Qazaqstan dzıýdoshylary Ýnıversıadanyń qola júldegeri atandy

Osy kúnderi Qytaıdyń Chendý qalasynda ótip jatqan Dúnıejúzilik stýdentter oıyndarynda Qazaqstan quramasynyń dzıýdoshylary Suńǵat Jubatqan men Asqar Narqulov qola júldeni jeńip aldy.

Áýeli Suńǵat Jubatqan 66 keli salmaqta kúresip,  Qazaqstan quramasynyń qorjynyna alǵashqy júldeni saldy. Ol úshinshi oryn úshin beldesýde ózbekstandyq qarsylasyn tize búktirip, jeńiske jetti.

Odan keıin kilemge 73 kg salmaq dárejesinde shyqqan  Asqar Narqulov Qazaqstan quramasyna ekinshi qola medaldi syılady.

Narqulov irikteý kezeńderinen irkilmeı ótip, jartylaı fınaldyq joldamany sarapqa salarda Mońǵolııa sportshysyna ese jiberdi. Al jubanysh beldesýinde Italııa sportshysynan basym túsip, qola júlde úshin kúresýge múmkindik aldy. Kishi fınalda ol qyrǵyzstandyq dzıýdoshydan basym túsip, jarystyń qola júldesin jeńip aldy.

Qytaıda ótip jatqan Ýnıversıada 8 tamyzǵa deıin jalǵasady.

Dastan KENJALIN,

ASTANA