قايراعى مىقتى قايراتتى جاستار

ەل سپورتىنىڭ ەرتەڭى جالىندى جاستارىمىزعا تىكەلەي بايلانىستى. سپورت مەكتەپتەرىندە شىنىققان جاس بۋىندى قازاق ەلىنىڭ الەمدىك جارىستارىندا تۋىن جىقپاي تۇعىردان كورسەتەتىن جارىق جۇلدىزدارى دەپ سەنىممەن ايتا الامىز.

بۇگىنگى تاڭدا قازاقستاننىڭ ءار ايماعىندا بالالار مەن جاسوسپىرىمدەردىڭ، وليمپيادالىق ورتالىقتاردىڭ قاتارى كوبەيە تۇسكەنىنە قۋانۋىمىز كەرەك. ويتكەنى، اۋىل سپورتىنان قاناتتارى قاتايعان تالانتتار كاسىبي جولداعى جەڭىستى جولدارىن جالعاستىرۋ ءۇشىن ارنايى مەكتەپ-ينتەرناتتارعا كەلىپ ءتۇسىپ جاتتىعۋىنىڭ ورنى بولەك.

ءيا، قازىر اۋىل-ايماقتاردا دا سپورت مەكتەپتەرى كوپتەپ بوي كوتەرىپ كەلەدى. ول ارينە، ەل پرەزيدەنتىنىڭ  سپورت سالاسىنا ۇلكەن قولداۋ كورسەتكەنىنىڭ ناتيەجەسى دەپ بىلەمىز. دەگەنمەندە وقۋ-جاتتىعۋ باعىتىندا كاسىبي دەڭگەيدە ءدارىس الۋدىڭ ماڭىزى جاس ورەن ءۇشىن وتە زور. قاتارىنان وزا شاپقان، ورتاسىندا العىر دا الىمدى تالانتتار تاسادا قالماۋ ءۇشىن نەعۇرلىم جوعارى دەڭگەيدە ساباق بەرەتىن وليمپيادالىق مەكتەپ-ينتەرناتتارعا جولى بولىپ ءتۇسىپ جاتسا نۇر ۇستىنە نۇر بولماق.

الەمدىك جارىستاردا توپ جارىپ ەل نامىسىن ابىرويمەن قورعاپ جۇرگەن كوپتەگەن سپورت مەكتەپتەرىنىڭ تالانتتارى بار. سولاردىڭ ىشىندە بۇگىنگى كۇنى سپورتتىڭ ءار تۇرىنەن ۇلكەن جەتىستىكتەرگە جەتىپ جۇرگەن الماتىداعى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ دارىندى ۇل –قىزدارىنىڭ  كورسەتكەن ونەرلەرىنە، جەتكەن جەتىستىكتەرىنە تاڭداي قاعىپ قۋانۋعا بولادى.

ارينە، قازاق «دۇرىس قاناتتانعان ءتۇزۋ ۇشار»، دەگەن. وسى مەكتەپتەگى دارىندى جاستاردىڭ  قالاعان سپورت تۇرىنەن ۇلكەن بيىككە  شىعۋى ءۇشىن بار جاعداي تۋعىزىلىپ وتىرعاندىعىن ەسكەرمەسە بولمايدى. مەكتەپ ديرەكتورى، بىلىكتى باسشى ءوز ءىسىنىڭ بىلگىر مامانى ەرنار تالاسبەك ۇلىنىڭ قولداۋ، قامقورلىعىنىڭ شاپاعاتىنا بولەنگەن دارىندى جاس تالانتتار تولاعاي تابىستارمەن قۋانتىپ كەلەدى. ايتالىق، 28-29 ءساۋىر ارالىعىندا افينادا (گرەكيا) Athens Trاck Grand Prix 2023 ترەكتەن حالىقارالىق ۆەلوسپورت جارىسى بولىپ وتكەن ەدى.

