Áskerı qyzmetshi qoshqardy kóterip, jańa rekord jasady

Almaty qalasynda Naýryz meıramy aıasynda Ulttyq sport túrlerinen ótken jarysta Qorǵanys mınıstrligi Ortalyq sport klýbynyń áskerı qyzmetshisi efreıtor Baýyrjan Ábdiqaıym rekord jańartty.

Eki saǵat ishinde ol 50 keli bolatyn qoshqardy 2050 ret kóterip, jańa rekord jasady. Osydan bir jyl buryn Baýyrjan qoshqardy 1600 ret kótergen bolatyn. Jalpy, bul – onyń osyndaı jarystaǵy segizinshi jeńisi.

Men óz rekordymdy erik-jigeri myqty qazaq halqyna arnadym. Árıne, kúsh-qýat turǵysynan ońaı bolǵan joq. Biraq shydamdylyq pen kúndelikti jattyǵýlar óz nátıjesin kórsetti. Maǵan qoldaý kórsetkenderdiń barlyǵyna rahmet. Alǵa Qazaqstan!, –  dedi sportshy.

Efreıtor Baýyrjan Ábdiqaıym Ortalyq sport klýbynda 2017 jyldyń mamyr aıynan bastap komendanttyq vzvodtyń aǵa sarbazy laýazymynda qyzmet atqaryp keledi. Sportshy Almatyda uıymdastyrylatyn respýblıkalyq, qalalyq marafondar men iri sporttyq is-sharalarǵa turaqty túrde qatysyp turady.

Bıyl Otan qorǵaýshylar kúnine oraı efreıtor Baýyrjan Ábdiqaıym Almatydan Tarazǵa deıin júgirýdi josparlap otyr.

Erbol TURYMBET,

ASTANA