كونفەرەنتسيا ليگاسى: «ورداباسى» تەڭ تۇسسە، «اقتوبە» مەن «توبىل» جەڭىسكە جەتتى (فوتو، ۆيدەو)

كونفەرەنتسيا ليگاسىنىڭ ەكىنشى ىرىكتەۋ تۋرنيرىندە ەلىمىزدىڭ ءۇش كلۋبى – شىمكەنتتىڭ «ورداباسى»، قوستانايدىڭ «توبىل» مەن اقتوبەنىڭ «اقتوبە» كوماندالارى جارىس جولىنا شىقتى.

اۋەلى استانا ۋاقىتى بويىنشا «ورداباسى» ءوز الاڭىندا پولشانىڭ «لەگيا» جاساعىمەن وينادى. شىمكەنتتىڭ كومانداسى ويىن كەزىندە 2:0 ەسەبىمەن ۇتىپ جاتىپ، قاقپاسىنا ەكى گول جىبەرىپ الىپ، قولدا تۇرعان جەڭىستەن ايىرىلىپ قالدى. ءسويتىپ، ماتچ 2:2 ەسەبىمەن تەڭ اياقتالدى.

الاڭ يەلەرى قۇرامىندا ويىننىڭ 13-مينۋتىندا ۆسەۆولود سادوۆسكي ءبىرىنشى بولىپ گول سالسا، 48-مينۋتتا مامادۋ مبودج ەكىنشى دوپتى تورعا توعىتتى. سودان كەيىن قوناقتار ساپىندا 63-مينۋتتا توماش پەدگارت ەسەپتى قىسقارتسا، 86-مينۋتتا بلاج كرامەر ەسەپتى تەڭەستىردى. «لەگيانىڭ» ەكىنشى گولى كۇمان تۋعىزدى. «ورداباسى» كلۋبى ماتچ اياقتالعان سوڭ، ونى ويىننان تىس، ياعني وففسايدتان سالىنعان دەدى.

ەندى كەلەسى ماتچ 4 تامىزدا ۆارشاۆادا بولادى.

قازاقستان كلۋبتارى قاتىسقان ەكىنشى ماتچ استانا ۋاقىتىمەن ساعات 22.50-دە گرۋزيانىڭ كۋتايسي قالاسىنان كورسەتىلدى. مۇندا جەرگىلىكتى «تورپەدو» كلۋبى «اقتوبەمەن» كەزدەستى.

بۇل ماتقا «اقتوبەنىڭ» فۋتوبلشىلارى كلۋبتىڭ باسشىسى سەرگەي كۋلەنكونىڭ كەسىرىنەن ويىن بولاتىن كۇنى باردى. شىنىن ايتۋ كەرەك، مۇنداي جاعداي قازاقستان فۋتبول كەڭىستىگىندە بۇرىن-سوڭدى بولماعان. حالىقارالىق جارىسقا بارلىق تالاپ، ەرەجە بويىنشا ءبىر كۇن ەرتە بارماي، ويىن باستالاتىن كۇنى جەتىپ بارۋ دەگەن ەلىمىز تاۋەلسىزدىك العان كەزدەن بەرى ءالى بولىپ كورگەن جوق. سولاي دەسەك تە «اقتوبە» گرۋزيادا ءبىر كۇن بۇرىن جاتتىقپاي، ماتچتىڭ باستالۋىنا ساناۋلى ساعاتتار قالعاندا بارسا دا نامىسقا تىرىسىپ، جاقسى ويىن ورنەگىن كورسەتتى.

ماتچتا قازاقستاندىق كلۋب سەنىمدى وينادى. 34-مينۋتتا «اقتوبە» ساپىنان الىبەك قاسىم پەنالتيدەن ءمۇلت كەتكەن جوق. ال 43-مينۋتتا ميلوش رايچكوۆيچ ەسەپتى ەسەلەسە، 73-مينۋتتا ماكسيم سامورودوۆ ءۇشىنشى گولدىڭ اۆتورى اتاندى.

«تورپەدو» ساپىنان گەورگي ارابيدزە 89-مينۋتتا ەسەپ ايىرماسىن ءبىر گولعا عانا قىسقارتا الدى. ويىن ەندى بىتەدى دەگەندە «اقتوبە» تاعى دا كۋتايسيدىڭ Ramaz Shengelia FC Torpedo Kutaisi Stadium ستاديونىنا جينالعان جانكۇيەرلەردى جەرگە قاراتتى. 93-مينۋتتا «اقتوبەنىڭ» ويىنشىسى اندريا فيليپپوۆيچ قاقپانى ءدال كوزدەدى.