بۇل جارىسقا قازاقستاننىڭ اتىنان قاتىسىپ، ەل نامىسىن قورعاعان سپورت مەكتەپ-ينتەرنات-كوللەدجدىڭ ۆەلوسپورتشىلارى قويىنى قونىشىن الىپ، كۇمىس جۇلدەگە تولتىرىپ ەلگە ورالدى. ءدۇبىرلى سىندا ساڭلاقتارىمىز بار جيىنتىعى 5 مەدال جەڭىپ الدى. مىسالى، سيلىقبەك اسلان جاسوسپىرىمدەر اراسىندا توپتىق جارىستا چەمپيون اتانسا، سكرەتچ سايىسىندا: سيلىقبەك اسلان كۇمىس مەدال، بەلۋگين ۆاديم  قولا جۇلدە السا، ومنيۋم جاتتىعۋىندا سيلىقبەك اسلان كۇمىس مەدال، ۆاديم بەلۋگين  قولا جۇلدەگە  يە بولدى.

ارينە، ايتۋلى مەكتەپتەگى ۆەلوسپورت بولىمىندەگى جاتتىقتىرۋشىلاردىڭ قوسقان ۇلەسى، ەڭبەگى زور ەكەنىن ەسكەرگەن  جون. سونىمەن قاتار، جەڭىستىڭ جولدى جالعاستىرعان اسامبەك نۇراسىل تۇركيانىڭ ستامبۋل قالاسىندا  وتكەن «چەمپيون» اتتى حالىقارالىق تۋرنيرگە قاتىسىپ،  التىن جۇلدەنى جەڭىپ السا، ءىزىن الا ەركىن كۇرەستەن ازيا چەمپيونى اتانعان.

مامىر ايىنىڭ 2-7 ارالىعىندا الماتىدا تاەكۆوندودان جاستار مەن جاسوسپىرىمدەر اراسىندا وتكەن قازاقستان چەمپيوناتىندا  ءۇش سالماق بويىنشا الىبەك نۇرعازى، ءىلياس مارۋپوۆ پەن نۇراسىل قۋاندىق چەمپيون اتانىپ، بەيرۋت قالاسىندا وتەتىن ازيا چەمپيوناتىندا ەل نامىسىن قورعايتىنىن ايتا كەتسەك بولار.

ءساۋىر ايىنىڭ 29-30 ارالىعىندا گرۋزيانىڭ گوري قالاسىندا دزيۋدو كۇرەسىنەن كادەتتەر اراسىندا ەۋروپا كۋبوگى بولىپ وتكەن ەدى. سول الامان جارىستا 16 ەلدەن قاتىسقان 300-دەن استام بالۋاننىڭ اراسىنان كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ جاس بالۋاندارى 1 التىن، 1 كۇمىس، 3 قولا مەدالدى جەڭىپ الدى.

جەڭىستىڭ باس تۇعىرىندا 81 كگ سالماقتا بالعاباي دوسبول  التىن القانى موينىنا تاقسا،73 كگ سالماقتا ەدىل ەربول ۇلى كۇمىس جۇلدەگە يە بولدى. ال، جۇلدەلى قولا مەدالداردى 60 كەلىدە  نۇرگەلدى قانات، 70 كەلىدە انيسا يباتوللا، 90 كەلىدەن اسا سالماقتا  شىڭعىس ەرجان ۇلى جەڭىپ الدى.  سونىمەن بىرگە، ۆەنگريادا سينحروندى جۇزۋدەن وتكەن حالىقارالىق جارىستا اتالعان مەكتەپ-ينتەرناتتىڭ قىزدارى جۇلدەلى ءۇشىنشى ورىندى جەڭىپ الىپ ورالعان ەكەن.

مىنە، وسىنداي ەۋروپانىڭ جارىس الاڭدارىندا  قانجىعالارى مايلانعان بالۋاندارىمىز مەكتەپتىڭ عانا ەمەس ەلىمىزدىڭ ماقتانىشتارىنا اينالۋدا.

وسىلاي مەكتەپتىڭ تالانتتى سپورتشىلارى قۋانىشتى ەسەلەي تۇسىرگەنىن كورەمىز. ەندى وسىنداي بەرەكەلى ۇجىمدى ايرانداي ۇيىتىپ، تولىمدى تابىستارعا جەتكىزۋ ءۇشىن قولىنان كەلگەن مۇمكىندىكتەردى جاساپ جاتقان ايتۋلى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ ديرەكتورى ەرنار تالاسبەك ۇلىمەن جولىعىپ ءبىرشاما سۇراققا جاۋاپ العان ەدىك.

