قازاقستان سپورتشىلارىنىڭ ۋنيۆەرسياداداعى جارىس كەستەسى شىقتى

قىتايدىڭ چەندۋ قالاسىندا وتەتىن دۇنيەجۇزىلىك ستۋدەنتتىك ويىندارىنا قاتىساتىن قازاقستان سپورتشىلارىنىڭ جارىس كەستەسى شىقتى.

ۋنيۆەرسيتەت سپورتشىلارىنىڭ حالىقارالىق فەدەراتسياسىنىڭ (FISU) XXXI دۇنيەجۇزىلىك ستۋدەنتتىك ويىندارى قىتايدىڭ وڭتۇستىك-باتىسىنداعى سىچۋان پروۆينتسياسىنىڭ چەندۋ قالاسىندا 28 شىلدە مەن 8 تامىز ارالىعىندا وتەدى.

وعان قازاقستان اتىنان سپورتتىڭ 11 تۇرىنەن 93 سپورتشى قاتىسادى. سپورتشىلار ساداق اتۋ، وق اتۋ، جەڭىل اتلەتيكا، سپورتتىق گيمناستيكا، دزيۋدو، كوركەم گيمناستيكا، ۇستەل تەننيسى، تاەكۆوندو، ۋ-شۋ، ءجۇزۋ مەن سەمسەرلەسۋدەن كۇش سىناسادى. ەل قۇراماسى 26 جوعارى وقۋ ورنىنىڭ ستۋدەنتتەرىنەن جاساقتالعان.

28 شىلدەدە ۋنيۆەرسيادانىڭ اشىلۋ سالتاناتى وتەدى. ال 27 شىلدەدە ستۋدەنتتەر ساداق اتۋدان جارىس جولىنا شىعادى.

ۋنيۆەرسيادادا سپورتتىڭ 18 تۇرىنەن 269 مەدال جيىنتىعى ساراپقا سالىنادى. وعان الەمنىڭ تۇكپىر-تۇكپىرىنەن ون مىڭنان استام سپورتشى قاتىسادى.

ۋنيۆەرسيادا جارىستارى «ارماندار چەندۋدە شىندىققا اينالادى» ۇرانىمەن وتەدى. ۋنيۆەرسيادانىڭ بويتۇمارى 2019 جىلعى 30 جەلتوقساندا تانىستىرىلعان «Ronq Bao» پانداسى بولدى.

27 شىلدەدە چەندۋ قالاسىنىڭ ۋاقىتى بويىنشا ساعات 20.00-دە سپورت قالاشىعىندا مەملەكەتتىك تۋدى كوتەرۋ ءراسىمى وتەدى.

داستان كەنجالين،

استانا