بۇل ماتچتا ءۇش ۇپاي ءۇشىن جان الىسىپ، جان بەرىسەمىز – ماگومەد اديەۆ

بۇگىن استانا ۋاقىتىمەن ساعات 22.00-دە فۋتبولدان قازاقستان ۇلتتىق قۇراماسى كەلەسى جىلى وتەتىن ەۋروپا چەمپيوناتىنىڭ ىرىكتەۋ ءتۋرنيرى اياسىندا فينليانديا كومانداسىمەن وينايدى. ماتچ حەلسينكي قالاسىندا بولادى.

كەشە ۇلتتىق قۇرامانىڭ باس جاتتىقتىرۋشىسى ماگومەد اديەۆ فينلياندياعا ويىندى اقپاراتتىق جاعىنان قولداۋ ماقساتىندا بارعان باق وكىلدەرىنە سۇحبات بەرىپ، ماتچ تۋرالى پىكىر ءبىلدىردى.

– ماگومەد مۇسا ۇلى، ەلىمىزدىڭ باس كومانداسىنىڭ دانيا قۇراماسىنان جەڭىلگەننەن كەيىن فۋنكتسيونالدىق جانە ەموتسيونالدىق جاعدايى قالاي؟

– ارينە، جەڭىلىس نامىسىمىزعا ءتيدى. جىگىتتەرمەن سويلەسىپ، وتكەن ويىندى ۇمىتىپ، فيندەرگە قارسى دايىندالۋ كەرەكتىگىن ايتتىم. ەندى قۇرامادا پسيحولوگيالىق جاعىنان ەشقانداي پروبلەما بولماۋى كەرەك.

–ويىنعا قورعانىس جوسپارىن دايىنداپ جاتىرسىز با؟  فينليانديانى تاڭعالدىرۋعا تىرىساسىز با؟

– تولىقتاي قورعانىستا وتىرا بەرمەيمىز. بۇل ماتچتا ماڭىزدى ءۇش ۇپايدىڭ تاعدىرى شەشىلەدى.  كوماندانىڭ قۇرامىندا وزگەرىستەر بولادى. بۇل جوسپارلانعان روتاتسيا. كۇشىمىزدى تەڭ بولۋگە تىرىسامىز.

– فينليانديامەن ويىنعا الەكساندر زۋەۆ الاڭعا شىعا ما؟

– ونى كورە جاتارمىز. ول الماتىدا ءوزىن جايسىز سەزىندى.  دانيامەن ويىن الدىندا ونىڭ الاڭعا شىعۋى تۋرالى ويلاعان جوقپىن. ەندى فينليانديامەن ماتچقا الاڭعا شىعارۋى مۇمكىن.  بارلىعىن جاتتىعۋدان كەيىن شەشەمىز.

– باعدات قايىروۆتىڭ دانيامەن ماتچتاعى ويىنىن قالاي باعالايسىز؟

– ول جاقسى وينادى. قورعانىستا جاقسى وينادى. ونىڭ ءبىر جاقسى قاسيەتى – ءوز ايىپ الاڭىنىڭ الدىندا جاقسى وينايدى. ول ءوزىنىڭ تىكەلەي مىندەتىن اتقارىپ، شابۋىلعا دا كومەكتەستى. ناتيجەلى پاس بەرىپ، گول سوعا دا جازادى.

– يان ۆوروگوۆسكي استاناعا كوشكەننەن كەيىن سىنعا ۇشىرادى. بەلگياداعى ويىندارىمەن سالىستىرعاندا ناشار ويناي ءجۇر دەگەن پىكىرلەر بار. ءسىز مۇنىمەن كەلىسەسىز بە؟

– يان شىنىمەن دە بابىن ازداپ جوعالتىپ الدى. ول «استانامەن» وقۋ-جاتتىعۋ جيىنىنا قاتىسپادى. ونىڭ كومانداسى بەلگيادا دەمالىستا بولدى. جاڭا كلۋبىنا دايىندىقسىز كەلگەن. قازىر ونىڭ دايىندىعى الدەقايدا جاقساردى.

قازاقستان ۇلتتىق قۇراماسىنىڭ باس جاتتىقتىرۋشىسى ماگومەد اديەۆ فينليانديامەن ماتچتىڭ وڭاي بولمايتىنىن، دەگەنمەن كوماندانىڭ ءۇش ۇپاي الۋعا بارىن سالاتىنىن ايتتى. قازىر قارسىلاستاردا 12 ۇپايدان بار. فينليانديا دوپ ايىرماشىلىعىنىڭ ارقاسىندا تۋرنير كەستەسىندە ءۇشىنشى ورىندا تۇرسا، ەلىمىزدىڭ باس كومانداسى ودان ءبىر ساتى تومەن ورنالاسىپ وتىر. ال توپ باسىندا 16 ۇپاي جيناعان دانيا مەن ونىڭ وكشەسىن باسىپ كەلە جاتقان سلوۆەنيا كەلەدى. بۇل ەلدىڭ ۇلتتىق قۇراماسىندا دا 16 ۇپاي بار. ال سولتۇستىك يرلانديا مەن سان-مارينو كوماندالارى بەسىنشى جانە التىنشى ورىندا.

قازىر ەۋروپا چەمپيوناتىنا جولداما العان كوماندالار دا بەلگىلى بولىپ وتىر. ولار – يسپانيا، شوتلانديا (ا توبى)، فرانتسيا (ۆ توبى)، تۇركيا (D توبى) پورتۋگاليا (J توبى)،  بەلگيا، اۆستريا (F توبى) مەن گەرمانيا. سوڭعىسى ەۋروپا چەمپيوناتىن وتكىزەتىن ەل رەتىندە جارىسقا قاتىسادى. وسى رەتتە ايتا كەتەتىن نارسە، قازاقستان قۇراماسى ن توبىندا ءتورتىنشى ورىن السا دا ەۋرو-2024 دوداسىنا قاتىسۋعا مۇمكىندىگى بولادى. ويتكەنى، ۇلتتىق قۇراما ۇلتتار ليگاسىندا ءوز توبىندا ءبىرىنشى ورىن الىپ، ەۋروپا چەمپيوناتىنا جولداما بەرەتىن ماچتا ويناۋعا مۇمكىندىك الدى. بۇل ماتچ كەلەسى جىلى ناۋرىز ايىندا گرۋزيا، ليۋكسەمبۋرگ، كوسوۆو نەمەسە باسقا دا كوماندامەن بولۋى مۇمكىن.

داستان كەنجالين،

استانا

فوتو: قازاقستان فۋتبول فەدەراتسياسى، نيكيتا باسوۆ