قازاق كۇرەسىنەن ءاچ: قازاقستان قورجىنىندا – 8 التىن، 6 كۇمىس، 2 قولا جۇلدە!

استانا تورىندە تۇڭعىش رەت وتكەن اسكەري قىزمەتشىلەر اراسىنداعى قازاق كۇرەسىنەن CISM ءالەم چەمپيوناتى ءوز مارەسىنە جەتتى، دەپ حابارلادى Qazaq Kuresi اسسوتسياتسياسىنىڭ ءباسپاسوز قىزمەتى.

Qazaqstan جەڭىل اتلەتيكا كەشەنىندە وتكەن بۇل ءدۇبىرلى دودا – تەك سپورتتىق باسەكە عانا ەمەس، ۇلتتىق رۋح پەن جاۋىنگەرلىك جىگەردىڭ توعىسقان شىنايى مەرەكەسى بولدى.

بۇل چەمپيونات — ۇلتتىق سپورتىمىزدىڭ الەمدىك دەڭگەيدەگى بەدەلىن ايقىنداعان تاريحي بەلەس. بوزكىلەمدەگى ءار بەلدەسۋ قازاقستاندىق جانكۇيەرلەرگە قۋانىش سىيلاپ قانا قويماي، قازاق كۇرەسىنىڭ تەحنيكاسى مەن فيلوسوفياسىنىڭ اسكەري رۋحپەن تابيعي ۇيلەسىمىن ايقىن كورسەتتى.

تورتكىل دۇنيەنىڭ تۇكپىر-تۇكپىرىنەن كەلگەن 20-دان استام ەلدىڭ تاڭداۋلى بالۋاندارى بوزكىلەمدە باق سىناپ، ۇزدىكتەردىڭ ۇزدىگى انىقتالدى. ەكى كۇنگە سوزىلعان باسەكەدە قازاقستان قۇراماسى وزگەلەردەن وق بويى وزىپ، جانكۇيەرىن جارقىن جەڭىسپەن قۋانتتى.

ەكىنشى جارىس كۇنى ءبىزدىڭ بالۋاندار التىن مەن كۇمىستى قورجىنعا مولىنان سالدى. اتاپ ايتقاندا، 60 كەلىدە ەرنۇر سۇلەيمەن التىن السا، 74 كەلىدە جۇماجان قوجامبەكوۆ جەڭىس تۇعىرىنىڭ ەڭ بيىك ساتىسىنا كوتەرىلدى. +100 كەلىدە عالىمجان قىرىقباي فينالدا ءوزىنىڭ ايبىنىن اسىرىپ، التىن جۇلدەگە قول جەتكىزدى. ال 90 كەلىدە ونەر كورسەتكەن ايدار بەسكەمپىر ۇزدىك ۇشتىكتى تۇيىندەدى.

ايەلدەر اراسىندا +77 كەلىدە اقەركە رامازانوۆا توپ جاردى. كۇمىس جۇلدە يەگەرلەرى – ساعات بايعاراەۆا (52 كگ)، باقىت قۇساقباەۆا (60 كگ)، روزا نىسانتايقىزى (70 كگ).

وسىلايشا، قوس كۇننىڭ قورىتىندىسىندا ۇلتتىق قۇراما 8 التىن، 6 كۇمىس، 2 قولا مەدال يەلەندى. جالپىكوماندالىق ەسەپتە قازاقستان 350 ۇپايمەن ايقىن كوش باستادى. ەكىنشى ورىن – 276 ۇپاي جيناعان وزبەكستان قۇراماسىنا بۇيىرسا، ۇزدىك ۇشتىكتى 198 ۇپايمەن رەسەي قورىتىندىلادى.

CISM الەم چەمپيوناتى – قازاق كۇرەسىنىڭ جاھاندىق دەڭگەيدەگى بەدەلىن ارتتىرىپ قانا قويماي، ونى اسكەري سپورتتىڭ اجىراماس بولىگى رەتىندە تانىتقان ماڭىزدى قادام بولدى. بۇل جارىس – ۇلتتىق سپورتتىڭ الەمدىك ارەنادا قانات جايۋىنا جول اشاتىن جاڭا بەلەس.

چەمپيونات حالىقارالىق اسكەري سپورت كەڭەسى (CISM) اياسىندا وتكىزىلگەنىن جانە كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا ارنالعانىن اتاپ وتكەن ءجون. استانا تورىندەگى CISM الەم چەمپيوناتى – قازاق كۇرەسىنىڭ جاھاندىق بەدەلىن جاڭا دەڭگەيگە كوتەرگەن، اسكەري سپورت قاۋىمداستىعىنا ءتول ونەرىمىزدىڭ قۋاتىن ايقىن تانىتقان جاھاندىق دودا.

P.S. بۇل دودا – تەك سپورتتىق جارىس ەمەس، ول – ۇلتتىق رۋحتىڭ، ەل نامىسىنىڭ، قازاق كۇرەسىنىڭ ايبىنىن تانىتقان مەرەيلى ءسات. پرەزيدەنت قاسىم-جومارت توقاەۆتىڭ تاپسىرماسىمەن قابىلدانعان جاڭا زاڭ اياسىندا قازاق كۇرەسى وليمپيادالىق جانە پاراليمپيادالىق سپورت تۇرلەرىمەن قاتار باسىم سپورت ءتۇرى رەتىندە تانىلدى. قازاق كۇرەسىنىڭ بايراعىن جەلبىرەتكەن بۇل چەمپيونات – بولاشاقتا ازيا ويىندارى مەن  وليمپيادا تورىنە اپارار داڭعىل جولدىڭ باستاۋى بولادى.