Qazaq eline jeńis syılaý biz úshin mártebe – ulttyq quramanyń oıynshylary (VIDEO)

Búgin túnde Belfast qalasynda 2024 jyly ótetin Eýropa chempıonatynyń týrnıriniń irikteý matchynda fýtboldan Qazaqstan quramasy Soltústik Irlandııa quramasyn 1:0 esebimen utyp, N tobyndaǵy týrnır kestesinde ekinshi orynǵa shyqty.

Oıynnyń 87-mınýtynda alańǵa shyqqanyna kóp ýaqyt bola qoımaǵan shabýylshy Abat Aıymbetov ulttyq qurama sapyndaǵy segizinshi golyn salyp, Qazaqstan quramasy jeńis syılady. Ol osymen bıylǵy matchtarda ulttyq quramaǵa ekinshi ret jeńis golyn salyp otyr. Osynyń aldynda «Astana Arena» stadıonynda elimizdiń bas komandasy Danııa quramasyn 3:2 esebimen utqanda jeńis golyn ákelgen osy Abat Aıymbetov bolatyn.

Ulttyq qurama Danııamen oıyndaǵydaı osy matchta da jaqsy óner kórsetti. Ony matchtan keıin bolǵan baspasóz máslıhatynda Soltústik Irlandııa komandasynyń bas jattyqtyrýshysy Maıkl O’Nıl de moıyndady.

Oıynnyń birinshi taımynda fýtbolshylarymyz jasyl alańǵa qulshynyp shyqty. Olardan bir qobaljý, ózderine degen senimsizdik baıqalmady. Ony match kezinde de kórmedik. Kerisinshe, fýtbolshylar bas jattyqtyrýshynyń josparyn tolyǵymen, tipti artyǵymen oryndap shyqty deýge bolady. Bul týraly bas bapker Magomed Adıev pen oıynshylardyń ózderi matchtan keıin aıtty.

Bul jerde (Kıim aýystyrý bólmesi, — red.) eshteńe aıtpaı-aq qoıýǵa bolatyn edi.  Bári de túsinikti. Bári de bizdiń oıyndy qarady. Biz oıynymyzdy alańda ǵana kórsetemiz. Búgin sizder sony kórsettińizder.

Er adam kóp sóılemeıdi, sol sııaqty ulttyq quramanyń jeıdesin kıgen fýtbolshy bos sóılemeıdi dep oılaımyn. Sizder sony, taǵy da qaıtalap aıtamyn, taǵy bir ret kórsete aldyńyzdar. Jalpy, úlken jetistik eshqashan ońaı kelmeıdi. Oǵan jetý úshin kóp eńbektený kerek, kóp jumys isteý kerek. Men sizderdiń aıaqtaryńyzǵa qarasam tizelerińiz qan-josa. Jeńis osylaı ǵana keledi. Al biz bıikke umtylyp jatyrmyz. Osylaı ǵana jeńisti qaı jerde bolsa da julyp alamyz. Jigitter, bizdiń komandada minez bar. Minez bolsa bári bolady. Sony sizder búgin taǵy da kórsettińizder, –  dedi Adıev.

Búgingi oıynnyń qaharmany –  Abaı Aıymbetov te matchqa qatysty pikir bildirdi. Ol Soltústik Irlandııa quramasyn syrt alańda jeńip, elimizge jaqsy kóńil-kúı syılaǵanyn, sońǵy mınýtta jeńis golyn salǵanyna óte qýanyshty ekenin aıtty.

Qazaq eline jaqsy emoııa syıladyq dep oılaımyn. Jeńis qutty bolsyn! Sońǵy mınýtta jeńis ákelgenime óte qýanyshtymyn!

Oıyndy aıtsam, match óte qıyn boldy. Bul –  jalǵyz meniń eńbegim emes, búkil quramanyń eńbegi. Bizdiń komanda bir otbasyǵa aınalyp ketti. Qazir men komandany otbasym dep aıta alamyn. Bul meniń artyq aıtqandyǵym emes. Biz óte qıyn oıyn bolatynyn bildik. Sondyqtan syrt alańnan úsh upaı alyp ketip jatqanymyzǵa óte qýanyshtymyn, –  dedi ol.

Shabýylshy sonymen birge osyndaı qıyn matchta ulttyq quramany qoldaǵan mıllıondaǵan jankúıerge alǵysyn bildirdi.

Allaǵa myńda bir shúkir! Búkil elimizdi osyndaı mańyzdy matchta qoldap, jeńisimizge senip, sol jeńisimizdi kórgenderińizge qýanyshtymyn! Syrt alańdaǵy úsh upaı qazaq eline keremet jetistik.

