ءبيبىزادا دۇيسەنباەۆا: «بارلىق اۋدانداردىڭ جەدەل جاردەم بولىمشەلەرى جالدامالى عيماراتتاردا ورنالاسقان…»

ماڭعىستاۋ وبلىسىنىڭ جانە مۇنايلى اۋدانىنىڭ مەديتسينا ماسەلەلەرى بويىنشا دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءبيبىزادا اشىمقىزى دۇيسەنباەۆا SportPress.kz اقپاراتتىق-ساراپتامالىق سپورت سايتىنىڭ سۇراقتارىنا جاۋاپ بەردى.

-ساپالى مەديتسينالىق قىزمەت وبلىستىڭ بارلىق تۇرعىندارىنا قولجەتىمدى دەپ ايتا الاسىز با؟ بۇل باعىتتاعى قىزمەتتەرىڭىزدى قالاي باعالايسىز؟

– مەديتسينالىق قىزمەتتەردىڭ قولجەتىمدىلىگىن قامتاماسىز ەتۋ ءۇشىن جۇيەلى جۇمىستار اتقارىلۋدا. دەنساۋلىق ساقتاۋ سالاسى بويىنشا جەكە ينۆەستيتسيالار ەسەبىنەن جاڭاوزەن قالاسىندا 175 توسەكتىك كوپبەيىندى اۋرۋحانا قۇرىلىسى سالىنىپ، پايدالانۋعا بەرىلدى. ودان وزگە، زاماناۋي قۇرىلعىلارمەن جابدىقتالعان 100 توسەكتىك ونكولوگيا عيماراتى قۇرىلىسى تولىقتاي اياقتالىپ، ىسكە قوسىلعاننان كەيىن ناۋقاستاردىڭ باسقا وڭىرلەرگە كەتۋى ازايۋدا.

تاعى ءبىر جاعىمدى جاڭالىق – وبلىستىق بالالار اۋرۋحاناسى بازاسىندا «قامقورلىق» ەرتە ارالاسۋ جانە وڭالتۋ ورتالىعىنىڭ اشىلۋى. وسىناۋ ءىرى ورتالىقتىڭ اشىلۋى وڭالتۋ جانە قالپىنا كەلتىرۋ، ەمدەۋ ەم-شارالارىنا مۇقتاج بالالاردىڭ استانا جانە الماتى قالالارىنداعى رەسپۋبليكالىق ورتالىقتارعا بارماي، وبلىس دەڭگەيىندە ەمىن الۋعا مۇمكىندىك تۋعىزدى.

سونىمەن قاتار مەديتسينالىق قىزمەتتىڭ قادامدىق قولجەتىمدىلىگىن قامتاماسىز ەتۋ ءۇشىن العاشقى مەديتسينالىق سانيتارلىق كومەك كورسەتەتىن 6 جەكەمەنشىك ۇيىم اشىلدى. ولار تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جانە مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا حالىققا مەديتسينالىق قىزمەتتەر كورسەتۋدە. «Tolimed»، «ساعىنمەد»، «ادەممەد»، «مەدينا»، «چا كۋر» جاۋاپكەرشىلىگى شەۋتەۋلى سەرىكتەستىكتەرى مەن «ياسين» جشس-نىڭ مۇنايلى فيليالى اشىلدى.

مۇنايلى اۋدانىندا 150 توسەكتىك اۋداندىق ورتالىق اۋرۋحانانىڭ قۇرىلىسى باستالدى. بىلتىر جاڭاوزەن قالاسى راحات اۋىلىندا العاشقى مەديتسينالىق-سانيتارلىق كومەك كورسەتەتىن دارىگەرلىك امبۋلاتوريا قۇرىلىسى اياقتالدى. بيىل «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 3 العاشقى مەديتسينالىق سانيتارلىق كومەك كورسەتۋ وبەكتىلەرىن سالۋ جوسپارلانۋدا.

