پرەزيدەنت بوكستان الەم چەمپيوندارىمەن كەزدەستى

مەملەكەت باسشىسى قاسىم-جومارت توقاەۆ بوكستان قازاقستان ۇلتتىق قۇراماسىنىڭ مۇشەلەرى مەن جاتتىقتىرۋشىلارىمەن جانە الەم چەمپيوندارىمەن كەزدەستى، دەپ حابارلادى اقوردا.

كەزدەسۋگە وزبەكستاننىڭ تاشكەنت قالاسىندا وتكەن بوكستان الەم چەمپيونى اتانعان سپورتشىلار – سانجار تاشكەنباي، ماحمۇد سابىرحان، اسلانبەك شىمبەرگەنوۆ، نۇربەك ورالباي جانە كۇمىس مەدال يەگەرى دۋلات بەكباۋوۆ قاتىستى. مەملەكەت باسشىسى سپورتشىلاردى جارقىن جەڭىسىمەن قۇتتىقتادى.

الەم چەمپيوناتىندا 4 التىن، 1 كۇمىس مەدال الۋ – زور جەتىستىك. قازاق جىگىتتەرى الەم چەمپيونى اتانىپ، ەلىمىزدىڭ مەرەيىن ءوسىردى. وسى مۇمكىندىكتى پايدالانىپ، بارلىق جانكۇيەرگە العىسىمدى ايتامىن. ولاردىڭ داۋىسى سوناۋ تاشكەنت تورىنەن انىق ەستىلدى. ءدال وسىنداي شىنايى قولداۋ سپورتشىلارىمىزعا ايرىقشا كۇش بەرگەنى ءسوزسىز. سپورت دوداسىن بۇكىل حالقىمىز كوردى، سىزدەرگە تىلەكشى بولدى دەپ ايتساق، ارتىق بولمايدى.

مەن دە فينالداعى جەكپە-جەكتەردى تۇگەل كوردىم. جىگىتتەرىمىز ەل نامىسىن قورعاۋ ءۇشىن بار كۇشىن سالىپ ايقاستى. جەلبىرەگەن كوك تۋىمىزبەن جانە انۇرانىمىزبەن بىرگە حالقىمىزدىڭ رۋحى كوتەرىلدى. ۇلتتىڭ اسقاق رۋحى جانە وتانشىلدىق قاسيەتى دەگەنىمىز – وسى! ويتكەنى سپورتشىلارىمىزدىڭ ءاربىر جەڭىسى ەلدى قاناتتاندىرادى.

شىن مانىندە، وتكەن جەكسەنبى قازاق بوكسىنىڭ اسىعى الشىسىنان تۇسكەن كۇن بولدى. مۇحيتتىڭ ارعى جاعىندا جانىبەك ءالىمحان ۇلى چەمپيون اتاعىن ابىرويمەن قورعادى. ونىڭ جەڭىستى جولى تاشكەنتتە جالعاستى. وسىنىڭ ءبارى بارشا قازاقتىڭ مەرەيىن تاسىتتى، – دەدى پرەزيدەنت.

قاسىم-جومارت توقاەۆ قازاق سپورتىنىڭ جاڭا بەلەسكە كوتەرىلىپ كەلە جاتقانىن اتاپ ءوتتى.

شاحماتشى ءبيبىسارا اساۋباەۆا بليتستەن الەم چەمپيونى اتاندى. تەننيسشى ەلەنا رىباكينا بەدەلدى تۋرنيرلەردە قاتارىنان بىرنەشە رەت توپ جاردى. بالۋاندارىمىز، ونىڭ ىشىندە قىزدارىمىز دا بار، ازيا چەمپيوناتىندا 7 التىن مەدال الدى. نۇرعيسا ادىلەت ۇلى اۋىر اتلەتيكادان ازيا چەمپيونى بولدى. فۋتبولشىلارىمىز، حوككەيشىلەرىمىز جاقسى ناتيجە كورسەتىپ ءجۇر. ارينە، سپورتتا جەڭىس تە، جەڭىلىس تە بولادى. دەگەنمەن سپورتشىلارىمىز بيىك بەلەستى باعىندىرىپ كەلەدى. بۇعان باپكەرلەر مەن باسقا دا سپورت ماماندارىنىڭ زور ەڭبەك سىڭىرگەنى انىق. بارشاڭىزعا شىنايى ريزاشىلىعىمدى بىلدىرەمىن، – دەدى ول.

پرەزيدەنت ەلىمىزدە سپورت سالاسىن دامىتۋعا ايرىقشا ءمان بەرىلەتىنىن، جاستاردىڭ جاپپاي سپورتپەن اينالىسۋىنا قاجەت جاعداي جاسالاتىنىن جەتكىزدى.

مەملەكەت باسشىسى سپورتشىلارعا ساتتىلىك تىلەپ، الداعى بايراقتى باسەكەلەردە ەل نامىسىن لايىقتى قورعايتىنىنا سەنىم ءبىلدىردى.

سونداي-اق قاسىم-جومارت توقاەۆ قازاقستان بوكس فەدەراتسياسىنىڭ باسشىلىعىنا، سپورتشىلار مەن باپكەرلەرگە پرەزيدەنتتىڭ العىس حاتتارى مەن قۇرمەت گراموتالارىن تابىستادى.

داۋرەن ەربولات،

استانا