Kúres: Qazaqstan týrnırdi 2 altyn, 2 kúmis, 6 qola júldemen aıaqtady

Vengrııanyń Býdapesht qalasynda ótip jatqan  kúres túrlerinen osy jyldyń sońǵy tórtinshi reıtıngtik týrnırinde áıelder kúresinen 72 kg salmaqta kúresken Jamıla Baqbergenova jeńimpaz atandy.

Onyń salmaǵynda balýandar az bolǵandyqtan kúres aınalmaly júıe boıynsha boldy. Aldymen Baqbergenova Italııa balýanyn jeńse, ekinshi beldesýinde Kanada qyzynan 9:4 esebimen basym tústi. Úshinshi beldesýinde mońǵol qyzy Enhamardy 4:2esebimen utyp, fınalǵa shyqty Fınalda alǵashqy beldesýinde jeńgen Italııa balýany Dalma Ganevany 3:1esebimen tize búktirdi.

Odan keıin osy týrnırde 55 kelidegi grek-rım kúresinen Amanǵalı Bekbolatov fınalda rýmyn Denıs Mıhaıdy utyp, el qorjynyna altyn júlde saldy.

63 kelidegi Muhamedalı Mamyrbek qola júldeni ıelendi. Al jarystyń sońǵy kúni grek-rım kúresi balýandary qalǵan 67, 72, 77, 82, 87, 97 jáne 130 kelide reıtıngtik týrnır júldesin ózara sarapqa salyp, ókinishke qaraı eshqaısysy júlde almady.

Ulttyq qurama sapynan qola júlde úshin beldesýge múmkindik alǵan jalǵyz balýanymyz Danııar Qalenov (72 keli) túrik Selchýk Kannan 1:5 esebimen utylyp, qolda turǵan qola júldeden aıyrylyp qaldy. 67 kelidegi Din-Muhamed Qoshqar men 87 kelidegi Nursultan Tursynovtar jubanysh beldesýlerinde rýmyn jáne ázerbaıjan balýandaryna ese jiberdi.

Osylaısha grek-rım kúresi balýandary bul jolǵy reıtıngtik týrnırdi 1 altyn, 1 qola júldemen aıaqtasa, qyzdarymyz 1 altynmen qorytyndylady. Erkin kúres balýandarynyń enshisinde 2 kúmis, 5 qola júlde bar.

Aspandııar ESENJOLOV,

FOTO: Kúres túrleri federaııasy