– حالىق كوپتەن كۇتىپ جۇرگەن مۇنايلى اۋدانىنداعى ورتالىق اۋرۋحانانىڭ قۇرىلىسىن، عيماراتتىڭ ساپاسىن جەكە باقىلاپ ءجۇرسىز بە؟ سوڭعى رەت قاشان بارىپ تەكسەردىڭىز؟

– ماڭعىستاۋ اۋىلىندا 150 ورىندىق ورتالىق اۋداندىق اۋرۋحانا سالۋ جوباسى بويىنشا رەسپۋبليكالىق بيۋدجەتتەن قاراجات ءبولىنىپ، بىلتىرعى جىلدىڭ ناۋرىز ايىندا قۇرىلىس جۇمىستارى باستالدى. تاپسىرىس بەرۋشى – ماڭعىستاۋ وبلىسىنىڭ قۇرىلىس، ساۋلەت جانە قالا قۇرىلىسى باسقارماسى. كوشپەلى كوميسسيانىڭ ناتيجەلەرى بويىنشا دەنساۋلىق ساقتاۋ مينيسترلىگى جوبانى وڭتايلاندىرۋ تۋرالى ۇسىنىس ەنگىزدى. جوبا بويىنشا قۇرىلىس-مونتاجداۋ جۇمىستارىن جۇرگىزۋ كەستەسى وزگەردى. وسىعان وراي، سالىناتىن عيمارتتىڭ ساپاسىن جانە قۇرىلىس جوباسىن وڭتايلاندىرۋ بويىنشا باسقارما باسشىلىعىنان جۇمىس توبى قۇرىلىپ، قۇرىلىس نىسانى تەكسەرىلىپ، ماڭعىستاۋ وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنا ۇسىنىستار بەرىلدى.

– جەدەل جاردەم قىزمەتتەرى مەن سانيتارلىق اۆتوكولىكتەر قاجەتتى قۇرال-جابدىقتارمەن تولىق قامتاماسىز ەتىلدى مە؟ اۋىز تولتىرىپ ايتارلىقتاي نە سۇرادىڭىزدار، نە الدىڭىزدار؟

– بۇگىندە ماڭعىستاۋ وبلىستىق جەدەل جانە شۇعىل مەديتسينالىق كومەك ستانتسياسىنىڭ بالانسىندا 111 سانيتارلىق اۆتوكولىك بار. ونىڭ 74-ءى قالادا جانە 37-ءسى اۋىلدا. جەدەل جاردەم بالانسىندا بار كولىكتەردىڭ 83-ءى ءجۇرىپ تۇر. بۇل — 74،7% . سانيتارلىق اۆتوكولىكپەن جابدىقتاۋ 100%.

سانيتارلىق اۆتوكولىكتىڭ توزۋى 15%. بيىلعى قاڭتار ايىندا «ونەركاسىپتى دامىتۋ قورى» اق-دان 5 سانيتاريالىق اۆتوكولىك ساتىپ الىندى. ەكەۋى – «Hyundai H350» جەدەل مەديتسينالىق جاردەم اۆتوكولىگى، ۇشەۋى «Jac Sunray» جەدەل مەديتسينالىق جاردەم كولىگى.

وبلىستىق جەدەل جاردەم ستانتسياسى بويىنشا سانيتارلىق اۆتوكولىكتى GPS ناۆيگاتسياسىمەن جاراقتاندىرۋ – 100%. مەديتسينالىق جابدىقتارمەن جاراقتاندىرۋ دا 100% بولدى.

باسقارمامىز دەنساۋلىق ساقتاۋ مينيسترلىگىنە «ماڭعىستاۋ وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارىنا» 2023-2024 جىلدارعا ارنالعان وبلىستىق جەدەل جاردەم بريگادالارىن قاجەتتى جابدىقتارمەن جاراقتاندىرۋدى ەنگىزۋ تۋرالى ۇسىنىس جولدادى. بۇل ۇسىنىسىمىز كەلىسىمدە تۇر. ونىڭ ىشىندە رەسپۋبليكالىق بيۋدجەت ەسەبىنەن 305،6 ملن تەڭگە جابدىق ساتىپ الۋ ماسەلەسى قاراستىرىلۋدا (2023 جىلى – 105،3 ملن تەڭگە سوماسىنا جانە 2024 جىلى – 200،3 ملن تەڭگە سوماسىنا، — رەد.).

