قانات يسلام جەڭىلىپ كورمەگەن كانادالىق بوكسشىنى نوكاۋتقا ءتۇسىردى

قازاقستاندىق بوكسشى قانات يسلام ەكسپو-2017 كورمەسى اياسىندا وتكەن بوكس كەشىنىڭ باستى جەكپە-جەگىندە كانادالىق برەندون كۋكتى جەڭدى.

قانات يسلام استانادا كاسىپقوي بوكستاعى 25-جەكپە-جەگىن وتكىزىپ، جەڭىسكە جەتتى.

ءبىرىنشى راۋندتا كانادالىق بوكسشى بەلسەندىلىك تانىتتى. ءوز كەزەگىندە قانات ساۋاتتىلىق قارسىلاسىنىڭ وسال تۇسىن تاۋىپ،  ءساتى كەلگەندە سوققى جاساپ قالۋعا تىرىستى. ال ەكىنشى راۋندتا ءدال سوققىلارىمەن قارسىلاسىن ءبىر ەسەڭگىرەتىپ العانداي بولدى.

قانات قارسىلاسىنىڭ جۇدىرىقتاسۋ مانەرىن ءجىتى باقىلاپ، ءۇشىنشى راۋند سوڭىندا جويقىن سوققىسىمەن كانادالىق بوكسشىنى نوكداۋنعا ءتۇسىردى. برەندوندى بۇل ساتتە گونك داۋىسى عانا قۇتقارىپ قالدى. ءتورتىنشى راۋندتا كانادالىق تەك قورعانۋمەن بولدى.

بەسىنشى راۋندتا قانات قارسىلاسىن كەزەكتى رەت نوكداۋنعا ءتۇسىردى. بىراق برەندون جىلدام ەس جيىپ ۇلگەردى. سپورتتىق كارەراسىندا العاش رەت وزگە ەلدە جۇدىرىقتاسىپ جاتقان كانادالىق سەگىزىنشى راۋندتا تاعى ءبىر رەت تىزەرلەدى. توعىزىنشى راۋندتا تورەشى جەكپە-جەكتى توقتاتىپ، قانات تەحنيكالىق نوكاۋتپەن جەڭىسكە جەتتى.

برەندون كۋك سپورتتىق مانسابىندا العاش رەت جەڭىلدى.