المات كەبىسپاەۆ قارسىلاسى قاي ەلدىڭ پالۋاندارى ەكەنىن ايتتى

7 ءساۋىر كۇنى استانادا كۇرەس تۇرلەرىنەن ازيا چەمپيوناتى باستالادى. وعان پالۋان المات كەبىسپاەۆ قاتىسادى.

گرەك-ريم كۇرەسىنەن قر ەڭبەك سىڭىرگەن سپورت شەبەرى. 2012 جىلى لوندون قالاسىندا وتكەن وليمپياداعا قاتىسۋشى، ازيانىڭ ەكى دۇركىن جانە بەس مارتە الەم چەمپيوناتىنىڭ جۇلدەگەرى المات كەبىسپاەۆپەن حابارلاسىپ شاعىن سۇحبات الدىق.

«ەلوردامىزدا وتەتىن ازيا قۇرلىعىنىڭ دوداسىنا دا از كۇن قالدى. جارىسقا دايىندالىپ جاتىرمىز. استانادا چەمپيون اتانىپ، قازاق ەلىن قۋانتۋعا بار كۇش-جىگەرىمدى سالامىن. 67 كگ سالماقتا سىنعا تۇسەمىن. بۇل سالماقتا وڭتۇستىك كورەيا، يران، وزبەكستان، قىرعىستان، ءۇندىستان مەملەكەتىنىڭ پالۋاندارى باستى قارسىلاسىم بولادى. ءتورت كۇن بۇرىن جاقسىلىق ۇشكەمپىروۆ اتىنداعى جەكپە-جەك سارايىنا قازاقستان كۇرەس فەدەراتسياسىنىڭ پرەزيدەنتى داۋلەت تۇرلىحانوۆ اعامىز كەلىپ، بالۋاندارىمەن كەزدەسىپ ساتتىلىك تىلەدى. جاقسى كۇرەسىڭدەر دەپ قولداۋىن ءبىلدىردى. بارىمىزدى سالامىز، جەڭۋگە تىرىسامىز!»، — دەدى ول.

ايبەك مۇحانوۆ،

ماڭعىستاۋ وبلىسى