اسكەري قىزمەتشى قوشقاردى كوتەرىپ، جاڭا رەكورد جاسادى

الماتى قالاسىندا ناۋرىز مەيرامى اياسىندا ۇلتتىق سپورت تۇرلەرىنەن وتكەن جارىستا قورعانىس مينيسترلىگى ورتالىق سپورت كلۋبىنىڭ اسكەري قىزمەتشىسى ەفرەيتور باۋىرجان ابدىقايىم رەكورد جاڭارتتى.

ەكى ساعات ىشىندە ول 50 كەلى بولاتىن قوشقاردى 2050 رەت كوتەرىپ، جاڭا رەكورد جاسادى. وسىدان ءبىر جىل بۇرىن باۋىرجان قوشقاردى 1600 رەت كوتەرگەن بولاتىن. جالپى، بۇل – ونىڭ وسىنداي جارىستاعى سەگىزىنشى جەڭىسى.

مەن ءوز رەكوردىمدى ەرىك-جىگەرى مىقتى قازاق حالقىنا ارنادىم. ارينە، كۇش-قۋات تۇرعىسىنان وڭاي بولعان جوق. بىراق شىدامدىلىق پەن كۇندەلىكتى جاتتىعۋلار ءوز ناتيجەسىن كورسەتتى. ماعان قولداۋ كورسەتكەندەردىڭ بارلىعىنا راحمەت. العا قازاقستان!، –  دەدى سپورتشى.

ەفرەيتور باۋىرجان ابدىقايىم ورتالىق سپورت كلۋبىندا 2017 جىلدىڭ مامىر ايىنان باستاپ كومەندانتتىق ۆزۆودتىڭ اعا ساربازى لاۋازىمىندا قىزمەت اتقارىپ كەلەدى. سپورتشى الماتىدا ۇيىمداستىرىلاتىن رەسپۋبليكالىق، قالالىق مارافوندار مەن ءىرى سپورتتىق ءىس-شارالارعا تۇراقتى تۇردە قاتىسىپ تۇرادى.

بيىل وتان قورعاۋشىلار كۇنىنە وراي ەفرەيتور باۋىرجان ابدىقايىم الماتىدان تارازعا دەيىن جۇگىرۋدى جوسپارلاپ وتىر.

ەربول تۇرىمبەت،

استانا