SportPress.kz قازاقستان سپورت جاڭالىقتارى
ەركىن كۇرەستەن 2012 جىلعى لوندون وليمپياداسىنىڭ جانە الەم چەمپيوناتىنىڭ قولا جۇلدەگەرى، ازيا چەمپيونى، قازاقستاننىڭ بىرنەشە دۇركىن چەمپيونى، «قۇرمەت» جانە «پاراسات» وردەندەرىنىڭ يەگەرى، قازاقستان رەسپۋبليكاسىنا ەڭبەك سىڭىرگەن سپورت شەبەرى اقجۇرەك تاڭاتاروۆ پرەزيدەنت قاسىم-جومارت توقاەۆتان كومەكتەسۋىن ءوتىنىپ، ۆيدەوۇندەۋ جولدادى.
ول ۇندەۋدە ءوزىن جامبىل وبلىسى دەنەشىنىقتىرۋ جانە سپورت باسقارماسىنىڭ «وليمپيادالىق رەزەرۆتىڭ وبلىستىق مامانداندىرىلعان مەكتەپ-ينتەرنات كوللەدجى» مكك باسشىسى لاۋازىمىنان زاڭسىز جولمەن الىپ تاستاعانىن ايتتى.
سونىڭ سەبەبىن ءبىلۋ ءۇشىن وبلىستىق سپورت باسقارماسىنىڭ باسشىسى ارمان تاشمەتوۆتەن سۇراعاندا، ول وبلىس اكىمى نۇرجان نۇرجىگىتوۆتىڭ بۇيرىعى مەن شەشىمىن كورسەتىپ، ەشتەڭە ىستەي المايتىنىن ايتتى. ياعني، بۇل ارەكەت جاڭا قازاقستاننىڭ كولەڭكەسىنە دە جاقىن ەمەس. 90-جىلدارعا قايتا ورالعاندايمىز. پرەزيدەنت مىرزا! مەن سپورت جاناشىرى جانە وسى سالانى جەتىك مەڭگەرگەن ازامات رەتىندە سىزدەن جامبىل وبلىسىنىڭ اكىمدىگى مەن سپورت باسقارماسىندا زاڭسىزدىقتاردى توقتاتۋ ءۇشىن رەسپۋبليكالىق دەڭگەيدەگى بارلىق قۇقىق قورعاۋ ورگاندارىنان، وعان قوسا پارلامەنت دەپۋتاتتارىمەن بىرىگىپ كوميسسيا قۇرىپ، تولىققاندى تەكسەرىس تاعايىنداۋدى سۇرايمىن.
بۇل ارەكەتىممەن سىزگە ماعان قىزمەت الىپ بەرىڭىز دەمەيمىن. تەك ءوسىپ كەلە جاتقان جاس بۋىن ۇل-قىزدارىمىز دۇرىس ءتالىم-تاربيە الىپ، الەمدىك ارەنادا جوعارى ناتيجەلەرگە قول جەتكىزسە ەكەن دەپ ارماندايمىن. سول سەبەپتى، وبلىسىمىزداعى جەمقورلىق ارەكەتتەردى توقتاتىپ، وبلىستاعى لاۋازىمدارعا بىلىكتى، تاجىريبەلى، جاناشىر جانە بەدەلى بار ازاماتتاردى تاعايىنداۋعا اتسالىسساڭىز. وتىز جىل ۇيىقتاعانىمىز جەتەر. جاڭا قازاقستاندى بىرگە قۇرايىق!، – دەدى سپورتشى.
وليمپيادا جۇلدەگەرى ءسوزىنىڭ سوڭىندا سول جاڭا قازاقستاندى قۇرۋعا بارىنشا كۇش-جىگەرىن سالۋعا دايىن ەكەنىن دە جەتكىزدى.
داستان كەنجالين،
استانا
