سەگىز قىرلى، ءبىر سىرلى بالۋان حاميت ىسقاق ۇلى

قازاق كۇرەسى كۇرەسى جايلى تاريح بەتتەرىن پاراقتاي وتىرعاندا، سەمەيلىك ارداگەر بالۋان حاميت ىسقاق ۇلىن كوزىمىز شالادى. ورتا ازيانىڭ 3 دۇركىن باس بالۋانى، سامبو، ەركىن كۇرەس، دزيۋدو جانە قازاق كۇرەسىنەن قازاقستاننىڭ سپورت شەبەرى، كسرو سپورت شەبەرى اتانعان حاميت اعامىز سەگىز قىرلى ءبىر سىرلى جان. قولىنا دومبىراسىن الىپ ءان سالعاندا، جانىڭدى تەبىرەنتەدى.

ول ەلىمىزدە قازاق كۇرەسىنىڭ دامۋىنا زور ۇلەس قوسقان ارداقتى بالۋان. قازاق كۇرەسىنەن دە رەسپۋليكالىق كوپتەگەن جارىستاردىڭ تۇيە بالۋانى بولىپ تانىلعان. بۇگىندە اعامىز جاسىنا قاراماي، سپورتتى تاستاماي، سامبودان  ارداگەرلەر اراسىندا ءوتىپ تۇراتىن الەم بىرىنشىلىگىندە جۇلدەگەر اتانىپ، قازاقستاننىڭ اتىن شىعارىپ ءجۇر. حاميت اعامىزدى قازاقتىڭ ءبىرتۋار باۋانى بالۋان شولاققا تەڭەستىرگىڭ كەلەدى. بابامىز دا بالۋاندىعىمەن قوسا ونەرپاز، ءانشى-سازگەر بولدى ەمەس پە. بالۋان شولاقتىڭ شىعارعان «عاليا» ءانى كۇنى بۇگىنگە دەيىن، ءاربىر ورتادا شىرقالىپ كەلە جاتقان ومىرشەڭ ءاننىڭ ءبىرى. سوندىقتان دا بالۋانداردىڭ اراسىنان دا مىقتى ءانشى شىعاتىنىنا كۇمان تۋماس. ونىڭ ءبىر ناقتى دالەلى حاميت اعامىزدىڭ ونەرلى دە ونەگەلى ءومىرى. اللا سىزگە ۇزاق ءومىر، كۇش-قۋات بەرسىن اعا. ەل اراسىندا انىڭىزبەن، سانىڭىزبەن ۇرپاققا ۇلگى بولىپ جۇرە بەرىڭىز.

مىنا تومەندەگى فوتولار دۇنيەجۇزىلىك قازاق كۇرەسى فەدەراتسياسىنىڭ  استانادا وتكىزگەن كەزەكتى الەم چەمپيوناتىندا تۇسىرىلگەن ەدى. وسى الەم بىرىنشىلىگىندە قازاق كۇرەسىنىڭ جاناشىرى، الەم ارەناسىنا شىعارعان ارداقتى ازامات سەرىك ادام ۇلى تۇكەەۆ اعامىز، ەلدەگى قازاق كۇرەسىنە ەڭبەك سىڭىرگەن بارشا ارداقتى اقساقالدارىمىزدى شاقىرىپ، قۇرمەتتەگەن بولاتىن. سول ءبىر كۇننىڭ ەستەلىگى رەتىندە مىنا فوتولاردى ساقتاپ قويعان ەكەنمىن.

اقىن ورداباي ۇلى،

الماتى