«Realdan» taǵy bir «Altyn dop» ıegeri ketip jatyr

 Madrıdtiń «Real» klýbynan taǵy bir «Altyn dop» ıegeri ketip jatyr degen habar kelip jetti.  

Sport24-tiń habarlaýynsha, Horvatııa ulttyq quramasynyń jartylaı qorǵaýshysy, 2018 jylǵy álemniń úzdik fýtbolshysyna berilgen «Altyn dop» syılyǵynyń ıegeri Lýka Modrıch madrıdtik klýbtan ketedi.

Ol Saýd Arabııasy klýbymen kelisimshartqa otyrady. Kelisim úsh jylǵa jasalady. Biraq Modrıchtiń bolashaqta qaı klýbta oınaıtyny ázirge aıtylǵan joq.

Lýka Modrıch «Real» klýbynda 2012 jyldan beri óner kórsetip keledi. Onyń komandamen kelisimsharty 2023 jyldyń 30 maýsymyna deıin jasalǵan. Ol osy maýsymda La Lıgada 33 oıynǵa qatysyp, 4 gol salyp, 3 nátıjeli pas bergen.

Buǵan deıin Modrıchti Saýd Arabııasynyń «Ál-Nasr» klýby shaqyrǵan bolatyn. Qazir onyń jasy 37-de. Soǵan qaramastan fýtbolshy Horvatııa ulttyq quramasynan shaqyrtý alyp, kelesi jyly ótetin Eýropa chempıonatyna qatysqysy keledi.

Modrıch eki ret álem chempıonatynyń júldegeri atanǵan. 2018 jyly Reseıde ótken álemdik dodanyń kúmis medalısi bolsa, byltyr Katarda jalaýy jelbiregen mýndıaldyń qola júldesin jeńip alǵan.

6 maýsymda «Real» klýbynan Karım Benzema ketti. Ol Saýd Arabııasynyń «Ál-Ittıhad» komandasymen eki jylǵa kelisimshartqa otyrdy. Kelisimshart boıynsha Arab túbeginiń jasaǵy fýtbolshyǵa eki jylda 200 mln eýro sanap beredi.

Dastan KENJALIN,

ASTANA