SportPress.kz قازاقستان سپورت جاڭالىقتارى
حالىقارالىق وليمپيالىق كوميتەت (حوك) حالىقارالىق بوكس قاۋىمداستىعىن (IBA) مويىنداۋدان باس تارتتى.
حوك اتقارۋ كوميتەتىنىڭ 69 مۇشەسى ءتيىستى قاۋلى قابىلدادى. داۋىس بەرۋدە حوك-تىڭ شەشىمىنە ءبىر ادام قارسى شىقسا، 10 ادام قالىس قالدى.
وسىلايشا، حالىقارالىق بوكس قاۋىمداستىعى وليمپياداعا ليتسەنزيا بەرەتىن قۇرلىقتىق چەمپيوناتتار، تۋرنيرلەر مەن جارىستاردى ۇيىمداستىرۋدان شەتتەتىلدى. ەندى وليمپياداعا جولدامانى ساراپقا سالاتىن بوكس باسەكەلەرىن تىكەلەي حوك-تىڭ ءوزى ۇيىمداستىرىپ وتىرادى.
بۇعان دەيىن بوكستىڭ 2024 جىلعى وليمپيالىق ويىنداردىڭ باعدارلاماسىنان الىنىپ قالۋى مۇمكىن ەكەنى ايتىلعان ەدى.
وسىعان بايلانىستى IBA پرەزيدەنتى رەسەيلىك ۋمار كرەملەۆ ۇيىمنىڭ پروبلەمالارى وليمپيالىق قوزعالىسقا قاتىستى ەمەس، حوك باسشىلىعىنداعى بىرنەشە ادامنىڭ كەسىرىنەن بولىپ وتىرعانىن ايتقان بولاتىن. سونىمەن بىرگە ول حالىقارالىق وليمپيالىق كوميتەتتىڭ جۇمىسىن سىنعا الىپ، ونىڭ بوكستى دامىتۋداعى قىزمەتى تۇككە تۇرعىسىز ەكەنىن مالىمدەدى. ال حوك باسشىلىعى كرەملەۆتىڭ سوزدەرىن جالا رەتىندە قابىلداپ، رەسەيلىكتى ايىپتادى.
سودان كەيىن حالىقارالىق بوكس قاۋىمداستىعى حوك-پەن اراداعى قارىم-قاتىناستى رەتتەگىسى كەلىپ، سپورت اربيتراجىنا ۇيىمنىڭ شەشىمىنە اپپەلياتسيا بەردى. الايدا سپورت اربيتراجى ونىڭ اپپەلياتسياسىن قابىلماي تاستادى.
حوك-تىڭ حابارلاۋىنشا، رەسەيلىك ازامات باسقاراتىن IBA سپورت اربيتراجىنىڭ شەشىمى ءوز پايداسىنا شەشىلمەگەننەن كەيىن حالىقارالىق وليمپيالىق كوميتەتتىڭ مۇشەلەرىنە قوقان-لوققى كورسەتىپ، ءتىپتى ولاردىڭ كوزىن جويىپ جىبەرەتىندەرىن مالىمدەگەن. سودان كەيىن كرەملەۆتى جاڭا مەرزىمگە قايتا سايلاعان. ول سوسىن رەسەيلىك بوكسشىلاردىڭ بارىنەن سانكتسيالارىن الىپ تاستاپ، ۋكراين سپورتشىلارىنا سانكتسيا سالعان. ونىڭ ۇستىنە IBA باسشىسى ۋكراين بوكسشىلارىنا ءوز ەلدەرىنىڭ تۋى استىندا جارىسقا قاتىسۋعا تىيىم سالىپ، ۋكراينا ەلىن بارلىق جارىستان شەتتەتىپ تاستاعان.
ەندى IBA حالىقارالىق دەڭگەيدەگى مارتەبەسىنەن ايىرىلعاننان كەيىن 2024 جىلى پاريجدە وتەتىن وليمپيالىق ويىندارداعى بوكس ءتۋرنيرىن ۇيىمداستىرۋ مىندەتىن حوك ءوزىنىڭ موينىنا الادى. سونىمەن بىرگە 2028 جىلى اقش-تىڭ لوس-اندجەلەس قالاسىندا وتەتىن وليمپيالىق ويىندار باعدارلاماسىنا ازىرشە بوكستى ەنگىزبەۋ تۋرالى شەشىم قابىلداندى.
داستان كەنجالين،
استانا
