قازاق كۇرەسىنەن پانامەريكا چەمپيوناتى ءوتتى 

ەلىمىزگە بەلگىلى ازامات يسلام ابىشەۆ باسقاراتىن دۇنيەجۇزىلىك قازاق كۇرەسى فەدەراتسياسى برازيليادا ءتول كۇرەسىمىزدەن پانامەريكا چەمپيوناتىن وتكىزدى.

برازيليا تورىنە توسەلگەن كىلەمگە سولتۇستىك جəنە وڭتۇستىك امەريكانىڭ مەكسيكا، برازيليا، پاراگۆاي، ۋرۋگۆاي، پەرۋ، چيلي، كولۋمبيا، ارگەنتينا ەلدەرىنىڭ پالۋاندارى قاتىستى.

پانامەريكا چەمپيوناتىندا سەگىز ەلدىڭ وكىلدەرى 80 جانە 80 كيلودان اسا سالماق دارەجەسىندە كۇرەسكە ءتۇستى.

وسى جارىسقا قازاقستان دەلەگاتسياسىن دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سەرىك توكەەۆ باستاپ باردى. ول چەمپيونات كەزىندە ۇيرەتۋشى مامان رەتىندە كۇرتەشە كيىپ، كىلەمگە دە شىقتى. جاتتىقتىرۋشى بولىپ تالاي مىقتى سپورتشىنىڭ توماعاسىن سىپىرعان مامان لاتىن امەريكاسىنداعى اتان جىلىك، ءاپايتوس پالۋاندارعا ۇلتتىق كۇرەسىمىزدىڭ ءادىس-ءتاسىلى مەن ەرەكشەلىگىن ۇيرەتتى.

«قولىڭ مەن تىزەڭ كىلەمگە تيسە، كۇرەسۋ توقتاتىلاتىن، تەك تىك تۇرىپ بەلدەسۋگە بەيىمدەيتىن ۇلتتىق سپورتىمىزدىڭ بۇل قۇرلىقتا دامىعانى وتە-موتە ماڭىزدى دەيدى»، دۇنيەجۇزىلىك قازاق كۇرەسى فەدەراتسياسىنىڭ باس حاتشىسى نۇرلىبەك ەرماعامبەتوۆ.

نۇرلىبەك ەرماعامبەتوۆ  برازيليا جەرىندە پالۋاندارعا بەلدەسۋدىڭ قىر-سىرىن ۇيرەتۋمەن بىرگە باپكەرلەر مەن تورەشىلەرگە ارنايى سەمينار، كەڭەستەر وتكىزدى.

«قازاق كۇرەسىنەن پانامەريكا چەمپيوناتىن وتكىزۋدەگى ماقساتىمىز – ۇلتتىق كۇرەسىمىزدىڭ  ناسيحاتىن ارتتىرۋ. الداعى ۋاقىتتا لاتىن امەريكاسى ەلدەرىندە قازاق كۇرەسىنىڭ فەدەراتسيالارى اشىلىپ، ۇلتتىق سپورتىمىزبەن شۇعىلدانۋشىلاردىڭ سانى كوبەيسە – ەڭبەگىمىزدىڭ اقتالعانى.  ءبىزدىڭ باستى مۇراتىمىز – قازاق كۇرەسىن جازعى وليمپيادا ويىندارىنىڭ باعدارلاماسىنا ەنگىزۋ. اللا ءساتىن سالسا، ول كۇنگە دە جەتەمىز. قازاق كۇرەسىنەن الەمنىڭ 40-قا جۋىق ەلىندە فەدەراتسيالار اشىلدى. الەمنىڭ 80-نەن استام ەلىندە فەدەراتسيامىز بولىپ، ۇلتتىق كۇرەسىمىز كەڭىنەن تارالسا، ءتول كۇرەسىمىز وليمپيادا ويىندارىنىڭ تورىنەن كورىنەدى. پانامەريكا چەمپيوناتىن ۇيىمداستىرۋداعى، ارنايى سەمينار، كەڭەستەر وتكىزۋدەگى كوزدەگەنىمىز دە وسى قۇرلىقتا فەدەراتسيالار اشۋ»، – دەيدى سەرىك ادام ۇلى.

دزيۋدو كۇرەسى مەن جەكپە-جەك سپورتىنا وتە بەيىم  الىپ دەنەلى پانامەريكالىقتار ۇلتتىق كۇرەسىمىزبەن شۇعىلدانۋعا ەرەكشە ىقىلاس تانىتتى دەيدى چەمپيوناتتى ۇيىمداستىرۋشىلار.

قۋانىش نۇردانبەك