استانادا شاحماتتان الەم چەمپيوناتى باستالدى

7 ءساۋىر مەن 1 مامىر ارالىعىندا استانادا شاحماتتان الەم چەمپيوناتى وتەدى. وندا الەم چەمپيونى اتاعى ءۇشىن يان نەپومنياششي (فيدە) مەن دين ليجەن (قحر) باق سىنايدى.

كەشە Astana Ballet تەاترىندا چەمپيوناتتىڭ سالتاناتتى اشىلۋ ءراسىمى ءوتتى.

قازاقستان استاناسىنا الەمنىڭ تۇكپىر-تۇكپىرىنەن تانىمال شاحماتشىلار، حالىقارالىق شاحمات فەدەراتسياسىنىڭ وكىلدەرى كەلدى. يان نەپومنياششي (2793) مەن دين ليجەن (2788) فيدە الەمدىك رەيتينگىندە ەكىنشى جانە ءۇشىنشى ورىنداردا تۇر.

ءتۋرنيردىڭ سالتاناتتى اشىلۋ راسىمىندە قازاقستان رەسپۋبليكاسىنىڭ جانە حالىقارالىق شاحمات فەدەراتسياسىنىڭ ءانۇراندارى قاتار شىرقالدى. اسەرلى قازاق مۋزىكاسى، LED-ەكرانداعى ەلىمىزدىڭ اسەم تابيعاتى تۋرالى روليكتەر، قازاق باتىرلارىنىڭ ونەر كورسەتۋى بۇل الەمدىك وقيعانىڭ قازاقستاندا ءوتىپ جاتقانىن ايشىقتاي ءتۇستى.

ايتۋلى كەشكە حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچ، قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ، شاحماتتان الەم چەمپيوندارى مەن گروسسمەيستەرلەر قاتىستى.

سونداي-اق، شاحماتشىلاردى ايتۋلى وقيعامەن قۇتتىقتاۋ ءۇشىن مادەنيەت جانە سپورت ءمينيسترى اسحات ورالوۆ كەلدى. مينيستر مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.

سىزدەردى شاحماتتان الەم چەمپيوناتىنىڭ اشىلۋىمەن شىن جۇرەكتەن قۇتتىقتايمىن! بۇل شاحماتسۇيەر قاۋىم ءۇشىن ماڭىزدى وقيعا. شاحمات – ادامعا اقىل-وي قابىلەتىن دامىتۋعا كومەكتەسەتىن ەرەكشە سپورت ءتۇرى. ءبىزدىڭ ەلىمىزدە وسى سالانى دامىتۋعا ەرەكشە كوڭىل بولىنۋدە. ازاماتتارعا، اسىرەسە جاستارعا شاحمات ويناۋعا قاجەتتى جاعدايلار جاسالعان. بۇعان اشىق ۇيىرمەلەر مەن 700-گە جۋىق مەكتەپ دالەل بولا الادى. ءبىزدىڭ شاحماتشىلار الەمدىك ارەنادا ەلىمىزدى دارىپتەپ ءجۇر. مەنىڭ ويىمشا، بۇل ماڭىزدى وقيعا شاحماتتىڭ ودان ءارى دامۋىنا سەرپىن بەرەدى. حالىقارالىق شاحمات فەدەراتسياسىنا چەمپيوناتتى ۇيىمداستىرۋعا قاتىسقانى ءۇشىن العىسىمدى بىلدىرەمىن، — دەپ جازىلعان پرەزيدەنتتىڭ قۇتتىقتاۋ حاتىندا.

اسىرەسە، جەرەبە تارتۋ ءادىسى قوناقتاردىڭ ەسىندە ۇزاق ساقتالارى انىق. ساحناعا يان نەپومنياششي مەن دين ليجەن جانە ولارمەن بىرگە جەرەبە تارتقان روبوت شىقتى. بۇل روبوت كوپتەگەن فيگۋرالاردىڭ ىشىنەن روبوت اق ءتۇستى فيگۋرانى تاڭداپ الدى. وسىلايشا، ءبىرىنشى پارتيادا يان نەپومنياششي ويىندى اق ءتۇستى فيگۋرالارمەن باستايتىنى انىقتالدى.

