قازاقستان ازيا چەمپيوناتىنىڭ فينالىنا شىقتى

قازاقستان سپورتشىلارى تايلاندتا اكادەميالىق ەسكەك ەسۋدەن ءوتىپ جاتقان ازيا چەمپيوناتىنىڭ فينالىنا شىقتى.

بۇگىن تايلاندتىڭ پاتتايا قالاسىندا اكادەميالىق ەسكەك ەسۋدەن ەرەسەكتەر مەن جاستار اراسىنداعى ازيا چەمپيوناتى باستالدى. بۇل سىندا ەل نامىسىن 13 ەرەسەك (11 ەركەك، 2 ايەل) پەن 9 جاس سپورتشى (3 ەركەك، 6 ايەل) قورعاپ جاتىر. بىرنەشە سپورتشىمىز  ىرىكتەۋ جارىسىنان ءساتتى ءوتىپ، جۇلدە ءۇشىن تالاسۋعا مۇمكىندىك الدى.

ەرەسەكتەر اراسىندا (LW4ح) روزا كەڭەس، ۆالەنتينا ۆولكوداۆوۆا، مەدينا قوڭىرباەۆا، ەكاتەرينا نوسكوۆا كۆارتەتى ىرىكتەۋدە ءوز توبىندا مارەگە بەسىنشى بولىپ كەلدى. جارىسقا التى ەلدىڭ سپورتشىلارى قاتىسقاندىقتان وتانداستارىمىز 3 جەلتوقساندا وتەتىن فينالعا جولداما الدى.

ەرەسەكتەر اراسىندا (Lم4-) ادىلەت كەرىمبەك، قۋانىش بەكبەمبەتوۆ، دانيل پەترەنكو مەن باپان اسحامبەك ىرىكتەۋدە التىنشى ورىن الىپ، 3 جەلتوقساندا وتەتىن فينالعا شىقتى.

جاسوسپىرىمدەر اراسىندا (JW2-) مەلاني جاقىپوۆا مەن انجەلا پوليانينا جۇبى ىرىكتەۋ كەزەڭىندە ءوز توبىندا ءتورتىنشى ساتىعا تۇراقتادى. ەندى ولار 3 جەلتوقسانداعى فينالدا باق سىنايدى.

ال ەرەسەكتەر اراسىنداعى جەكەلەي جارىستا (W1x) سۆەتلانا گەرمانوۆيچ ىرىكتەۋدە مارەگە ەكىنشى بولىپ كەلدى. بۇل توپتا تەك جەڭىسكە جەتكەن سپورتشى عانا فينالعا شىقتى. قالعان ەسكەك ەسۋشىلەر جۇبانىش جارىسىندا فينالعا شىعۋعا تىرىسىپ كورەدى.

ەرەسەكتەر اراسىندا (M2x) ميحايل تاسكين مەن الەكسەي كراسنوۆسكي دۋەتى ىرىكتەۋدە ءتورتىنشى بولىپ فينالعا تىكەلەي جولداما الا المادى. دەسە دە جۇبانىش جارىسىنا قاتىسىپ، فينالعا جەتە الادى.

بيىلعى سارى قۇرلىق باسەكەسىنە 18 ەلدىڭ 150-گە تارتا سپورتشىسى قاتىسىپ جاتىر.

داستان كەنجالين،

استانا