ساۋاپتى تۋرنير جالعاسىن تاپتى

بۇگىن ءبىر جەڭىستى، جەمىستى ءارى ساۋاپتى كۇن بولدى. گرس پەن وتەگەن كەنتىندە ەلگە بەلگىلى جۋرناليست ءالىم اناپيانوۆتىڭ ۇيىمداستىرۋىمەن جانە تىكەلەي قولداۋىمەن شاعىن فۋتبولدان سپورت ارداگەرى احمەد داۆىدوۆتى ەسكە الۋعا ارنالعان ءداستۇرلى جارىس بولىپ ءوتتى.

تۋرنير ارداگەرلەر اراسىندا بولعاندىقتان جاسى 70-كە تاقاعان سپورت ارداگەرلەرى الاڭدا بوي كورسەتىپ، ورنەكتى ويىندارىمەن كوپشىلىكتىڭ كوڭىلىنەن شىعىپ جاتتى. كۇن ۇزاق الاڭدا شۇمەكتەپ تەر توككەن ارداگەرلەرگە مىڭ العىس. ويتكەنى، سالاۋاتتى ءومىر سالتىن ناسيحاتتاپ جۇرگەن وسىنداي فۋتبول دەسە ىشكەن اسىن جەرگە قوياتىن ارداگەر جانداردىڭ جارىسى جاس بۋىنعا ۇلكەن ونەگە. سونىمەن، جارىس قورتىندىسى بويىنشا وتەگەن كەنتىنىڭ كومانداسى باس جۇلدەنى جەڭىپ الدى. قولا جۇلدە ءبىزدىڭ «قالامگەر» كومانداسىنا بۇيىردى.

تۋرنير سوڭىندا ءار نوميناتسيا بويىنشا ۇزدىكتەر ماراپاتتالدى. ۇزدىك شابۋىلشى اتاعى ەلگە بەلگىلى اتاقتى ءانشى-كومپوزيتور كەنەن ازىرباەۆ اتامىزدىڭ نەمەرەسى مۇرات كەنەنوۆكە تابىس ەتىلدى. سونداي-اق، ويىن بويى جانىمدى سالىپ باعىما قاراي ءۇش گول سالىپ ۇلگەرگەن ماعان ءتۋرنيردىڭ ۇزدىك جارتىلاي قورعاۋشىسى ماراپاتى اللا ءناسىپ ەتىپ بەرىلدى. كوماندامىزدا وتە ساۋاتتى ءارى بەلسەندى ونەر كورسەتكەن دارحان جاكەشەۆتە جارىستان قۇر قول قايتپاي قانجىعاسى مايلانىپ كۋبوكتى الىپ كەتتى.

حوش، جارىس سوڭىندا تۋرنير يەسىنىڭ ۇلى ماحو مەن قىزى سارناز داستارحان جايىپ، اكەسىنە قۇران باعىشتاپ، قاتىسۋشىلارعا اس بەردى. قوڭىر كۇزدىڭ جايما-شۋاق جەكسەنبى كۇنىندە وتكەن يگىلىكتى سپورت جارىسى قاتىسۋشلارعا تاماشا كوڭىل كۇي سىيلادى. مىنا ءبىر بەسكۇندىك قامشىنىڭ سابىنداي قىسقا ومىردە، ورتامىزدان وزعان باقيلىق جانداردى وسىنداي ساۋابى زور سپورتتىق شارالارمەن ەسكە الىپ وتىرۋدان باسقا نە قالادى دەپ ايتامىز. «ءولى رازى بولماي ءتىرى بايىمايدى»، دەمەكشى، ءبىر جاعىنان مارقۇمنىڭ ارۋاعىن ريزا ەتىپ ەكىنشى جاعىنان فۋتبول قۇمار سپورت ارداگەرلەرى مەن دوس-جارانداردىڭ باسىن قوساتىن وسىنداي يگىلىگى زور ساۋاپتى شارانىڭ عۇمىرى ۇزاق بولسا دەيمىز. «سپورت — دەنساۋلىق كەپىلى» ەمەس پە،  ەندەشە، اياق-قولىمىز اماندا جۇگىرىپ، قوزعالىستا بولايىق!

اقىن ورداباي ۇلى،

الماتى