قازاق ەلىنە جەڭىس سىيلاۋ ءبىز ءۇشىن مارتەبە – ۇلتتىق قۇرامانىڭ ويىنشىلارى (ۆيدەو)

بۇگىن تۇندە بەلفاست قالاسىندا 2024 جىلى وتەتىن ەۋروپا چەمپيوناتىنىڭ ءتۋرنيرىنىڭ ىرىكتەۋ ماتچىندا فۋتبولدان قازاقستان قۇراماسى سولتۇستىك يرلانديا قۇراماسىن 1:0 ەسەبىمەن ۇتىپ، ن توبىنداعى تۋرنير كەستەسىندە ەكىنشى ورىنعا شىقتى.

ويىننىڭ 87-مينۋتىندا الاڭعا شىققانىنا كوپ ۋاقىت بولا قويماعان شابۋىلشى ابات ايىمبەتوۆ ۇلتتىق قۇراما ساپىنداعى سەگىزىنشى گولىن سالىپ، قازاقستان قۇراماسى جەڭىس سىيلادى. ول وسىمەن بيىلعى ماتچتاردا ۇلتتىق قۇراماعا ەكىنشى رەت جەڭىس گولىن سالىپ وتىر. وسىنىڭ الدىندا «استانا ارەنا» ستاديونىندا ەلىمىزدىڭ باس كومانداسى دانيا قۇراماسىن 3:2 ەسەبىمەن ۇتقاندا جەڭىس گولىن اكەلگەن وسى ابات ايىمبەتوۆ بولاتىن.

ۇلتتىق قۇراما دانيامەن ويىنداعىداي وسى ماتچتا دا جاقسى ونەر كورسەتتى. ونى ماتچتان كەيىن بولعان ءباسپاسوز ءماسليحاتىندا سولتۇستىك يرلانديا كومانداسىنىڭ باس جاتتىقتىرۋشىسى مايكل و’نيل دە مويىندادى.

ويىننىڭ ءبىرىنشى تايمىندا فۋتبولشىلارىمىز جاسىل الاڭعا قۇلشىنىپ شىقتى. ولاردان ءبىر قوبالجۋ، وزدەرىنە دەگەن سەنىمسىزدىك بايقالمادى. ونى ماتچ كەزىندە دە كورمەدىك. كەرىسىنشە، فۋتبولشىلار باس جاتتىقتىرۋشىنىڭ جوسپارىن تولىعىمەن، ءتىپتى ارتىعىمەن ورىنداپ شىقتى دەۋگە بولادى. بۇل تۋرالى باس باپكەر ماگومەد اديەۆ پەن ويىنشىلاردىڭ وزدەرى ماتچتان كەيىن ايتتى.

بۇل جەردە (كيىم اۋىستىرۋ بولمەسى، — رەد.) ەشتەڭە ايتپاي-اق قويۋعا بولاتىن ەدى.  بارى دە تۇسىنىكتى. ءبارى دە ءبىزدىڭ ويىندى قارادى. ءبىز ويىنىمىزدى الاڭدا عانا كورسەتەمىز. بۇگىن سىزدەر سونى كورسەتتىڭىزدەر.

ەر ادام كوپ سويلەمەيدى، سول سياقتى ۇلتتىق قۇرامانىڭ جەيدەسىن كيگەن فۋتبولشى بوس سويلەمەيدى دەپ ويلايمىن. سىزدەر سونى، تاعى دا قايتالاپ ايتامىن، تاعى ءبىر رەت كورسەتە الدىڭىزدار. جالپى، ۇلكەن جەتىستىك ەشقاشان وڭاي كەلمەيدى. وعان جەتۋ ءۇشىن كوپ ەڭبەكتەنۋ كەرەك، كوپ جۇمىس ىستەۋ كەرەك. مەن سىزدەردىڭ اياقتارىڭىزعا قاراسام تىزەلەرىڭىز قان-جوسا. جەڭىس وسىلاي عانا كەلەدى. ال ءبىز بيىككە ۇمتىلىپ جاتىرمىز. وسىلاي عانا جەڭىستى قاي جەردە بولسا دا ج ۇلىپ الامىز. جىگىتتەر، ءبىزدىڭ كوماندادا مىنەز بار. مىنەز بولسا ءبارى بولادى. سونى سىزدەر بۇگىن تاعى دا كورسەتتىڭىزدەر، –  دەدى اديەۆ.

