Теннис: Әмір Омарханов — ITF Juniors J60 турнирінің жеңімпазы!

Теннисші Әмір Омарханов Грузияның астанасы – Тбилиси қаласында 18 жасқа дейінгілер арасында өткен ITF Juniors J60 турнирінің абсолютті жеңімпазы атанды.

Бұл туралы Қазақстан теннис федерациясы хабарлады.

15 жастағы теннисші — Қарағанды теннис мектебінің түлегі. Қазір ол Чехияда жаттығып жүр. Грузиядағы турнирде ол жекелей және жұптық сында үздік атанды.

Әмір жекелей сында әзербайжандық Канан Гасимовты 6:1, 6:3 есебімен ұтты. Ол финалға дейін де қарсыластарына бірде-бір сетті берген жоқ. Ал жұптық бәсекеде болгариялық Иван Найденовпен бірге отандастары Ілияс Маратұлы мен Виталий Зацепинді 6:3, 6:4 есебімен жеңді.

Осылайша, Әмір Омарханов ITF Juniors додасында бесінші титулы жеңіп алды. Оның екеуі – жекелей сында.

Тбилисидегі жеңісінен кейін  ол жасөспірімдердің әлемдік рейтингінде 298-орынға көтерілді.

ФОТО: Қазақстан теннис федерациясы