فيدە پرەزيدەنتى اركادي دۆوركوۆيچ الداعى ماتچتان كورەرمەندەر تارتىسقا تولى ويىن كۇتەتىنىن جەتكىزدى.

الەم چەمپيونى اتاعى كۇرەس ويىنشىلاردىڭ ستيلىنە، ولاردىڭ ماتچ كەزىندە ءوزىن قالاي ۇستايتىنىنا بايلانىستى بولادى. ولار جەڭىسكە ۇمتىلادى. قارسىلاستارىن تاڭ قالدىرۋعا تىرىسادى. ماتچ كەزىندە قاجەت بولماسا، وزدەرى ءۇشىن تىم قاۋىپتى جاعدايلارعا جول بەرمەيدى. بۇل ميلليونداعان كورەرمەندەرگە ۇنايدى دەپ ۇمىتتەنەمىن. قالاي بولعاندا دا، تابان تىرەسكەن كۇرەس بولادى. ءبىز وسى الەمدەگى ەكىنشى جانە ءۇشىنشى شاحماتشىلاردىڭ سايىسىنا كۋا بولامىز. ويىندى باقىلاۋ قىزىقتى بولادى دەپ ويلايمىن، — دەدى اركادي دۆوركوۆيچ.

ءتۋرنيردىڭ باس سەرىكتەسى جانە ۇيىمداستىرۋشىسى – Freedom Holding Corp. كومپانياسى. ال جارىسىتڭ جۇلدە قورى —  2 ملن ەۋرو.

قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ ءتۋرنيردىڭ ميلليونداعان ادامدى قىزىقتىراتىنىن ايتتى.

ەگەر شاحمات سەكتسيالارىنا بالالار كوپتەپ كەلسە، ءبىزدىڭ ەلدىڭ بەدەلى اشىق قوناقجاي ەل رەتىندە نىعايا تۇسسە، بۇل مەنىڭ باستى جەتىستىگىم بولادى. مەنىڭ ويىمشا، قازاقستاندا، كوپتەگەن يننوۆاتسيالار تۋىپ جاتقان نارىقتا جەرەبە تارتۋدىڭ يننوۆاتسيالىق ءتاسىلى پايدا بولعانى قۋانتادى. ءبىز شىنىمەن دە تسيفرلىق كوشپەندىلەر ەلىنە اينالامىز. حالىقارالىق چەمپيوناتتى قابىلداۋ، قوناقتاردىڭ ەڭ ۇزدىك اسەر الۋى ءۇشىن ونى الەمدىك تاجىريبەگە ساي ءوتۋ ءۇشىن ءبارىن جاساۋ – ءبىز ءۇشىن ۇلكەن ماقتانىش. سونداي-اق، ءبىز بيىل وتەتىن حالىقارالىق مەكتەپ شاحمات وليمپياداسىنا دايىندالىپ جاتىرمىز. ودان دا قىزىقتى ءىس-شارالاردى، سونىڭ ىشىندە الەم چەمپيونى اتاعى ءۇشىن قازىرگى سايىس اياسىندا ءتۇرلى كەزدەسۋلەر وتكىزۋدى جوسپارلاپ وتىرمىز. ماسەلەن قازاقستان ايەلدەر قۇراماسىنىڭ الەم قۇراماسىنا قارسى ادەمى ماتچىن كورەمىز، — دەدى تيمۋر تۋرلوۆ.

استانادا وتەتىن ەكى اتاقتى شاحماتشىنىڭ ويىنى تاريحتا قالادى. ولاردىڭ ويلارى تەك جەڭىسكە باعىتتالعان. قانداي ناتيجە بولسا دا بۇل ماتچ جاڭا شاحمات پاتشاسىنىڭ ەسىمىن انىقتايدى.

ايجان سەرىكجانقىزى،

استانا