مادەنيەت جانە سپورت مينيسترلىگىنە بىرنەشە قوسىمشا قۇزىرەت بەرىلەدى

اشىق نقا پورتالىندا «مادەنيەت جانە سپورت مينيسترلىگىنىڭ كەيبىر ماسەلەلەرى تۋرالى» ۇكىمەت قاۋلىسى تالقىعا شىعارىلدى.

قۇجاتتا اتاپ كورسەتىلگەندەي، مادەنيەت جانە سپورت مينيسترلىگىنە قوسىمشا مىنا قىزمەتتەر بەرىلەدى:

— مادەنيەت ماسەلەلەرى بويىنشا تۇراقتى جۇمىس ىستەيتىن كوميسسيا قۇرىپ، ەرەجەنى بەكىتىپ بەرەدى;

— مادەنيەت سالاسىنداعى مەملەكەتتىك ستيپەنديا بەرۋ قاعيدالارىن بەكىتەدى;

— ارحيۆ جانە كىتاپحانا ءىسى، گەرالديكا سالالارىنداعى ۇلتتىق جانە حالىقارالىق كونكۋرستار مەن فەستيۆالداردى، سىيلىقتار مەن جۇلدەلەردى تاعايىندايدى;

— حالىقارالىق  جارىستاردىڭ چەمپيوندارى مەن جۇلدەگەرلەرىنە، جاتتىقتىرۋشىلارعا جانە سپورت تۇرلەرى بويىنشا قازاقستان ۇلتتىق قۇراما كوماندالارىنىڭ مۇشەلەرىنە اقشالاي كوتەرمەلەۋدىڭ مولشەرىن بەكىتەدى;

— بيۋدجەتتىك جوسپارلاۋ جونىندەگى ۋاكىلەتتى ورگانمەن كەلىسۋ بويىنشا ەل اۋماعىندا بولاتىن رەسپۋبليكالىق، وبلىستىق جانە حالىقارالىق سپورتتىق جارىستارىن مەدالدارمەن قامتاماسىز ەتۋ نورمالارىن بەكىتەدى;

— رەسپۋبليكالىق ونوماستيكالىق كوميسسيا قۇرادى;

— كينەموتوگرافيا سالاسىنداعى مەملەكەتتىك قولداۋ ماسەلەلەرى جونىندەگى ۆەدومستۆوارالىق كوميسسيا جاساقتايدى;

— تۋريستىك قىزمەت سالاسىنداعى عىلىمي قامتاماسىز ەتۋدىڭ مەملەكەتتىك جۇيەسىن قۇرادى;

— لوتەرەيا وپەراتورىن جانە وعان لوتورەيا وتكىزۋ قۇقىعىن بەرۋ مەرزىمىن ايقىندايدى.

ۇكىمەت قاۋلىسى 20 ماۋسىمعا دەيىن كوپشىلىك تالقىلاۋدا بولادى. وسىدان كەيىن قول قويۋ ءۇشىن پرەمەر-مينيسترگە جولدانادى.

داستان كەنجالين،

استانا