Goldy aıtsam, orta alańnan dopty alyp qorǵaýshylardy aldap, dopty torǵa týlatqanyma árıne, qýanyshym sheksiz. Ártúrli gol bolady. Biraq, goldyń da goly bolady eken. Maǵan matchtyń aldynda bas jattyqtyrýshy alańdaǵy mindetimdi aıtty. Men múmkindikti jibergen joqpyn. Goldyń qaıtalaýyn áli kórgen joqpyn. Kórgennen keıin aıtarmyn. Bári «jaqsy gol saldyń», dep maqtap jatyr.

Qazaq eline jeńis ákelý men úshin abyroı, mártebe. Ol ómir baqı este qalatyn dúnıe bolady. Alla qalasa, goldar kóbeıse tarıhta da qalyp jatarmyz. Tarıhta qalý ár fýtbolshynyń armany, maqsaty. Biraq, bizdiń eń basty maqsatymyz – elge upaı ákelip, jeńis syılaý, jankúıerlerdi qýantý. Men surmergen retinde tarıhta qalǵym keledi, –  dedi ol.

Onyń komandalasy jartylaı qorǵaýshy Abzal Beısebekov te matchtyń óte qıyn bolǵanyn jasyrmady.

Oıyn óte qıyn boldy. О́zderińiz kórgendeı, kóbinese qorǵanysta boldyq. Qarsy shabýylǵa shyǵýǵa tyrystyq. Allanyń qalaýymen uttyq. Osy jeństi biz búkil elimizge arnaımyz, – dedi fýtbolshy.

Sondaı-aq ol oıyn bastalar aldynda eshqandaı qobaljýdyń bolmaǵanyn, komanda 90 mınýt boıy óz oıynyn oınaǵanyn aıtty.

Qobaljý bolǵan joq. Bas jattyqtyrýshy aıtqan taktıkany ustandyq. Qarsylas komanda alǵashqy 15 mınýtta alǵa júgiredi degen oımen oınadyq. Sosyn 15-20 mınýttan keıin ashylyp oınaı bastadyq. Fýtbolshylar 100 emes, 200 paıyzǵa bar kúshin salyp oınady. Sonyń arqasynda úsh upaı aldyq. Endi tek alǵa basamyz!, –  dedi Abzal Beısebekov.

Al quramanyń taǵy bir ókili Marat Bystrov matchtyń aldynda bas jattyqtyrýshynyń motıvaııalyq sózder aıtqanyn, onyń sózderi komandaǵa kúsh-jiger bergenin atap ótti.

Bas jattyqtyrýshy bizge oıyn aldynda kıim aýystyratyn bólmede jaqsy motıvaııa berdi. Ol: «Búgin Qazaqstan halqy uıqysyn bólip, bizdiń oıynymyzdy qaraıdy. Bul matchty otandastarymyz kópten beri kútti. Sondyqtan búgin barlyq qazaqstandyqtarǵa qýanysh syılaıyq» degen jalyndy sózderin aıtty.  Onyń osy sózi bizge dem berdi, qanattandyrdy. Biz alańǵa qulshynyp shyqtyq.

Oıyn bitkende meniń esime jattyqtyrýshynyń osy sózderi tústi. Búgin meniń týǵan kúnimde komandamyz jeńiske jetti. Osy kúndi men uzaq ýaqyt este saqtaımyn.  Biz jaqsy oınadyq. Sońyna deıin oınap, jeńiske jettik. Biz qorǵanyp oınamadyq. О́zimizdiń oıynymyzdy oınadyq, – dedi ol.

Osylaısha ulttyq qurama tórt oıynnan keıin toǵyz upaı jınady. Endi kelesi oıyndy Qazaqstan quramasy óz alańynda 7 qyrkúıekte Fınlıandııamen, odan keıin 10 qyrkúıekte Soltústik Irlandııamen ótkizedi.

Qazaqstan quramasynyń osy jeńisinen keıin H tobyndaǵy týrnır kestesi ózgerip sala berdi. Ulttyq qurama aldyna Fınlıandııa komandasyn salyp, ekinshi orynǵa kóterildi. Úshinshi orynǵa  Danııa komandasy jaıǵasty. Dattar syrt alańda Slovenııa jasaǵymen 1:1 esebimen teń oınap, eki upaıynan aıyrylyp qaldy. Tórtinshi orynǵa Slovenııa, besinshi jáne altynshy orynǵa Soltústik Irlandııa men San-Marıno quramalary ornalasty.

Dastan KENJALIN,

ASTANA