Aýyr atletıkadan ACh: Qazaqstan – kóshbasshy!

Astanada jasóspirimder men jastar arasynda aýyr atletıkadan Azııa chempıonaty aıaqtaldy. Oǵan 25 elden kelgen 14 pen 20 jas aralyǵyndaǵy 300-den astam sportshy qatysty, dep habarlady Týrızm jáne sport mınıstrligi.

Chempıonatta elimizdiń namysyn 29 sportshy qorǵady.

Azııa aýyr atletıka federaııasynyń prezıdenti Mohammed Iýsef Al-Mana týrnırdiń laıyqty deńgeıde uıymdastyrylǵanyn atap ótti.

Jasóspirimder men jastar arasyndaǵy Azııa chempıonatynyń Qazaqstanda ótip jatqanyna qýanyshtymyz! Bul tek Qazaqstannyń moıyndalýy emes, sonymen qatar Azııanyń Olımpıada oıyndaryndaǵy aýyr atletıka boıynsha eń myqty qurlyqtardyń biri retindegi yqpalyn dáleldeıdi, — dedi.

Chempıonat qorytyndysyna sáıkes Qazaqstan quramasy medal sany boıynsha kóshbasshy atandy.

* Elimizdiń sportshylary 17 jasqa deıingi jas kórsetkishi boıynsha 12 altyn, 4 kúmis, 7 qola medal jeńip aldy.

* 20 jasqa deıingi jas kórsetkishi boıynsha 9 altyn, 8 kúmis, 10 qola medalǵa ıe boldy. Sonymen qatar, birneshe Azııa jáne álem rekordy jańartyldy.

Atap aıtqanda:

— Álıhan Áskerbaı (71 kg, 20 jasqa deıin): 3 altyn, 6 rekord (3 álemdik, 3 azııalyq). Julqı kóterýde – 141 kg, serpe kóterýde – 169 kg, qos saıys boıynsha – 310 kg (jańa álem jáne Azııa rekordy) baǵyndyrdy.
— Edige Emberdi (79 kg, 20 jasqa deıin): julqı kóterýde – 153 kg (altyn), serpe kóterýde – 194 kg (Azııa rekordy), qos saıys boıynsha – 347 kg (Azııa rekordy) eńserdi.

— Nurjan Jumabaı (79 kg, 17 jasqa deıin): 15 jastaǵy atlet 3 altyn jeńip aldy. Julqı kóterýde – 140 kg, serpe kóterýde – 175 kg (Azııa rekordy), qos saıys nátıjesi boıynsha 315 kg kóterdi.

— Denıs Polýboıarınov (94 kg, 20 jasqa deıin): qos saıys – 376 kg (absolıýtti chempıon), serpe kóterýde – 213 kg (Azııa rekordy) baǵyndyrdy.

— Ksenııa Prozorova (58 kg, 17 jasqa deıin): Qytaı jáne О́zbekstan sportshylaryn artta qaldyryp, 3 altyn ıelendi jáne eń jas chempıon atandy.

— Kıra Danılova (69 kg, 17 jasqa deıin): julqı kóterýde – 87 kg, serpe kóterýde – 111 kg, qos saıys – 198 kg kóterip, 3 altyn medalǵa ıe boldy.

— Erasyl Sáýlebekov (88 kg, 20 jasqa deıin): julqı kóterýde – 153 kg, serpe kóterýde – 191 kg, qos saıys nátıjesi boıynsha 344 kg kóterip, 3 altyn medal ıegeri atandy.