بۇگىنگى ويىننىڭ قاھارمانى –  اباي ايىمبەتوۆ تە ماتچقا قاتىستى پىكىر ءبىلدىردى. ول سولتۇستىك يرلانديا قۇراماسىن سىرت الاڭدا جەڭىپ، ەلىمىزگە جاقسى كوڭىل-كۇي سىيلاعانىن، سوڭعى مينۋتتا جەڭىس گولىن سالعانىنا وتە قۋانىشتى ەكەنىن ايتتى.

قازاق ەلىنە جاقسى ەموتسيا سىيلادىق دەپ ويلايمىن. جەڭىس قۇتتى بولسىن! سوڭعى مينۋتتا جەڭىس اكەلگەنىمە وتە قۋانىشتىمىن!

ويىندى ايتسام، ماتچ وتە قيىن بولدى. بۇل –  جالعىز مەنىڭ ەڭبەگىم ەمەس، بۇكىل قۇرامانىڭ ەڭبەگى. ءبىزدىڭ كوماندا ءبىر وتباسىعا اينالىپ كەتتى. قازىر مەن كوماندانى وتباسىم دەپ ايتا الامىن. بۇل مەنىڭ ارتىق ايتقاندىعىم ەمەس. ءبىز وتە قيىن ويىن بولاتىنىن بىلدىك. سوندىقتان سىرت الاڭنان ءۇش ۇپاي الىپ كەتىپ جاتقانىمىزعا وتە قۋانىشتىمىن، –  دەدى ول.

شابۋىلشى سونىمەن بىرگە وسىنداي قيىن ماتچتا ۇلتتىق قۇرامانى قولداعان ميلليونداعان جانكۇيەرگە العىسىن ءبىلدىردى.

اللاعا مىڭدا ءبىر شۇكىر! بۇكىل ەلىمىزدى وسىنداي ماڭىزدى ماتچتا قولداپ، جەڭىسىمىزگە سەنىپ، سول جەڭىسىمىزدى كورگەندەرىڭىزگە قۋانىشتىمىن! سىرت الاڭداعى ءۇش ۇپاي قازاق ەلىنە كەرەمەت جەتىستىك.

گولدى ايتسام، ورتا الاڭنان دوپتى الىپ قورعاۋشىلاردى الداپ، دوپتى تورعا تۋلاتقانىما ارينە، قۋانىشىم شەكسىز. ءارتۇرلى گول بولادى. بىراق، گولدىڭ دا گولى بولادى ەكەن. ماعان ماتچتىڭ الدىندا باس جاتتىقتىرۋشى الاڭداعى مىندەتىمدى ايتتى. مەن مۇمكىندىكتى جىبەرگەن جوقپىن. گولدىڭ قايتالاۋىن ءالى كورگەن جوقپىن. كورگەننەن كەيىن ايتارمىن. ءبارى «جاقسى گول سالدىڭ»، دەپ ماقتاپ جاتىر.

قازاق ەلىنە جەڭىس اكەلۋ مەن ءۇشىن ابىروي، مارتەبە. ول ءومىر باقي ەستە قالاتىن دۇنيە بولادى. اللا قالاسا، گولدار كوبەيسە تاريحتا دا قالىپ جاتارمىز. تاريحتا قالۋ ءار فۋتبولشىنىڭ ارمانى، ماقساتى. بىراق، ءبىزدىڭ ەڭ باستى ماقساتىمىز – ەلگە ۇپاي اكەلىپ، جەڭىس سىيلاۋ، جانكۇيەرلەردى قۋانتۋ. مەن سۇرمەرگەن رەتىندە تاريحتا قالعىم كەلەدى، –  دەدى ول.

ونىڭ كوماندالاسى جارتىلاي قورعاۋشى ابزال بەيسەبەكوۆ تە ماتچتىڭ وتە قيىن بولعانىن جاسىرمادى.

