شىمبۇلاق تاۋ كۋرورتى گيننەستىڭ رەكوردتار كىتابىنا ەندى

شىمبۇلاق تاۋ كۋرورتى الەمدەگى ەڭ بيىك جارىقتاندىرىلعان تۇنگى شاڭعى تراسساسى رەتىندە رەسمي تۇردە گيننەس رەكوردىن جاڭارتتى. بۇل تۋرالى قازاقپارات حابارلادى.

گيننەس رەكوردتار كەڭسەسىنىڭ سۋدياسى شەيدا سۋباشي-گەميدجي تاۋ شاڭعىسى كۋرورتىنىڭ باس ديرەكتورى رينات ابدىراحمانوۆقا الەمدىك رەكوردتى راستايتىن سەرتيفيكاتتى تەڭىز دەڭگەيىنەن 3 200 مەتر بيىكتىكتەگى تالعار اسۋى ستانتسياسىندا تابىس ەتتى.

شىمبۇلاق تاۋلى كۋرورتىنىڭ رەسمي تۇردە الەمدەگى ەڭ بيىك تۇنگى شاڭعى تراسساسى رەتىندە گيننەس رەكوردىن ورناتقانىن حابارلاۋعا قۋانىشتىمىن. بۇل – الەمدەگى جاڭا رەكورد، — دەدى شەيدا سۋباشي-گەميدجي.

رينات ءابدىراحمانوۆ وسىدان 5 جىل بۇرىن تۇندە شاڭعى تەبۋگە ارنالعان جول اشۋدى ارمانداعانىن، قازىر سول ويى ورىندالعانىن العا تارتتى.

سالتاناتتى شاراعا مادەنيەت جانە سپورت ءمينيسترى اسحات ورالوۆ پەن الماتى قالاسى اكىمىنىڭ ورىنباسارى ارمان قىرىقباەۆ قاتىستى.

بۇل – بۇكىل ەل ءۇشىن ۇلكەن جەتىستىك. ارينە، ءبىزدىڭ الەۋەتىمىز زور. شىمبۇلاق – ەلىمىزدەگى ءتۋريزمدى دامىتۋدىڭ نەگىزگى ديستانتسيالارىنىڭ ءبىرى. جالپى، مادەنيەت جانە سپورت مينيسترلىگى ارقىلى ناقتى قادامدار جاسالىپ جاتىر. جەرگىلىكتى اتقارۋشى ورگاندارمەن، سەرىكتەستەرمەن، بيزنەس-قاۋىمداستىقپەن بىرلەسە وتىرىپ، ينفراقۇرىلىم مەن ءتۋريزمدى دامىتامىز، — دەدى اسحات ورالوۆ.

تۇنگى شاڭعى تەبۋ 2021 جىلدىڭ قاراشاسىندا ىسكە قوسىلعان. وتكەن قىسقى ماۋسىمدا تۇنگى شاڭعىمەن 50 346 تۋريست تىركەلسە، بيىلعى ماۋسىمدا 10%-عا كوبەيىپ، كەلۋشىلەر سانى 55 486 جەتكەن.

ەركەعالي بەيسەنوۆ،

استانا