«رەالدان» تاعى ءبىر «التىن دوپ» يەگەرى كەتىپ جاتىر

 ءمادريدتىڭ «رەال» كلۋبىنان تاعى ءبىر «التىن دوپ» يەگەرى كەتىپ جاتىر دەگەن حابار كەلىپ جەتتى.  

Sport24-ءتىڭ حابارلاۋىنشا، حورۆاتيا ۇلتتىق قۇراماسىنىڭ جارتىلاي قورعاۋشىسى، 2018 جىلعى الەمنىڭ ۇزدىك فۋتبولشىسىنا بەرىلگەن «التىن دوپ» سىيلىعىنىڭ يەگەرى لۋكا مودريچ مادريدتىك كلۋبتان كەتەدى.

ول ساۋد ارابياسى كلۋبىمەن كەلىسىمشارتقا وتىرادى. كەلىسىم ءۇش جىلعا جاسالادى. بىراق ءمودريچتىڭ بولاشاقتا قاي كلۋبتا وينايتىنى ازىرگە ايتىلعان جوق.

لۋكا مودريچ «رەال» كلۋبىندا 2012 جىلدان بەرى ونەر كورسەتىپ كەلەدى. ونىڭ كوماندامەن كەلىسىمشارتى 2023 جىلدىڭ 30 ماۋسىمىنا دەيىن جاسالعان. ول وسى ماۋسىمدا لا ليگادا 33 ويىنعا قاتىسىپ، 4 گول سالىپ، 3 ناتيجەلى پاس بەرگەن.

بۇعان دەيىن ءمودريچتى ساۋد ارابياسىنىڭ «ءال-ناسر» كلۋبى شاقىرعان بولاتىن. قازىر ونىڭ جاسى 37-دە. سوعان قاراماستان فۋتبولشى حورۆاتيا ۇلتتىق قۇراماسىنان شاقىرتۋ الىپ، كەلەسى جىلى وتەتىن ەۋروپا چەمپيوناتىنا قاتىسقىسى كەلەدى.

مودريچ ەكى رەت الەم چەمپيوناتىنىڭ جۇلدەگەرى اتانعان. 2018 جىلى رەسەيدە وتكەن الەمدىك دودانىڭ كۇمىس مەداليسى بولسا، بىلتىر كاتاردا جالاۋى جەلبىرەگەن مۋنديالدىڭ قولا جۇلدەسىن جەڭىپ العان.

6 ماۋسىمدا «رەال» كلۋبىنان كاريم بەنزەما كەتتى. ول ساۋد ارابياسىنىڭ «ءال-يتتيحاد» كومانداسىمەن ەكى جىلعا كەلىسىمشارتقا وتىردى. كەلىسىمشارت بويىنشا اراب تۇبەگىنىڭ جاساعى فۋتبولشىعا ەكى جىلدا 200 ملن ەۋرو ساناپ بەرەدى.

داستان كەنجالين،

استانا