-ەرنار تالسبەك ۇلى، دەنى ساۋ ادام-تابيعاتتىڭ ەڭ قىمبات جەمىسى دەمەكشى، دەنساۋلىعى مىقتى جاس تالانتتاردى تاربيەلىپ شىعارىپ جاتقان ءسىزدىڭ مەكتەپ-ينتەرنات ەلدەگى كوشباسشى وقۋ-سپورت شاڭىراعىنىڭ ءبىرى بولىپ سانالادى. ءجاسوسپىرىم تالانتتارعا وسى مەكتەپ-ينتەرناتتا بار جاعداي جاسالعان دەپ ايتۋعا بولا ما؟

-بىرىنشىدەن، كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدج مادەنيەت جانە سپورت مينيسترىلىگىنە تىكەلەي قارايدى. جىل سايىن قاراسىتىرىلىپ قويعان قورعا قاتىستى وسى مەكتەپتەگى بالالاردىڭ كۇندەلىكتى ءجۇرىپ-تۇرۋى، اس-ءدامى، جاتار جايى تۇگەلدەي مينيسترلىكتىڭ ءبولىپ وتىرعان قاراجاتىنىڭ ەسەبىندە.

بالالار كۇندەلىكتى بەس مەزگىل اۋقاتتانىپ، وسى مەكتەپ-ينتەرناتتىڭ جاتاحاناسىندا تۇرىپ ءومىر سۇرەدى. ءبىزدىڭ مەكتەپتە بالالار سپورتتىڭ 17 تۇرىمەن اينالاسادى. بار جاعداي تولىقتاي جاسالعاندىقتان ءجاسوپىرىم سپورتشىلار وسى مەكتەپ –ينتەرناتتا ورنالاسقان مەكتەپتىڭ تابالدىرىعىن اتتاپ،  ءبىلىم الىپ، سودان كەيىن سپورت زالدارعا بارىپ، قالاعان سپورتپەن شۇعىلدانادى. مەنىڭشە، بار جاعداي قاراستىرىلعان دەپ تولىقتاي ايتۋعا نەگىز بار.

 -تاريحي ءومىرجولى بار كاركەن احمەتوۆ مەكتەبىنە دارىندى بالالار قالاي ساراپتالىپ الىنادى؟ ولاردىڭ وقۋعا ءتۇسۋ ءۇشىن قانداي تالاپتار قويىلادى؟

— ءبىرىنشى ماسەلە، باپكەرلەر ءار سپورت ءتۇرى بويىنشا ەلىمىزدىڭ تۇپكىر-تۇپكىرىنەن كەلگەن دارىندى جاس بالالاردى ەلەكتەن وتكىزىپ تاڭداپ الادى. جىل سايىن تامىز ايىنىڭ باسىندا ءداستۇرلى فورماتتا ەمتيحان باستالادى. سول ەمتيحاننان سۇرىنبەي وتكەن ساڭلاقتاردى سايتقا سالىپ جاريالايمىز.تالاپكەرگە قويىلار نەگىزگى تالاپتىڭ ءبىرى — ول ءاربىر جاس ورەن ءوزى قالاعان سپورت تۇرىنەن تۋعان وڭىرىندە توپ جارىپ، كەم دەگەندە قازاقستان چەمپيوناتىنىڭ ۇشتىگىنە كىرۋى كەرەك. نە بولماسا حالىقارالىق جارىستاردا جۇلدەلى ورىنداردان كورىنگەن بولسا، ءتىپتى جاقسى. وقۋعا تۇسۋگە كەلگەن ىنتالى جاستىڭ فيزيكالىق تۇرعىدا مىندەتتەلگەن نورماتيۆتەردى ورىنداۋى شارتتى. سونىمەن قاتار، باپكەرلەر كەيبىر رەسپۋبليكالىق جارىستاردا كوزگە تۇسكەن تالانتتى جاستاردى وزدەرى شاقىرۋى ابدەن مۇمكىن. ولار ءۇشىن ەمتيحانسىز الۋعا مۇمكىندىك بار ەكەنىن دە ايتا كەتۋگە بولادى. ال، ەندى ەكىنشى ماسەلە اۋىل، اۋدانداردا جەڭىمپاز بولىپ جۇرگەن تالاپتى بالالار دا كەلەدى. ولار ەمتيحادا باعىن سىنايدى. ەگەر دە مامانداردىڭ كوزىنە ءتۇسىپ، جاقسى ناتيجە كورسەتكەندەرى بولسا وزىمىزدە الىپ قالۋعا تىرىسامىز. ايتالىق، كۇرەس تۇرىنەن وتەتىن ەمتيحانعا مەملەكەتتىك باپكەرلەر مەن قوسا ءوزىمىزدىڭ بىلىكتى ماماندارىمىز كوميسسيا القاسىنا كىرىپ قاراپ سارالايدى. ءسويتىپ، «جۇزدەن جۇيرىك، مىڭنان تۇلپار»، دەمەكشى، ورتاسىنان وزىپ شىققان دارىندى جاستار قابىلدانىپ، قىركۇيەك ايىندا ساباقتارىن باستايدى.

