بۇل قازاق جۇگىرمەيتىن بولعان با؟!

قانداي ءىرى جارىسقا بارسام دا ونىڭ 100 مەترلىك باسەكەسىنە باس سۇقپاي كەتكەن ەمەسپىن.  وزىم كورگەن وليمپيادالارىمدا تاپ سولاي.  ازيا ويىندارىندا تاپ سولاي.  بىراق، …ناتيجە دە تاپ سولاي.  حانچجوۋداعى 100 مەترلىك جارىستىڭ فينالىندا كىم جۇگىرمەدى…  ۆەتنام قىزى دا، تايلاند قىزى دا، يندونەزيا قىزى دا، باحرەين قىزى دا، يران قىزى دا جۇگىردى  تەك قازاق قىزى عانا جۇگىرگەن جوق.  تىپتى، قازاقستاندىق جەڭىل اتلەت شىقپادى.  ارينە، قىتاي قىزى جارىستى.  باس جۇلدەنى دە سول الدى.

جىگىتتەردىڭ 100 مەترلىك فينالىندا ونسىز دا تۇسكەن ۇنجىرعام ودان ارى تومەندەدى.  جارىس جولىنا باحرەيننىڭ بالاسى دا، تاي ەلىنىڭ قوس بالاسى دا، يندونەزيانىڭ بالاسى دا، يراننىڭ بالاسى دا، مالايزيانىڭ بالاسى دا، ارينە، قىتايدىڭ قوس بالاسى دا شىقتى.  قىتاي ۇلانى وزدى.  ناتيجەسى وتە ءتاۋىر — 9،94 سەكۋند! ەكىنشى بولىپ بويى ءبىر قارىس تاي ەلىنىڭ بالاسى كەلدى.  ۇشىنشى بوپ (ايتسا سەنبەيسىز!) مالاي ەلىنىڭ جۇيرىگى كەلدى.  بىزدىڭ ەلدىڭ جەلاياعى وزىپ كەلمەك تۇگىل قاتىسقان دا جوق!  تورتىنشى بوپ يران بوزبالاسى كەلدى، بەسىنشى — باحرەيندىك جۇيرىك، التىنشى — يندونەزيا سپورتشىسى كومبە سىزىعىن قيدى.

قازاقستاندا جەڭىل اتلەتيكانىڭ ەڭ قىسقا قاشىقتىعىنا جۇگىرۋدەن تاماشا ءداستۇر بار ەدى عوي.  سوناۋ XX-عاسىردىڭ 60-جىلى ريمدە وتكەن وليمپيادالىق ويىنداردا داڭقتى جەرلەسىمىز  عۇسمان قوسانوۆ بىلدەي كەڭەس وداعىنىڭ قۇراما كومانداسى ساپىندا 4ح100 مەترگە ەستافەتالىق جۇگىرۋدە ەكىنشى كەلىپ، كەۋدەسىنە بۇكىل قازاقستان حالقى بويىنشا تۇڭعىش بوپ كۇمىس جۇلدە تاقپاپ پا ەدى!  ودان كەيىن دە عۇسمان قوسانوۆ پەن ءامين تۇياقوۆتار كەڭەس وداعىن بىلاي قويىپ سول كەزدە قاتارىندا بولعان ەۋروپاڭا اڭىز بولىپ، سول قۇرىلىقتىڭ تالاي رەكوردىن جاڭارتپاپ پا ەدى؟!  عۇسمان، ءامين اعالاردىڭ جەلاياقتىق ونەردەگى داڭقى بەكەر كەتكەن جوق بولاتىن.  ەلىمىزدە كەيىننەن ۆ. مۋراۆەۆ باستاعان بىرنەشە اتلەت وليمپيادالاردا اتوي سالدى دا.  بىراق، وكىنىشكە قاراي، ەكى اعاسىن تىرىسىندە قۋانتقان قازاق بالاسى بولماي كەلەدى.  بۇگىندە عۇسمان اعامىز باقيلىق بولعان، ءتىپتى كوزى ءتىرى ءامين اعامىزدىڭ ءوزى 80-نەن اسىپ، 90-دى بەتكە الىپ بارادى.  سودان بەرى اياعىنا تاس بايلاپ جۇگىرەتىن جەلاياق جايلى ەرتەگى شىعارعان قازاق حالقىنان ءبىر جەلاياق تۋماي كەلە جاتىر!  بۇل قازاق سوندا …جۇگىرمەيتىن بولعان با؟!  سول جۇمساق توسەككە جانتايعانى جانتايعان با؟  عۇسمان، ءامين اعالارىمىزدىڭ سپورتتاعى ۇلى جولىن جالعار ءبىر ۇلدىڭ تۋماعانى ما سوندا؟!  الدە تۋعان ۇلداردى تاۋىپ، تاڭداپ الا الماي جاتىرمىز با؟!

