Erkin kúres balýandary Azııa chempıonatyn 2 altyn, 1 qola medalmen bastady (VIDEO)

Astana qalasynda kúres túrlerinen ótip jatqan Azııa chempıonatynda erkin kúres balýandary 2 altyn, 1 qola medal jeńip aldy.

Búgin bes salmaqtyń ekeýinde Madııar Quramysovtyń shákirtteri qarsylas shaq keltirmeı, jankúıerlerdi qýantty.

Kúndizgi sessııa qorytyndysy boıynsha barlyq salmaqtaǵy ulttyq quramanyń balýandary keshki sessııada júldege talasýǵa múmkindik aldy. Onyń ishinde fınalǵa eki sportshy shyqty.

Sanjar Dosjanov 1/8 fınalda koreıalyq Sýk Hon Parkty taza utty. Sosyn qyrǵyzstandyq Orozobek Toktombetovti óte tartysty beldesýde jeńdi. Negizi kezdesý 4:4 esebimen teń aıaqtalǵan edi. Sońǵy upaıdy otandasymyz alǵan soń, ol kelesi kezeńge joldama aldy. Osydan keıin Sanjar ırandyq Morteza Hassanáliden aılasyn asyryp, fınalǵa shyqty. Al altyn júlde úshin kúreste ol О́zbekstannyń ókili Zafarbek Otakhonovqa esh múmkindik bergen joq. Jalpy, bul Sanjar Dosjanovtyń (70 kg) halyqaralyq dodadaǵy alǵashqy júldesi boldy.

Byltyr osy salmaqta Mońǵolııada ótken Azııa chempıonatynda Syrbaz Talǵat qola júldeni jeńip alǵan bolatyn.

Al 79 kg deıingi salmaqta Bolat Saqaev sensaııa jasady. Ol shırek fınalda japonııalyq Iadjýro Iamasakıdi, odan keıin ½ fınalda ırandyq Amırhoseıin Morteza Kavaýzıdi utyp, fınalda osy salmaqtaǵy kóshbasshynyń biri, Tokıo Olımpıadasynyń qola júldegeri (74 kg), eki dúrkin Azııa oıyndarynyń chempıony, eki dúrkin Azııa chempıony Bekzod Abdýrahmonovtan basym tústi. Byltyr osy salmaqta Mońǵolııada ótken qurlyq básekede Qazaqstanǵa medal buıyrmaǵan bolatyn.

Qola medal úshin kúresken úsh balýanymyzdyń arasynan tek Rahan Qaljannyń ǵana joly boldy. Ol mońǵolııalyq Zanabazar Zandabýdty sońǵy sátte jeńdi.

Rahat Qaljan sary qurlyq básekesin shırek fınaldan (57 kg) bastaǵan edi. Ol Almas Smanbekovti jeńe almaı, jubanysh beldesýinde kúresti. Onda otandasymyz Muhammed Bılaktan aılasyn asyrdy. Rahat Qaljan byltyr Mońǵolııa astanasynda jalaýy jelbiregen Azııa chempıonatynyń fınalynda úndistandyq sportshydan utylyp qalǵan.

Búgin taǵy Muhtar Sanjar (65 kg) men Bekzat Úrkimbaı (97 kg) qarsylastaryna ese jiberip, óz salmaǵynda besinshi orynnan  kórindi.

Erteń –  Azııa chempıonatynyń sońǵy kúni. Balýandar 61, 74, 86, 92 jáne 125 kelige deıingi salmaqta kúresedi. Qazir Qazaqstan quramasynyń qorjynynda 5 altyn, 2 kúmis pen 9 qola júlde bar. Jalpy esepte Iran kósh bastap tur (6 altyn, 2 kúmis pen 3 qola). Odan keıingi satyda bir altyn júldesi kem Japonııa men Qazaqstannyń ulttyq quramasy jaıǵasty.

Eske sala ketsek, byltyr Mońǵolııanyń astanasy — Ulan-Batyrda ótken Azııa chempıonatynda Qazaqstan balýandary barlyǵy 5 altyn, 8 kúmis jáne 8 qola medal ıelengen bolatyn. Qazaqstan sportshylary 10 altyn júldeden alǵan Japonııa men Iranǵa ese jibergen.

Shamken BAIYRBEK,

ASTANA

FOTO: Mádenıet jáne sport mınıstrligi Sportty damytý dırekııasy

 

View this post on Instagram

 

A post shared by Erkin kúres qurama komandasy. (@erkinkures2020)