ارگەنتينالىق فۋتبولشىلار مەن جانكۇيەرلەر جىل ۇزدىكتەرى اتاندى

فرانتسيانىڭ استاناسى — پاريج قالاسىندا The Best FIFA سىيلىعىن تابىس ەتۋ ءراسىمى بولدى.  

سالتاناتتى ءىس-شارادا حالىقارالىق فۋتبول فەدەراتسياسىنىڭ (فيفا) شەشىمىمەن ارگەنتينا ۇلتتىق قۇراماسى مەن فرانتسيانىڭ «پاري سەن-جەرمەن» كلۋبىنىڭ شابۋىلشى ليونەل مەسسيگە، 2022 جىلدىڭ ۇزدىك ويىنشىسى اتاعى بەرىلدى. سونىمەن بىرگە ارگەنتينانىڭ باس جاتتىقتىرۋشىسى  ليونەل سكالوني جىلدىڭ ۇزدىك باپكەرى دەپ تانىلسا، وسى ەلدىڭ قۇراما كومانداسى مەن انگليانىڭ «استون ۆيللا» كلۋبىنىڭ قاقپاشىسى ەميلانو مارتينەس جىلدىڭ ۇزدىك قاقپاشىسى اتاندى.

ۇزدىكتەردىڭ قاتارىنا ارگەنتينا ەلىنىڭ جانكۇيەرلەرى دە قوسىلدى. بۇل مەملەكەتتىڭ حالقى بىلتىرعى جىلدىڭ ۇزدىك جانكۇيەرلەرى بولدى.

ليونەل مەسسي بىلتىر كاتاردا وتكەن الەم چەمپيوناتىندا ارگەنتينا قۇراماسىمەن بىرگە الەم چەمپيونى اتاعى مەن فيناليسسيمانى جەڭىپ الدى. ول «پسج» ساپىندا فرانتسيا چەمپيونى بولىپ، وسى ەلدىڭ سۋپەركۋبوگىنىڭ يەگەرى دە اتاندى.

بۇعان دەيىن مەسسي 2019 جىلدىڭ ۇزدىك ويىنشىسى اتانعان بولاتىن. جىلدىڭ ۇزدىك فۋتبولشىسى اتانۋعا كيليان مباپپە مەن كاريم بەنزەما دا ۇمىتكەر بولدى.

مارتينەس ارگەنتينا قۇراماسىنىڭ ساپىندا الەم چەمپيونى اتانىپ، مۋنديالدىڭ ۇزدىك قاقپاشىسى دەپ تانىلدى. ول فينالدا فرانتسيا ويىنشىلارىنىڭ ماتچتان سوڭىندا تەپكەن ءبىر پەنالتيىن قايتاردى. ونىمەن بىرگە بۇل سىيلىققا «رەال» جانە بەلگيا قۇراماسىنىڭ قاقپاشىسى تيبو كۋرتۋا مەن «سەۆيليا» جانە  ماروككو قۇراماسىنىڭ قاقپاشىسى ياسسين بونو تالاستى.

ارگەنتينا ۇلتتىق قۇراماسىنىڭ باس جاتتىقتىرۋشىسى ليونەل سكالوني كاتاردا وتكەن الەم چەمپيوناتىندا كوماندانى جەڭىسكە باستاپ اپاردى. سكالوني ۇلتتىق قۇرامامەن جاسالعان كەلىسىمشارتىن 2026 جىلعا دەيىن ۇزارتتى.

ارگەنتينانىڭ جانكۇيەرلەرى بولسا، ۇلتتىق قۇراما الەم چەمپيونى اتانعاننان كەيىن ءوز ەلدەرىندە وتانداستارىنىڭ جەڭىسىن ۇزاق ۋاقىت تويلاپ، بارشا جانكۇيەرگە ۇلتتىق قۇراماعا بولىسۋدىڭ ۇلگىسىن كورسەتتى.

ايەلدەر اراسىنداعى جىلدىڭ ۇزدىك ويىنشىسى اتاعى «بارسەلونا» مەن يسپانيا قۇراماسىنىڭ جارتىلاي قورعاۋشىسى الەكچيا پۋتەلياسعا بەرىلدى. ول وتكەن جىلى كومانداسىمەن بىرگە يسپانيا چەمپيوناتى مەن سۋپەركۋبوگىن جەڭىپ الىپ، پاتشايىم كۋبوگىنىڭ يەگەرى اتانعان.

ماراپاتتاۋ سالتاناتىندا فيفا جاقىندا قايتىس بولعان فۋتبول كورولى پەلەنىڭ قۇرمەتىنە «ماڭگىلىككە ەڭ ۇزدىك» سىيلىعىن تاعايىندادى. سىيلىق ءۇش دۇركىن الەم چەمپيونىنىڭ ۇشىنشى ايەلىنە مارسيا اوكي بەرىلدى. ال جۇلدەنى برازيليا ۇلتتىق قۇراماسىنىڭ ەكس-شابۋىلشىسى رونالدو تابىس ەتتى.

داستان كەنجالين،

استانا