– مەملەكەت باسشىسى وبلىسىمىزداعى بارلىق اۋدانداردىڭ جەدەل جاردەم بولىمشەلەرى عيماراتقا جارىماي وتىر دەگەن ورىندى سىن ايتتى. بۇل ماسەلەلەر بويىنشا نە ىستەلىندى؟

– ءيا، قازىرگى تاڭدا بارلىق اۋدانداردىڭ جەدەل جاردەم بولىمشەلەرى جالدامالى عيماراتتاردا ورنالاستىرىلعان. سوندىقتان مودۋلدىك قوسالقى ستانتسيالاردى اۋداندىق جەدەل جاردەم بولىمشەلەرىنە سالۋ ماسەلەسى بويىنشا الىس جانە جاقىن شەتەلدىك وندىرۋشىلەردىڭ اقپاراتىنا مونيتورينگ پەن تالداۋ جۇرگىزىلۋدە.

– اقتاۋدا كوپبەيىندى اۋرۋحانا مەن جاڭا جەدەل جاردەم ستانتسياسىن سالۋ ماسەلەسىن قاراستىردىڭىز با؟

–دەنساۋلىق ساقتاۋ مينيسترلىگىمەن مەملەكەتتىك-جەكەشەلىك ارىپتەستىك شەڭبەرىندە قالالىق كوپسالالى اۋرۋحانا سالۋ جوسپارلاندى. باسقارما جوبانىڭ مەديتسينالىق-تەحنولوگيالىق تاپسىرماسىن ازىرلەدى. الايدا بۇگىنگى كۇنى پرەمەر-ءمينيستردىڭ «مەملەكەتتىك-جەكەشەلىك ارىپتەستىك شەڭبەرىندە كوپ بەيىندى اۋرۋحانالار سالۋ ماسەلەلەرى جونىندەگى» كەڭەسىنىڭ حاتتاماسى نەگىزىندە مينيسترلىك باستاماسىمەن جوبانى ىسكە اسىرۋ 2026-2027 جىلدارعا قالدىرىلدى. دەگەنمەن، «ماڭعىستاۋ وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارىنا» سايكەس قالالىق كوپبەيىندى اۋرۋحانا قۇرىلىسىنا جوبالىق سمەتالىق قۇجاتتارىن ازىرلەۋگە كونكۋرس جاريالاندى.

– قارجى ءبولىندى مە؟

– اقتاۋ قالاسىندا وبلىستىق جەدەل جاردەم ستانتسياسىنىڭ عيماراتىن سالۋعا وبلىس اكىمدىگى جوبالىق سمەتالىق قۇجاتتارىن ازىرلەۋ بويىنشا كونكۋرس وتكىزۋ ءۇشىن قاراجات ءبولدى.

– ونىڭ جسق-سى (پسد) دايىندالدى ما؟

– قۇرىلىس، ساۋلەت جانە قالا قۇرىلىسى باسقارماسى وبلىستىق جەدەل جاردەم ستانتسياسى عيماراتىنىڭ قۇرىلىسىنا جوبالىق سمەتالىق قۇجاتتار ازىرلەۋ بويىنشا كونكۋرس وتكىزدى. جەڭىمپاز انىقتالىپ، «RedLine Pro» جشس جوبالاۋشىسىمەن شارت جاسالدى. كەلىسىم-شارت بويىنشا جوبالىق سمەتالىق قۇجاتتامانى دايىنداۋعا 5 اي بەرىلدى. وعان جوبانىڭ مەملەكەتتىك ساراپتاماسىن جۇرگىزۋ مەرزىمى كىرمەيدى.

– قاي شاعىن اۋداننان سالىنادى؟ جەر ءبولىندى مە؟

– اقتاۋ قالاسىنداعى 34 ا-شاعىن اۋدانىنان جەر تەلىمى ءبولىندى.

 

اڭگىمەڭىزگە راحمەت!

اڭگىمەلەسكەن ايبەك مۇحانوۆ،

قازاقستان جۋرناليستەر وداعىنىڭ مۇشەسى.