Bokshylar álem chempıonatynan oraldy (FOTO)

Búgin bokstan Qazaqstannyń áıelder qurama komandasy Úndistannyń Delı qalasynda ótken álem chempıonatynan oraldy. Almaty áýejaıynan sportshylar men Shámil Safıýllın bastaǵan jattyqtyrýshylar qosynyn jankúıerler, boksshylardyń týǵan-týystary men dostary, qaladaǵy sport mektepteriniń shákirtteri men BAQ ókilderi qarsy aldy. Bul týraly Mádenıet jáne sport mınıstrliginiń Sportty damytý dırekııasy habarlady.

Bıylǵy boks básekesinde áıelder quramasy 2 kúmis pen 4 qola júlde alyp, jalpykomandalyq esepte segizinshi oryndy ıelendi. Asa aýyr salmaqtaǵy (+81 kg) Ləzzat Kúngeıbaeva men Karına Ibragımova (57 kg) fınalda qarsylastarynan jeńilip, kúmis medalge ıe boldy. Al Alýa Balqybekova (48 kg), Nadejda Rıabe (66 kg), Valentına Halzova (75 kg) men Farıza Sholtaı (81 kg) óz salmaǵynda qola júldeni qanaǵat tutty. Buǵan deıin áıelder quramasy álem chempıonatynda osynshama medaldi almady.

Byltyr Ystambulda ótken álem chempıonatynda kúmis júldeger atanǵan Alýa Balqybekova jýrnalısterge bergen suhbatynda aldaǵy jarystarǵa tıisti deńgeıde daıyndalatynyn aıtty.

Bir jyl buryn Túrkııada ótken chempıonatta kúmis júldeger atanǵanmyn. Osy joly Úndistanda qola medal buıyrdy. Kóbisi burynnan qolǵap túıistirip júrgen tanys qarsylastar. Jartylaı fınalda úndistandyq boksshymen kezdestim. О́te tartysty kezdesý boldy. О́kinishke qaraı, tóreshilerdiń sheshimimen qarsylasym fınalǵa shyqty. Aldaǵy ýaqytta elimizde 4 jyla bir keletin jazǵy Spartakıada ótedi. Odan bólek, Azııa oıyndary kele jatyr. Endi osy jarystarǵa daıyndalamyz,-dedi Alýa Balqybekova.

Boksshy Nadejda Rıabetiń aıtýynsha, álem chempıonatynda qola medal jeńip alý – jaqsy kórsetkish.

Bokspen aınalysyp júrgenime 12 jyl boldy. Qazir jasym 22-de. Úndistanda tórt jekpe-jek ótkizip, úsheýinde uttym. Barlyq kezdesý qıyn boldy. Osal qarsylas bolǵan joq. Jartylaı fınalda sál sáttilik jetispedi. Jattyqtyrýshylaryma raqmet aıtamyn,- dedi ol.

Almatyǵa jetken bette boksshylar óz qalalaryna attanyp ketti. Álem chempıonatynde el namysyn qorǵaǵan astanalyq Ləzzat Kúngeıbaeva, Valentına Halzova, Rıma Volosenko men Aıda Ábikeevany áýejaıdan týystary, dostary, Mádenıet jáne sport mınıstrliginiń Sportty damytý dırekııasy men Astana qalasy sport basqarmasynyń qyzmetkerleri kútip aldy.

Shamken BAIYRBEK,

ASTANA

FOTO: Mádenıet jáne sport mınıstrliginiń Sportty damytý dırekııasy