-قاراپ وتىرساق، مەكتەپ-ينتەرناتتا وقيتىن جاستاردىڭ سپورتتىڭ ءار تۇرىنەن الەمدىك، ازيالىق جارىستاردا ۇلكەن جەتىستىكتەرگە جەتكەندەرىن كورىپ وتىرمىز. سونىڭ اراسىندا سوڭعى كەزدەرى اۋىز تولتىرىپ ايتارلىقتاي ەلىمىزدىڭ اتىن شىعارعان مەكتەپتىڭ دارىندى جاستارىنىڭ اتاي كەتەسىز بە؟

— ءبىزدىڭ مەكتەپتە ۇستازداردىڭ، باپكەرلەردىڭ ايلىق جالاقىسى ولاردىڭ ەڭبەگىنىڭ كورسەتكەن جەمىسىندەگى پايىزى ارقىلى كوتەرىلىپ وتىرادى. بالانىڭ جەتكەن جەتىستىگى ارقىلى پايىزى كوتەرىلە تۇسەدى. مىسالى، وزگە مەكتەپ-ينتەرنات كوللەدجدەر 280 پايىزبەن بەكىتسە، ءبىز رەسپۋبليكا بويىنشا بيىل 615 پايىزبەن بەكىتتىك. ايىرماشىلىعىن قاراپ وتىرساڭىز، قانداي بيىك كورسەتكىشكە قول جەتكىزدىك دەپ ايتۋعا بولادى. جاقىندا عانا بالۋان شولاق سپورت سارايىندا وتكەن ازيا جارىسىندا ءبىزدىڭ مەكتەپتىڭ ەكى بىردەي بالۋانى ازيا چەمپيونى اتاندى. ال، جىلدىڭ اياعىنا بوگدان لۋكين دەگەن وقۋشىمىز سەمسەرلەسۋدەن الەم چەمپيونى اتانىپ، ەلىمىزدى الەمگە تانىتتى. سونىڭ ىشىندە قانشاما ورەندەرىمىز سپورت شەبەرى اتانىپ، قانشاما  قازاقستان مەن حالىقارالىق جارىستاردى، كوپتەگەن ءدۇبىرلى تۋرنيرلەردى جەڭىپ العان سپورتشىلارىمىز بار. ونىڭ ءبارىن ايتىپ تاۋىسا المايمىز.