ويىن وتە قيىن بولدى. وزدەرىڭىز كورگەندەي، كوبىنەسە قورعانىستا بولدىق. قارسى شابۋىلعا شىعۋعا تىرىستىق. اللانىڭ قالاۋىمەن ۇتتىق. وسى جەڭستى ءبىز بۇكىل ەلىمىزگە ارنايمىز، – دەدى فۋتبولشى.

سونداي-اق ول ويىن باستالار الدىندا ەشقانداي قوبالجۋدىڭ بولماعانىن، كوماندا 90 مينۋت بويى ءوز ويىنىن ويناعانىن ايتتى.

قوبالجۋ بولعان جوق. باس جاتتىقتىرۋشى ايتقان تاكتيكانى ۇستاندىق. قارسىلاس كوماندا العاشقى 15 مينۋتتا العا جۇگىرەدى دەگەن ويمەن وينادىق. سوسىن 15-20 مينۋتتان كەيىن اشىلىپ ويناي باستادىق. فۋتبولشىلار 100 ەمەس، 200 پايىزعا بار كۇشىن سالىپ وينادى. سونىڭ ارقاسىندا ءۇش ۇپاي الدىق. ەندى تەك العا باسامىز!، –  دەدى ابزال بەيسەبەكوۆ.

ال قۇرامانىڭ تاعى ءبىر وكىلى مارات بىستروۆ ماتچتىڭ الدىندا باس جاتتىقتىرۋشىنىڭ موتيۆاتسيالىق سوزدەر ايتقانىن، ونىڭ سوزدەرى كومانداعا كۇش-جىگەر بەرگەنىن اتاپ ءوتتى.

باس جاتتىقتىرۋشى بىزگە ويىن الدىندا كيىم اۋىستىراتىن بولمەدە جاقسى موتيۆاتسيا بەردى. ول: «بۇگىن قازاقستان حالقى ۇيقىسىن ءبولىپ، ءبىزدىڭ ويىنىمىزدى قارايدى. بۇل ماتچتى وتانداستارىمىز كوپتەن بەرى كۇتتى. سوندىقتان بۇگىن بارلىق قازاقستاندىقتارعا قۋانىش سىيلايىق» دەگەن جالىندى سوزدەرىن ايتتى.  ونىڭ وسى ءسوزى بىزگە دەم بەردى، قاناتتاندىردى. ءبىز الاڭعا قۇلشىنىپ شىقتىق.

ويىن بىتكەندە مەنىڭ ەسىمە جاتتىقتىرۋشىنىڭ وسى سوزدەرى ءتۇستى. بۇگىن مەنىڭ تۋعان كۇنىمدە كوماندامىز جەڭىسكە جەتتى. وسى كۇندى مەن ۇزاق ۋاقىت ەستە ساقتايمىن.  بىز جاقسى وينادىق. سوڭىنا دەيىن ويناپ، جەڭىسكە جەتتىك. ءبىز قورعانىپ وينامادىق. ءوزىمىزدىڭ ويىنىمىزدى وينادىق، – دەدى ول.

وسىلايشا ۇلتتىق قۇراما ءتورت ويىننان كەيىن توعىز ۇپاي جينادى. ەندى كەلەسى ويىندى قازاقستان قۇراماسى ءوز الاڭىندا 7 قىركۇيەكتە فينليانديامەن، ودان كەيىن 10 قىركۇيەكتە سولتۇستىك يرلانديامەن وتكىزەدى.

قازاقستان قۇراماسىنىڭ وسى جەڭىسىنەن كەيىن H توبىنداعى تۋرنير كەستەسى وزگەرىپ سالا بەردى. ۇلتتىق قۇراما الدىنا فينليانديا كومانداسىن سالىپ، ەكىنشى ورىنعا كوتەرىلدى. ءۇشىنشى ورىنعا  دانيا كومانداسى جايعاستى. داتتار سىرت الاڭدا سلوۆەنيا جاساعىمەن 1:1 ەسەبىمەن تەڭ ويناپ، ەكى ۇپايىنان ايىرىلىپ قالدى. ءتورتىنشى ورىنعا سلوۆەنيا، بەسىنشى جانە التىنشى ورىنعا سولتۇستىك يرلانديا مەن سان-مارينو قۇرامالارى ورنالاستى.

داستان كەنجالين،

استانا