قاتىسۋلارى حالىقارالىق وليمپيالىق كوميتەتتىڭ (حوك) بيىلعى 2 اقپان كۇنى قابىلدانعان سانكتسياسىن بۇزعاندىعى ايتالادى. ال سانكتسيا بويىنشا حالىقارالىق جارىستاردا رەسەي فەدەراتسياسى مەن بەلارۋستىڭ جالاۋلارى مەن ءانۇراندارىن پايدالانۋعا تىيىم سالىنعان.

اقش بوكس فەدەراتسياسى بويكوت تۋرالى حابارلاماسىندا بۇل ۇلتتىق كوماندالاردىڭ الەم چەمپيوناتتارىنا قاتىسۋلارىنا رۇقسات بەرە المايتىندارىنىڭ تۇتاس ءتىزىمىن جاساپ ۇسىنعان. ولاردىڭ ءبارى رەسەيلىك ۋمار كرەملەۆ پرەزيدەنتى سانالاتىن حالىقارالىق بوكس اسسوتسياتسياسىنىڭ اتىنا ارنالعان.

امەريكالىق بوكس فەدەراتسياسى بىلتىر جاستار اراسىنداعى الەم چەمپيوناتىندا IBA-نىڭ رەفەريلەر (رينگتەگى اربيتر) مەن تورەشىلەردى ىرىكتەۋ پروتسەسىنە ەشقانداي باقىلاۋ جاساماعانىن اتاپ ءوتتى. وندا ءاربىر قۇرلىقتان جەتى رەفەريلەر مەن تورەشىلەر الىنۋى ءتيىس بولاتىن. بىراق قورىتىندىدا ەۋروپادان كوپتەگەن رەسمي ادامدار تەپە-تەڭدىك ساقتالماي الىندى دا، اقش-تان بىردە-ءبىر مامان شاقىرىلعان جوق.

حابارلامادا سونداي-اق 2021 جىلى IBA پرەزيدەنتى ۋمار كرەملەۆتىڭ دەلەگاتسياسى مۇشەلەرىنە اقش-قا كەلۋگە رۇقسات بەرىلگەنىمەن، ونىڭ وزىنە مۇنداي قۇرمەت كورسەتۋدەن باس تارتىلعانى ايتىلادى.

USA Boxing اتقارۋشى ديرەكتورى كرەملەۆتىڭ ءوز وتانداسى، رەسەيلىك ابدۋماتاليم اباكاروۆتى IBA-نىڭ ۆيتسە-پرەزيدەنتى ەتىپ الۋى اسسوتسياتسيانىڭ باسشىلىعىن سايلاۋدىڭ تازا دا ءادىل وتپەگەنىن ايعاقتايدى دەپ ەسەپتەيدى.

فەدەراتسيا حابارلاماسىندا سونىمەن بىرگە كرەملەۆتىڭ بىلتىر جەلتوقسان ايىندا دۋبايدا وتكەن IBA كونگرەسىندە ايتقان ءبىر ءسوزىن ەسكە ءتۇسىرىپ وتەدى. بىرىككەن اراب امىرلىگىندە ۋمار كرەملەۆ حالىقارالىق اسسوتسياتسيانىڭ رۇقساتىنسىز بىردە-ءبىر بوكسشى، جاتتىقتىرۋشى نەمەسە ۇلتتىق فەدەراتسيا وليمپيالىق ويىندارعا قاتىسا المايتىنىن ايتقان كورىنەدى.

وسىعان وراي حوك-تىڭ مالىمدەمەسىنەن مىناداي دايەكسوز كەلتىرە كەتەدى: «IBA-نىڭ بوكس پەن بوكسشىلاردا ەشقانداي شارۋاسى جوق ەكەنىن، ونى تەك ءوزىنىڭ كۇشى عانا قىزىقتىراتىنىن جاقىندا وتكەن كونگرەسس تاعى ءبىر مارتە كورسەتتى. بوكسشىلاردى وليمپيالىق ىرىكتەۋ تۋرنيرلەرى مەن وليمپيالىق ويىندارعا جىبەرمەۋگە باعىتتالعان شەشىمدەرى مەن تالقىلاۋلارىن باسقاشا تۇسىنۋگە بولمايدى».

ماكەتي حابارلاماسىنىڭ سوڭىندا رەسەي سپورتشىلارىنىڭ حوك تاراپىنان سانكتسيا سالىنعانىنا قاراماستان، 2023 جىلى ماروككودا وتكەن IBA Golden Belt Series تۋرنيرىنە ءوز تۋىنىڭ استىندا قاتىسقانىن جازادى. اۋەسقويلار بوكسى – قازىرگى كەزدە رەسەيلىكتەر مەن بەلورۋستار بارلىق جارىستارعا ءوز جالاۋلارىمەن جانە انۇراندارىمەن ەشبىر شەكتەۋسىز قاتىسىپ جۇرگەن جالعىز وليمپيالىق سپورت ءتۇرى.

اقش بوكس فەدەراتسياسىنان كەيىن 9 اقپاندا يرلانديا بوكس فەدەراتسياسى دا رەسەيلىك سپورتشىلار قاتىساتىن ەرلەر جانە ايەلدەر چەمپيوناتتارىنا بارۋدان باس تارتتى. ۇيىمنىڭ ديرەكتورلار كەڭەسى اتالمىش تۋرنيرلەرگە بويكوت جاريالاۋعا شەشىم قابىلدادى. ال چەحيا بوكس اسسوتسياتسياسى دا 14 اقپاندا وسىنداي شەشىمگە كەلىپ، چەمپيوناتتارعا بويكوت جاريالاۋشى ەكى ەلدىڭ قاتارىنا قوسىلدى. ودان كەيىن انگليا، كانادا، شۆەتسيا، پولشا، شۆەيتساريا مەن نيدەرلاند بوكس فەدەراتسيالارى بويكوت  جاريالادى. ساراپشىلار الداعى ۋاقىتتا بۇل ءتىزىمنىڭ كۇرت كوبەيىپ، ءتىپتى الەم چەمپيوناتتارىنىڭ بولماۋى دا مۇمكىن ەكەنىن ايتىپ وتىر.

حالىقارالىق وليمپيالىق كوميتەت 2019 جىلى IBA-نىڭ (بۇرىن – AIBA) وزىنە مۇشەلىگىن توقتاتقان بولاتىن. بىراق توكيودا وتكەن وليمپيادادا بوكس ءتۋرنيرىن ساقتاپ قالدى. ونى حوك-تىڭ ارنايى كوميسسياسى وتكىزدى. 2021 جىلى تامىز ايىندا IBA پرەزيدەنتى ۋمار كرەملەۆ ۇيىمنىڭ دەمەۋشىلەردىڭ ارقاسىندا بارلىق قارىزدارىن جاپقانىن مالىمدەدى. حوك ماۋسىم ايىندا 2024 جىلى پاريجدە وتەتىن بوكس ءتۋرنيرى تاعى دا IBA-نىڭ قاتىسىنسىز وتەتىنىن مالىمدەدى. بۇدان باسقا، بوكس 2028 جىلعى وليمپيالىق ويىنداردىڭ الدىن الا باعدارلاماسىنا ەنگىزىلمەي قالدى.

داستان كەنجالين،

استانا