О́zbekstanda fýtbol klýbtary salyqtan bosatyldy

О́zbekstan prezıdenti Shavkat Mırzıeev fýtbol klýbtaryn, Fýtbol qaýymdastyǵy men Kásipqoı fýtbol lıgasyn úsh jylǵa barlyq salyqtan bosatatyn zańǵa qol qoıdy.

Gazeta.uz saıtynyń habarlaýynsha, Salyq kodeksiniń 483-babyna engizilgen ózgeristerge sáıkes (ýaqytsha salyq jeńildikteri) 2023 jylǵy 1 qańtardan 2026 jylǵy 1 qańtarǵa deıin О́zbekstan Fýtbol qaýymdastyǵy, onyń óńirlik bólimsheleri, О́zbekstan kásipqoı fýtbol lıgasy, Fýtbol tóreshileri ortalyǵy, О́zbekstannyń kásipqoı fýtbol klýbtary men akademııalary salyqtyń barlyq túrlerinen (áleýmettik salyqty qospaǵanda), sheteldik fýtbolshylar men mamandar úshin jeke tabys salyǵyn tóleýden bosatyldy.

Sonymen birge fýtbolǵa arnalǵan stadıondar men arenalardyń materıaldyq-tehnıkalyq bazasyn nyǵaıtý úshin ákelingen, О́zbekstanda óndirilmeıtin jabdyqtar, sporttyq jabdyqtar men tehnologııalardy, quraldardy, habar taratýǵa arnalǵan barlyq qurylǵylar men jabdyqtardy, farmakologııalyq ónimderdi, sporttyq tamaqtanýdy, fýtbol (fýtzal) alańdaryna arnalǵan jasandy jabyndardy, arnaıy jelimderdi jáne kásipqoı sporttyq qural-jabdyqtar ákelý kezinde qosymsha qun salyǵynan bosatylady.

Dastan KENJALIN,

ASTANA

FOTO: Gazeta.uz