Kúresten Azııa chempıonaty:  Qazaqstan 4 medal aldy

Astana qalasyndaǵy Jaqsylyq Úshkempirov atyndaǵy Jekpe-jek saraıynda kúresten Azııa chempıonaty bastaldy.

Mádenıet jáne sport mınıstrligi Sportty damytý dırekııasynyń habarlaýynsha,  Azııa chempıonatynda alǵashqy kúni grek-rım kúresinen bes salmaq dárejesinde chempıondar men júldegerler belgili boldy. Qazaqstan quramasynda bes bozkilem sheberi júlde úshin kúresip, tórteýi tuǵyr bıigine kóterildi.

Amanǵalı Bekbolatov (55 kg) qytaılyq Haıfeng Jangty taza utyp, bıylǵy Azııa chempıonatynyń qola júldegeri atandy. Otandasymyz kúndiz shırek fınalda úndistandyq Rýpınge ese jiberdi. Alaıda jubanysh beldesýinde qyrǵyzstandyq Sardarbek Konýshbaevty jeńip, medal úshin talasýǵa múmkindik aldy. Amanǵalı byltyr Mońǵolııadaǵy Azııa chempıonatynyń fınalyna shyǵyp, japonııalyq balýannan utylǵan bolatyn.

Eresekter arasyndaǵy alǵashqy halyqaralyq jarysyna qatysqan Muhamedáli Mamyrbek (63 kg) Astanadaǵy Azııa chempıonatynda qola medal jeńip aldy. Ol júlde jolynda japonııalyq Kezo Marýıamany taza utty. Muhamedáli alǵashqy kezdesýinde qytaılyq Haodong Tandy taza jeńgen. Biraq jartylaı fınalda ózbekstandyq Shermuhammad Sharıbjanovtyń myqty ekenin moıyndaýǵa májbúr boldy.

Keshe fınalǵa shyqqan jalǵyz qazaqstandyq Nursultan Tursynovqa sáttilik joldas bolǵan joq. Ol fınalda byltyrǵy sary qurlyq chempıony ırandyq Naser Gasem Əlızadeden utylyp qaldy. 87 kg deıingi salmaqta synǵa túsetin otandasymyz kúndiz shırek fınalda byltyrǵy kúmis júldeger ózbekstandyq Jalǵasbaı Berdimuratovty, sosyn qyrǵyzstandyq Atabek Azızbekovten basym túsken.

Nursultan Tursynov — bıyl aqpanda Almatyda ótken Qazaqstannyń VI jazǵy Spartakıadasynyń chempıony. Ol byltyr Mońǵolııa astanasynda ótken Azııa chempıonatynda qola medal jeńip alǵan. Naser Gasem Əlızade byltyr Mońǵolııa astanasynda bolǵan sary qurlyq chempıonatynyń bas júldesin ıelengen. Osylaısha, ol Astanada óz ataǵyn qorǵap qaldy.

Asa aýyr salmaqtaǵy Álimhan Syzdyqov (130 kg) ekinshi jyl qatarynan Azııa chempıonatynda medal aldy. Byltyr Mońǵolııada koreıalyq Mınsekok Kımnen basym túsip, altyn júldeni alǵan balýan bul joly dál sol qarsylasyn taǵy utyp, úshinshi orynnan kórindi.

Əlimhan kúndiz shırek fınalda túrikmenstandyq Aıbegshada Kýrraıevty utqanymen, jartylaı fınalda qytaılyq Lınchje Megqa ese jiberdi.

Álimhan Syzdyqov ta bıyl aqpanda Almatyda ótken Qazaqstannyń VI jazǵy Spartakıadasynyń chempıony.

Qazir jalpykomandalyq esepte birinshi orynǵa Iran quramasy shyqty. Olar Azııa chempıonatynyń alǵashqy kúni 4  altyn, 1 kúmis júlde jeńip aldy.  Odan keıin 1 altyn, 1 qola júldemen Qyrǵyz Respýblıkasynyń quramasy keledi. Al Serik Jumashev jattyqtyratyn Qazaqsan komandasy úshinshi orynda tur. Bizdiń eldiń qorjynynada 1 kúmis, 3 qola medal bar.

Bes kúnge sozylatyn básekege qurlyqtaǵy 24 elden 400-den asa sportshy jınaldy. Onyń ishinde Olımpıada, álem jáne Azııa chempıondary bar.

Dastan KENJALIN,

ASTANA