Prezıdent bokstan álem chempıondarymen kezdesti

Memleket basshysy Qasym-Jomart Toqaev bokstan Qazaqstan ulttyq quramasynyń músheleri men jattyqtyrýshylarymen jáne álem chempıondarymen kezdesti, dep habarlady Aqorda.

Kezdesýge О́zbekstannyń Tashkent qalasynda ótken bokstan álem chempıony atanǵan sportshylar – Sanjar Táshkenbaı, Mahmud Sabyrhan, Aslanbek Shymbergenov, Nurbek Oralbaı jáne kúmis medal ıegeri Dýlat Bekbaýov qatysty. Memleket basshysy sportshylardy jarqyn jeńisimen quttyqtady.

Álem chempıonatynda 4 altyn, 1 kúmis medal alý – zor jetistik. Qazaq jigitteri álem chempıony atanyp, elimizdiń mereıin ósirdi. Osy múmkindikti paıdalanyp, barlyq jankúıerge alǵysymdy aıtamyn. Olardyń daýysy sonaý Tashkent tórinen anyq estildi. Dál osyndaı shynaıy qoldaý sportshylarymyzǵa aıryqsha kúsh bergeni sózsiz. Sport dodasyn búkil halqymyz kórdi, sizderge tilekshi boldy dep aıtsaq, artyq bolmaıdy.

Men de fınaldaǵy jekpe-jekterdi túgel kórdim. Jigitterimiz el namysyn qorǵaý úshin bar kúshin salyp aıqasty. Jelbiregen kók týymyzben jáne ánuranymyzben birge halqymyzdyń rýhy kóterildi. Ulttyń asqaq rýhy jáne otanshyldyq qasıeti degenimiz – osy! О́ıtkeni sportshylarymyzdyń árbir jeńisi eldi qanattandyrady.

Shyn máninde, ótken jeksenbi qazaq boksynyń asyǵy alshysynan túsken kún boldy. Muhıttyń arǵy jaǵynda Jánibek Álimhanuly chempıon ataǵyn abyroımen qorǵady. Onyń jeńisti joly Tashkentte jalǵasty. Osynyń bári barsha qazaqtyń mereıin tasytty, – dedi prezıdent.

Qasym-Jomart Toqaev qazaq sportynyń jańa beleske kóterilip kele jatqanyn atap ótti.

Shahmatshy Bıbisara Asaýbaeva blıten álem chempıony atandy. Tennısshi Elena Rybakına bedeldi týrnırlerde qatarynan birneshe ret top jardy. Balýandarymyz, onyń ishinde qyzdarymyz da bar, Azııa chempıonatynda 7 altyn medal aldy. Nurǵısa Ádiletuly aýyr atletıkadan Azııa chempıony boldy. Fýtbolshylarymyz, hokkeıshilerimiz jaqsy nátıje kórsetip júr. Árıne, sportta jeńis te, jeńilis te bolady. Degenmen sportshylarymyz bıik belesti baǵyndyryp keledi. Buǵan bapkerler men basqa da sport mamandarynyń zor eńbek sińirgeni anyq. Barshańyzǵa shynaıy rızashylyǵymdy bildiremin, – dedi ol.

Prezıdent elimizde sport salasyn damytýǵa aıryqsha mán beriletinin, jastardyń jappaı sportpen aınalysýyna qajet jaǵdaı jasalatynyn jetkizdi.

Memleket basshysy sportshylarǵa sáttilik tilep, aldaǵy baıraqty básekelerde el namysyn laıyqty qorǵaıtynyna senim bildirdi.

Sondaı-aq Qasym-Jomart Toqaev Qazaqstan boks federaııasynyń basshylyǵyna, sportshylar men bapkerlerge prezıdenttiń alǵys hattary men qurmet gramotalaryn tabystady.

Dáýren ERBOLAT,

ASTANA