ÁCh-2022: Katar alǵashqy matchta Ekvadordan utyldy

Katar quramasy fýtboldan álem chempıonatynyń ashylýynda Ekvadordan 0:2 esebimen utyldy.

Mýndıaldyń alǵashqy matchy Ál-Haýr qalasyndaǵy «Ál-Baıt» stadıonynda boldy.

Kezdesýdegi eki dop ta qaqpaǵa birinshi taımda soǵyldy.

Ekvadorlyqtar 3-mınýtta esep ashqan edi. Biraq alańdaǵy arbıtr ofsaıd boldy degen eseptemeı tastady.

Budan keıingi birinshi gol penaltıden salyndy. Matchtyń 16-mınýtynda ózimen betpe-bet shyqqan Ekvador quramasynyń shabýylshysy Enner Valensııany katarlyq qaqpashy óz aıyp alańynda eki qolymen aıaǵynan ustap qulatty. Osy úshin belgilengen on bir metrlik aıyp dobyn forvardtyń ózi soqty.

Arada taǵy 15 mınýt ótkennen keıin Valensııa dýbl jasady. Bul joly ol qaqpashy alańyna qaraı alystan berilgen dopqa basyn tosa qoıyp, ony tordan bir-aq shyǵardy.

Ekvadorlyqtar matchtyń birinshi taımynda óte senimdi oınady. Katarlyqtar olardyń qaqpasyna qaýip tóndire almady.

Oıynnyń ekinshi taımynda alańdaǵy qarqyn birshama basylyp qalǵandaı boldy. Ekvadorlyqtar dopty óz tizginderinde ustap, qarsylastarynyń shabýyl jasaýlaryna jol bere qoımady. Sóıtip, olar alań ıelerine esepti match sońyna deıin ózgertýge múmdik bergen joq.

Endi ekinshi týrdyń oıynyn Katar 25 qarashada Senegalmen ótkizse, Ekvador sol kúni Nıderlandpen alańǵa shyǵady.

21 qarasha kúni Anglııa men Iran (19:00), Senegal men Nıderland (22:00) quramalary ózara kúsh synasady. Al sol kúni túnde jasyl alańǵa AQSh pen Ýels (01:00) komandalary shyǵady.

Dastan KENJALIN,

ASTANA