وسىلايشا «اقتوبە» قارسىلاسىنان 4:1 ەسەبىمەن باسىم ءتۇستى. ەندى كەلەسى ماتچ اقتوبەدە 3 تامىزدا بولادى.

كونفەرەنتسيا ليگاسىنىڭ ەكىنشى ىرىكتەۋ تۋرنيرىندە «توبىل» كلۋبى دا سىرت الاڭدا جەڭىسكە جەتتى. قوستانايدىڭ كومانداسى شۆەيتساريانىڭ «بازەل» جاساعىن 3:1 ەسەبىمەن ۇتتى.

بۇل ماتچ استانا ۋاقىتىمەن كەش باستالدى. ساعات ءتىلى 23.20-گە جاقىنداعاندا كوماندالار جاسىل الاڭعا شىقتى. شىنىن ايتقاندا، بۇل ويىندا قوستانايدىڭ جاساعىنا كوپ ءۇمىت ارتىلماعان ەدى. ءباس تىككەن جانكۇيەردىڭ كوبىسى ءالپى تاۋىنىڭ ەتەگىندە جاتقان ەلدىڭ كومانداسى جەڭىسكە جەتەدى دەپ بولجام دا جاساعان. الايدا «توبىل» ويىندا ەرىك-جىگەر، مىنەز كورسەتىپ، كامبەك جاساپ، الاڭ يەلەرىنەن 3:1 ەسەبىمەن باسىم ءتۇستى.

ماتچتىڭ العاشقى مينۋتتارىندا «بازەلدىڭ» باسىمدىعى كورىنىپ تۇردى. ولار بىرىنەن سوڭ ءبىرى شابۋىل جاساپ، اقىرى سوڭىندا ءبىرىنشى بولىپ ەسەپ اشتى. 25-مينۋتتا تەرنو بارري كوزدەگەن نىسانادان ءمۇلت كەتكەن جوق.

ەكىنشى تايمدا «توبىل» كومانداسى تارازى باسىن تەڭەستىرۋگە تىرىسىپ، العا ۇمتىلدى. وسى كەزدە رامازان ورازوۆتىڭ پەنالتيدەن ەسەپتى تەڭەستىرۋگە تاماشا مۇمكىندىگى بولدى. بىراق ول 11 مەترلىك ايىپ دوبى الاڭىنان قاقپاشىدان ايلاسىن اسىرا الماي قالدى.

ويىننىڭ 57-مينۋتىندا قوستانايدىڭ كلۋبىنا تاعى دا پەنالتيدەن ەسەپتى تەڭەستىرۋگە مۇمكىندىك بەرىلدى. وسىنى سەرج دەبلە پايدالانىپ، پەنالتيدەن شەبەرلىگىن كورسەتتى.

وسىدان كەيىن رامازان ورازوۆ 62-مينۋتتا الىستان قاقپانى ءدال كوزدەپ، تاماشا گول سالدى. ال يسلام چەسنوكوۆ 71-مينۋتتا تابلوداعى ەسەپكە وزگەرىس ەنگىزدى. ءسويتىپ، «توبىل» سىرت الاڭدا كامبەك جاساپ، قارسىلاستارىن قاپىدا قالدىرىپ كەتتى.

قوستانايدىڭ كلۋبى ءبىرىنشى ىرىكتەۋ ساتىسىندا فينليانديانىڭ «حونكا» كومانداسىنان ەكى ويىننىڭ (2:1، 0:0) ناتيجەسىندە ۇزدىك بولىپ، ەكىنشى ساتىعا شىققان ەدى. ەندى «توبىل» تاعى دا 3 تامىزدا بولاتىن «بازەلمەن» ويىندا ۇزدىك شىقسا، وندا ىرىكتەۋ ءتۋرنيرىنىڭ ءۇشىنشى كەزەڭىندە «دەرري سيتي» (يرلانديا) مەن كۋپس (فينليانديا) كوماندالارىنىڭ اراسىنداعى ماتچتاردىڭ جەڭىمپازىمەن كەزدەسەدى.

 

داستان كەنجالين،

استانا