گولوۆكين قازاقستان قۇراماسىن قولداۋ ءۇشىن ەلگە كەلە جاتىر

بوكسشى گەننادي گولوۆكين فۋتبولدان ەۋرو-2024 ىرىكتەۋ تۋرنيرىنە قاتىسىپ جاتقان  قازاقستان ۇلتتىق قۇراماسىن سولتۇستىك يرلانديا كومانداسىمەن ماتچتا قولداۋ ءۇشىن ەلگە كەلەدى. ول الەۋمەتتىك جەلىدە قازاقستان قۇراماسىنىڭ ويىنىن تاماشالايتىنىن جازدى.

جاقىندا ۇيىمىزگە ورالامىز. ەڭ الدىمەن، فۋتبولدان ۇلتتىق قۇرامامىزدى قولداپ، جانكۇيەرلەر جانىنان تابىلامىز، — دەدى ول Instagram-دا.

ەسكە سالا كەتسەك، قازاقستان مەن سولتۇستىك يرلانديا قۇرامالارىنىڭ ماتچى استانادا 10 قىركۇيەكتە بولادى.

كەشە ۇلتتىق قۇراما فينليانديا جاساعىمەن كەزدەسىپ، 0:1 ەسەبىمەن جەڭىلگەن ەدى. وسى ويىنعا ەلىمىزدىڭ باس كومانداسى قارسىلاسىنان ۇتىلسا دا ۇلتتىق قۇرامانى قولداۋعا وتە كوپ ادام جينالدى. جانكۇيەرلەر سانى بويىنشا رەكورد جاسالدى.

استاناداعى كەشەگى ويىنعا 30 019 كورەرمەن كەلدى. بۇل — قازاقستان قۇراماسىنىڭ تاريحىنداعى ءوز الاڭىنداعى ماتچقا كەلگەن جانكۇيەرلەر سانى بويىنشا جاڭا رەكورد.

بۇعان دەيىن ستاديونعا قازاقستان مەن بەلارۋس (2:1) ماتچىنا 29 637 ادام جينالعان بولاتىن.

داستان كەنجالين،

استانا

 

View this post on Instagram

 

A post shared by Gennadiy Golovkin | GGG (@gggboxing)