ءبىر مىسال، 2022 جىلى قىركۇيەك ايىندا عانا وسى مەكتەپ-ينتەرناتتىڭ قابىرعاسىندا تاەكۆوندو سپورتى  اشىلعان بولاتىن. بۇگىن سونىڭ جەمىسىن كورىپ وتىرمىز. ايتالىق، جاقىندا تولەگەن تىلەۋمۇراتوۆ ەسىمدى باپكەردىڭ ءۇش بىردەي  شاكىرتى قازاقستان چەمپيوناتىندا چەمپيون بولىپ قۋانتىپ وتىر. سونىمەن قاتار، بوكستان دا تۇساۋ ەندى عانا كەسىلگەن بوكس زالىنان ءۇش بىردەي جاس بىلعارى قولعاپ شەبەرى ەل بىرىنشىلىگىندە جەڭىمپاز بولدى. ەركىن كۇرەس تۇرىنەن دە ازيا چەمپيونى اتانىپ قانا قويماي، ەكى بىردەي بوتا بالۋان قازاقستان چەمپيونى اتاندى. قورىتا ايتسام، بيىل بارلىق سپورت تۇرىنەن وقۋشى سپورتشىلارىمىز تاماشا كورسەتكىشتەرگە جەتتى. «ەڭبەك بارىندە جەڭبەك»، دەگەن عوي. ىنتىماعى ۇيىعان ۇجىممەن، بىلىكتى باپكەر، ۇستاز مامانداردىڭ تاباندى ەڭبەگىنىڭ ناتيجەسىندە بالالار جاقسى ناتيجەلەرگە جەتتى دەگەن ويدامىن.

-سپورتپەن بىرگە ءبىلىمدى دە قاتار الىپ جۇرگەن ۇلاندار بولعان سوڭ، ءبىلىم باعىتىنداعى جەتىستىكتەردە مەكتەپ وقۋشىلارىنىڭ اياق الىسى قالاي؟

— «بىلىمدىدەن ءسوز تىڭداساڭ، كۇش تاسىر.ۇيرەنگەندى جەلگە ۇشىرماي ىسكە اسىر»، دەگەن ەكەن ماحمۇد قاشعاري.

بالانىڭ بىلىمدە وزىق ويلى، زەردەلى بولىپ ءوسۋى قاراڭعى تۇندە قولىنا جارىق الىپ شىققانداي بولار. وقۋىنا ۇقىپتى، بىلىمگە قۇشتار بالادان مىقتى سپورتشى شىعادى دەپ وياليمىن. ويتكەنى، سپورت اقىلمەن ويلاپ، جيناعان شەبەرلىكپەن ءتۇيىنىن شەشەتىن ۇلكەن ونەر.  سوندىقتاندا بالا تاربيەسىنە، ولاردىڭ بىلىمىنە ەرەكشە نازار اۋدارىپ، قاداعالايمىز. ءيا، قالالىق، رەسپۋبليكالىق دەڭگەيدە ءبىلىم سالاسىندا ءتۇرلى وليمپيادالارعا ءبىزدىڭ مەكتەپتىڭ وقۋشالارى دا قاتىسىپ جۇلدەلى ورىننان كورىن ءجۇر. مىسالى، جىل سايىن رەسپۋبليكالىق مەكتەپ-ينتەرناتتار اراسىندا جالاۋى كوتەرىلەتىن ءبىلىم جارىستارىندا ءبىزدىڭ كاركەن احمەتوۆ اتىنداعى مەكتەپ-ينتەرناتتىڭ دارىندى جاس ۇلاندارى ۇلكەن ناتيجەلەر كورسەتىپ، 1-2 ورىنداردى بەرمەي كەلەدى.  سونىمەن قاتار جۋىردا عانا بىرىككەن اراب امىرلىگى دۋبايدا ءوتىپ جاتقان  ۇلكەن ءبىلىم سايىسىنا دا ءبىزدىڭ ۇستازدارىمىز قاتىسىپ جاتىر. ەندەشە، ءبىلىم سالاسىندا كوشتىڭ الدىنا شىعۋعا تىرىسا وتىرىپ، ۇلكەن جۇمىستار اتقارىلىپ جاتىر.

