SportPress.kz قازاقستان سپورت جاڭالىقتارى
استانا قالاسىندا كۇرەس تۇرلەرىنەن ءوتىپ جاتقان ازيا چەمپيوناتىندا ەركىن كۇرەس بالۋاندارى 2 التىن، 1 قولا مەدال جەڭىپ الدى.
بۇگىن بەس سالماقتىڭ ەكەۋىندە ماديار قۇرامىسوۆتىڭ شاكىرتتەرى قارسىلاس شاق كەلتىرمەي، جانكۇيەرلەردى قۋانتتى.
كۇندىزگى سەسسيا قورىتىندىسى بويىنشا بارلىق سالماقتاعى ۇلتتىق قۇرامانىڭ بالۋاندارى كەشكى سەسسيادا جۇلدەگە تالاسۋعا مۇمكىندىك الدى. ونىڭ ىشىندە فينالعا ەكى سپورتشى شىقتى.
سانجار دوسجانوۆ 1/8 فينالدا كورەيالىق سۋك حون پاركتى تازا ۇتتى. سوسىن قىرعىزستاندىق وروزوبەك توكتومبەتوۆتى وتە تارتىستى بەلدەسۋدە جەڭدى. نەگىزى كەزدەسۋ 4:4 ەسەبىمەن تەڭ اياقتالعان ەدى. سوڭعى ۇپايدى وتانداسىمىز العان سوڭ، ول كەلەسى كەزەڭگە جولداما الدى. وسىدان كەيىن سانجار يراندىق مورتەزا حاسسانالىدەن ايلاسىن اسىرىپ، فينالعا شىقتى. ال التىن جۇلدە ءۇشىن كۇرەستە ول وزبەكستاننىڭ وكىلى زافاربەك وتاكحونوۆقا ەش مۇمكىندىك بەرگەن جوق. جالپى، بۇل سانجار دوسجانوۆتىڭ (70 كگ) حالىقارالىق دوداداعى العاشقى جۇلدەسى بولدى.
بىلتىر وسى سالماقتا موڭعوليادا وتكەن ازيا چەمپيوناتىندا سىرباز تالعات قولا جۇلدەنى جەڭىپ العان بولاتىن.
ال 79 كگ دەيىنگى سالماقتا بولات ساقاەۆ سەنساتسيا جاسادى. ول شيرەك فينالدا جاپونيالىق يادجۋرو ياماساكيدى، ودان كەيىن ½ فينالدا يراندىق اميرحوسەيىن مورتەزا كاۆاۋزيدى ۇتىپ، فينالدا وسى سالماقتاعى كوشباسشىنىڭ ءبىرى، توكيو وليمپياداسىنىڭ قولا جۇلدەگەرى (74 كگ)، ەكى دۇركىن ازيا ويىندارىنىڭ چەمپيونى، ەكى دۇركىن ازيا چەمپيونى بەكزود ابدۋراحمونوۆتان باسىم ءتۇستى. بىلتىر وسى سالماقتا موڭعوليادا وتكەن قۇرلىق باسەكەدە قازاقستانعا مەدال بۇيىرماعان بولاتىن.
قولا مەدال ءۇشىن كۇرەسكەن ءۇش بالۋانىمىزدىڭ اراسىنان تەك راحان قالجاننىڭ عانا جولى بولدى. ول موڭعوليالىق زانابازار زاندابۋدتى سوڭعى ساتتە جەڭدى.
راحات قالجان سارى قۇرلىق باسەكەسىن شيرەك فينالدان (57 كگ) باستاعان ەدى. ول الماس سمانبەكوۆتى جەڭە الماي، جۇبانىش بەلدەسۋىندە كۇرەستى. وندا وتانداسىمىز مۇحاممەد بيلاكتان ايلاسىن اسىردى. راحات قالجان بىلتىر موڭعوليا استاناسىندا جالاۋى جەلبىرەگەن ازيا چەمپيوناتىنىڭ فينالىندا ۇندىستاندىق سپورتشىدان ۇتىلىپ قالعان.
بۇگىن تاعى مۇحتار سانجار (65 كگ) مەن بەكزات ۇركىمباي (97 كگ) قارسىلاستارىنا ەسە جىبەرىپ، ءوز سالماعىندا بەسىنشى ورىننان كورىندى.
ەرتەڭ – ازيا چەمپيوناتىنىڭ سوڭعى كۇنى. بالۋاندار 61، 74، 86، 92 جانە 125 كەلىگە دەيىنگى سالماقتا كۇرەسەدى. قازىر قازاقستان قۇراماسىنىڭ قورجىنىندا 5 التىن، 2 كۇمىس پەن 9 قولا جۇلدە بار. جالپى ەسەپتە يران كوش باستاپ تۇر (6 التىن، 2 كۇمىس پەن 3 قولا). ودان كەيىنگى ساتىدا ءبىر التىن جۇلدەسى كەم جاپونيا مەن قازاقستاننىڭ ۇلتتىق قۇراماسى جايعاستى.
ەسكە سالا كەتسەك، بىلتىر موڭعوليانىڭ استاناسى — ۇلان-باتىردا وتكەن ازيا چەمپيوناتىندا قازاقستان بالۋاندارى بارلىعى 5 التىن، 8 كۇمىس جانە 8 قولا مەدال يەلەنگەن بولاتىن. قازاقستان سپورتشىلارى 10 التىن جۇلدەدەن العان جاپونيا مەن يرانعا ەسە جىبەرگەن.
شامكەن بايىربەك،
استانا
فوتو: مادەنيەت جانە سپورت مينيسترلىگى سپورتتى دامىتۋ ديرەكتسياسى
View this post on Instagram