وليمپيادا ويىندارى بولسا بايقاپ سويلەر ەدىك.  ال، مىنا ازيا ويىندارى سەكىلدى سىندا جارىس جولىنا ءبىر قازاقستاندىق جەلاياقتىڭ شىقپاۋى باۋىردان ۇرىپ، نوكاۋتقا تۇسىرگەندەي بولادى ەكەن. باحرەين، يران، يندونەزيا، تايلاند، مالايزيا جۇيرىكتەرى شاپقان توپقا ىلەسە الماعان سوڭ ءبىزدىڭ ەلدىڭ جەڭىل اتلەتيكاسىنان نە ءۇمىت، نە قايىر؟!  عۇسمان، ءامين اعالار الەمدىك رەكوردتاردى پارشالاي بۇزىپ جاتقان جىلدارى بۇل ەلدەر جەڭىل اتلەتيكاداعى جارىس جولى دەگەندى بىلمەۋشى ەدى عوي.  ولار العا، ءبىز ارتقا كەتىپ بارامىز با سوندا؟

جەڭىل اتلەتيكا ازيا ويىندارىنداعى ەڭ كوپ مەدال ۇلەستىرتىن سپورت ءتۇرى.  بۇل جولى ءبىز حانچجوۋعا 18-اق سپورتشى اكەلدىك.  بۇل شىنىن ايتساق — از! توبىمىزدا 524 سپورتشى بولسا، مەدالدى كوپ بەرەتىن سپورتتى باستى نازاردا ۇستاۋ كەرەك ەدى.  كەشە وسى دەلەگاتسيامىزدى حانچجوۋعا شىعارىپ سالۋعا كەلىپ، سپورتشىلارعا باتا بەرگەن ءامين تۇياقوۆ اعامىز ىشتەي ءوز ونەرىنىڭ جالعاسىن تاپپاعانىنا قينالمادى دەيمىسىز؟

بۇل اعامىزعا ەمەس، ەلگە،ەلدىڭ سپورتىن باستاعان ەرلەرىنە سىن.  سول اعالارىمىز كۇن سايىن ەل ەسىنەن شىعىپ تا بارا جاتىر.  كەشەگىدەي جەرگە كەلمەسە، ءامين تۇياقوۆ اعامىزدىڭ ورتامىزدا ءتىرى جۇرگەنىن دە بىلمەيتىندەر كوپ.  ولاردىڭ ەسىمدەرىن التىن تاقتاعا قاشاپ جازىپ قويسا دا ارتىق ەمەس ەدى!  ايتپايىن-اق دەيسىڭ: سول شىعىس قازاقستان وبلىسىنىڭ قۇرامىندا ۇزاق تۇرعان سەمەيدىڭ تۇلەگى عۇسمان قوسانوۆتىڭ اتىندا سپورت سارايى جوق، بۇگىنگى چەمپيونداردىڭ اتتارى ساراي ماڭدايلارىنا قاشاپ جازىلىپ قويىلعان… ءامين تۇياقوۆ اعامىزدىڭ اتىندا سپورت سارايى تۇرسا نەسى ارتىق؟!  بۇل جاس ۇرپاقتى پاتريوتيزمگە تاربيەلەۋگە ۇلەسىن قوساتىن عانا جاعداي ەمەس پە؟!.

…ە، مىنا ازيا ويىندارىندا كەزىندە قوس اعامىز جەلگە دە جەتكىزبەگەن قاشىقتىقتاردا بىردە-ءبىر قازاقستاندىق، ونىڭ ۇستىنە، قازاق بالاسى، شىقپاعان سوڭ كۇيىپ جاتقانىم عوي!  بۇل قازاق جۇگىرمەيتىن،جۇگىرەتىن بالا تاپپايتىن بولعان با؟! سۇراستىرىڭىزدارشى!!!   ايتىڭىزدارشى!!!   ۇگىتتەڭىزدەرشى!!!   جالىنىڭىزدارشى!!!

تۇرسىن جۇمساق توسەك — ديۆاننان!  جۇگىرسىن!  جۇگىرەتىن بالا تاپسىن، تاپتىرسىن!

نەسىپ جۇنىسباي ۇلى، — حانچجوۋدان