-ايتۋلى مەكتەپتىڭ  العا قويعان ماقساتتارىنان ءسوز ەتسەڭىز؟

-ءبىزدىڭ مەكتەپتە جاستار مەن جاسوپىرىمدەر جاتىعىپ شىڭدالادى. وسى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجدىڭ  قابىرعاسىنان كوپتەگەن وليمپيادا، الەم، ازيا جارىستارىندا جەڭىسكە جەتىپ، قازاق ەلىنىڭ ماقتانىشىنا اينالعان جۇلدىزى جارىق سپورتشىلار شىققان بەلگىلى. ولاردىڭ اراسىندا ەلدوس سمەتوۆ، اسحات جىتكەەۆ سىندى ايتۋلى سپورت ساڭلاقتارىن ايتسا جەتىپ جاتىر. سودان كەيىن تاعى ءبىر ايتا كەتەر ماسەلە، الەم بويىنشا ءبىزدىڭ مەكتەپ –ينتەرنات  تۇڭعىش رەت وسىنداي اتاۋ العان مەكتەپ-ينتەرنات بولىپ سانالادى. ونىڭ انىق قانىعىن بەلگىلى سپورت قايارتكەرى، كوپتەگەن سپورت سالاسىنداعى عىلىمي مەتوديكالىق كىتاپتاردىڭ اۆتورى ءاناتولى قاجىكەن ۇلى قۇلنازاروۆ دەگەن اعامىز زەرتتەپ وسىنداي شەشىمگە كەلگەن ەكەن.

ءبىزدىڭ مەكتەپ-ينتەرنات سوناۋ 1960 جىلدارى وسىنداي ستاتۋس العاننان كەيىن بارىپ، كورشىلەس رەسەي مەملەكەتى مەكتەپتىڭ انالوگىن الىپ كەتىپ، وزدەرىندە اشا باستاعان ەكەن. ەندى ايتا كەتسەك وسى مەكتەپتە وقيتىن جاسوپىرىمدەر 7-11 سىنىپ ارالاعىندا مەكتەپ-ينتەرناتتا ءبىلىم مەن سپورتتى قاتار الا ءجۇرىپ ءدارىس الادى. سوسىن 11 سىنىپتان كەيىن جاقسى جەتىستىكتەرگە جەتكەندەرى ىرىكتەلىنىپ الىنىپ ءۇش جىلدىق كوللەدجدە وقۋىن جالعاستىرادى. ال، كوللەدجدە ۇزدىكتەردىڭ قاتارىنان كورىنگەندەر ۇلتتىق قۇراماعا كىرىپ ەل نامىسىن بايراقتى جارىستاردا قورعايتىن بولادى. ماقساتىمىز بىرەۋ عانا، الدىڭعى تولقىن اتتارى ايگىلى اعالارى سەكىلدى قازاقستاننىڭ اتىن الەمدىك دودالاردا ابىرويمەن قورعاۋ ءۇشىن بارىنشا ءتالىم-تاربيەنى بەرۋ. سول ءۇشىن قولدان كەلگىن مۇمكىندىكتەردى اياماۋعا ارقاشان دايىنبىز.

كەز-كەلگەن مەملەكەتتىڭ جارقىن بولاشاعى جاستاردىڭ بولمىسى مەن ساناسىنا، مادەني دامۋىنا، ءبىلىم مەن تاجىربيە دەڭگەيىنە بايلانىستى ەكەنى بارشامىزعا ءمالىم.

ءيا، قازاقستانداعى ەل سپورتىنىڭ ەرتەڭى دارىندى ءوسىپ كەلە جاتقان جاس ۇرپاققا تىكەلەي بايلانىستى. وسى باعىتتا جاس بۋىننىڭ بويىنداعى تالانتىن اشاتىن بىلىكتى دە ءبىلىمدى باپكەرلەردىڭ ەڭبەگى ەرەن. تاربيە مەكتەپ قابىرعاسىنان باستالادى. ەندەشە، كوپ ىشىنەن وزا شىققان تالاپتى دا تالانتتى جاستاردى تاربيەلەپ، الامان جارىستارعا قوسىپ جاتقان ايتۋلى  كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجدىڭ ۇجىمىنا تابىس تىلەيمىز. وسىنداي جەمىسىن ۇزبەي بەرىپ وتىراتىن ماۋەلى جەمىس اعاش سەكىلدى مەكتەپ-ينتەرناتتاردىڭ تولاعاي تابىستارىن كورگەندە قىزىعا دا قۋانا قارايمىز.تىلەككە ەڭبەك تىرەك بولعانىن قالار ەدىك.

 

اقىن ورداباي ۇلى،

الماتى