رىباكينا الەمنىڭ التىنشى راكەتكاسى اتاندى

ەلىمىزدىڭ جەكەلەگەن سىنداعى ءبىرىنشى راكەتكاسى ەلەنا رىباكينا يسپانيانىڭ مادريد قالاسىندا ءوتىپ جاتقان ماستەرس تۋرنيرءىنىڭ قارساڭىندا تۋنيستىك تەننيسشى ونس جابەر جاراقاتىنا بايلانىستى جارىسقا قاتىسۋدان باس تارتقاننان كەيىن الەمدىك رەيتينگتە التىنشى ورىنعا كوتەرىلدى. ءسويتىپ، جابەر بىلتىر ماستەرس تۋرنيرىندە جيناعان 1000 ۇپايىن جوعالتىپ، ونىڭ ورنىنا رىباكينا شىقتى.

يسپانيا استاناسىنداعى WTA 1000 جانە ATP 1000 جارىستارى 25 ءساۋىر – 6 مامىر، 26 ءساۋىر – 7 مامىر ارالىعىندا وتەدى.

رىباكينا ءتۋرنيردى ەكىنشى اينالىمنان باستاپ، رەسەيلىك اننا كالينسكايا نەمەسە چەحيالىق برەندا فرۋحۆيرتوۆانىڭ بىرەۋىمەن كەزدەسەدى.

الەمنىڭ 51-راكەتكاسى يۋليا پۋتينتسەۆا العاشقى اينالىمدا رەيتينگتە وزىنەن ءتورت ساتى تومەن تۇرعان امەريكالىق كلەر ليۋمەن وينايدى.

بىلتىر مادريدتە رىباكينا ءۇشىنشى، پۋتينتسەۆا ەكىنشى اينالىمعا دەيىن جەتكەن ەدى.

ەرلەر اراسىندا قازاقستاننىڭ ءبىرىنشى، الەمنىڭ 55-راكەتكاسى الەكساندر بۋبليك رەيتينگتە 100-ورىنداعى كولۋمبيالىق دانيەل گالانمەن كەزدەسەدى. تيموفەي سكاتوۆ ىرىكتەۋ سايىستارىندا يتاليالىق ماركو چەككيناتومەن كورتقا شىعادى.

داستان كەنجالين،

استانا