تەننيس: ءامىر ومارحانوۆ — ITF Juniors J60 ءتۋرنيرىنىڭ جەڭىمپازى!

تەننيسشى ءامىر ومارحانوۆ گرۋزيانىڭ استاناسى – تبيليسي قالاسىندا 18 جاسقا دەيىنگىلەر اراسىندا وتكەن ITF Juniors J60 ءتۋرنيرىنىڭ ءابسوليۋتتى جەڭىمپازى اتاندى.

بۇل تۋرالى قازاقستان تەننيس فەدەراتسياسى حابارلادى.

15 جاستاعى تەننيسشى — قاراعاندى تەننيس مەكتەبىنىڭ تۇلەگى. قازىر ول چەحيادا جاتتىعىپ ءجۇر. گرۋزياداعى تۋرنيردە ول جەكەلەي جانە جۇپتىق سىندا ۇزدىك اتاندى.

ءامىر جەكەلەي سىندا ازەربايجاندىق كانان گاسيموۆتى 6:1، 6:3 ەسەبىمەن ۇتتى. ول فينالعا دەيىن دە قارسىلاستارىنا بىردە-ءبىر سەتتى بەرگەن جوق. ال جۇپتىق باسەكەدە بولگاريالىق يۆان نايدەنوۆپەن بىرگە وتانداستارى ءىلياس مارات ۇلى مەن ۆيتالي زاتسەپيندى 6:3، 6:4 ەسەبىمەن جەڭدى.

وسىلايشا، ءامىر ومارحانوۆ ITF Juniors دوداسىندا بەسىنشى تيتۋلى جەڭىپ الدى. ونىڭ ەكەۋى – جەكەلەي سىندا.

تبيليسيدەگى جەڭىسىنەن كەيىن  ول جاسوسپىرىمدەردىڭ الەمدىك رەيتينگىندە 298-ورىنعا كوتەرىلدى.

فوتو: قازاقستان تەننيس فەدەراتسياسى