ءىV ازيا پارا ويىندارى: قازاقستان سپورتشىلارى 14 جارىسقا قاتىسادى (ۆيدەو)

22-28 قازان ارالىعىندا قىتايدىڭ حانچجوۋ قالاسىندا ءىV ازيا پارا ويىندارى بولادى. وسى جارىسقا ەلىمىزدەن 131 سپورتشى قاتىسىپ، سپورتتىڭ 14 تۇرىنەن كۇش سىناسادى. ولار 485 مەدال ءۇشىن جارىسادى. قازاقستان سپورتشىلارى جارىستىڭ پارا تاەكۆوندو، پارا ۆەلوسپورت، پارا كانوە، پارا ەسكەك ەسۋ جانە بوچچا تۇرىنەن ازيا پارا ويىندارىندا العاش رەت ونەر كورسەتەدى.

ويىنداردىڭ اشىلۋى مەن جابىلۋى سالتاناتىندا ەلىمىزدىڭ تۋىن ۇستاۋشىلار ۆولەيبولدان ازيا چەمپيوناتىنىڭ كۇمىس جۇلدەگەرى پاراسپورتشىمىز جانعالي سۇيەۋوۆ جانە پارا ۇستەل تەننيسىنەن حالىقارالىق جارىستاردىڭ چەمپيونى التىناي ەرجانقىزى.

بۇل تۋرالى تۋريزم جانە سپورت ۆيتسە-ءمينيسترى سارسەن قۇرانبەك ايتتى. ونىڭ ايتۋىنشا، سپورتشىلار جارىسقا جاقسى دايىندىقپەن بارا جاتىر.

وسى كۇنگە دەيىن 44 وقۋ-جاتتىعۋ جيىنى وتكىزىلدى. قازىرگى تاڭدا تىكەلەي وسى ويىندارعا قاتىستى 10 وقۋ-جاتتىعۋ جيىن بولىپ جاتىر. سپورتشىلارىمىز 47 ستارتقا قاتىستى. جالپى كوماندامىز جاقسى دايىندىقپەن بارا جاتىر دەپ ايتا الامىز. ءبىز 6 التىن جۇلدە الىپ، وتكەن ازيانىڭ پارا ويىندارىنا قاراعاندا كورسەتكىشىمىزدى جاقسارتىپ، 12-ورىنعا شىعامىز دەپ سپورتشىلارعا ۇلكەن ءۇمىت ارتىپ وتىرمىز، – دەدى ول.

پاراليمپياداشىلاردىڭ كيىمىنە كەلسەك، ۆيتسە-مينيستر «قازسپو-N» جشس-نىڭ كيىم تىگىپ بەرگەنىن، سپورتشىلاردىڭ فورماسى وسى كاسىپورىننان ساتىپ الىنعانىن ايتتى.

ءبىز مەملەكەتتىك ساتىپ الۋلاردا قازاقستان رەسپۋبليكاسىنىڭ زاڭناماسىن ۇستانامىز جانە سوعان سايكەس ۇلتتىق كوماندالار ءبىرىنشى كەزەكتە وتاندىق كيىم-كەشەكپەن باسقا دا زاتتارمەن قامتاماسىز ەتىلەدى. زاڭناماعا سايكەس ءبىز قازاقستاندىق وندىرۋشىلەردىڭ كيىم-كەشەگىن، سپورتتىق فورمالارىن ساتىپ الۋىمىز كەرەك. بۇل جاعداي قازاقستاننىڭ جەڭىل ونەركاسىبىنە قولداۋ كورسەتۋ ماقساتىندا قاراستىرىلعان. سونىمەن قاتار، قر زاڭناماسىنا سايكەس ۇلتتىق كوماندالارعا ارنالعان كيىم-كەشەك ءبىر كوزدەن بالامالى تاسىلمەن ساتىپ الىنادى. پاراليمپيادالىق ۇلتتىق كوماندالارعا ارناپ ءدال وسى ادىسپەن وندىرۋشىلەردەن سپورتتىق فورمالار ساتىپ الىندى. ولار كوپ ەمەس، ناقتى ايتاتىن بولساق، بۇل ZIBROO برەندىمەن «قازسپو-N» جشس»، – دەدى سارسەن قۇرانبەك.

پاراازيادادا جالپى سانى سپورتتىڭ 22 تۇرىنەن 564 جۇلدە جيىنتىعى ويناتىلاتىن بولادى. اتلەتتەر پارا دزيۋدو، پارا پاۋەرليفتينگ، پارا ءجۇزۋ، پارا جەڭىل اتلەتيكا، پارا تاەكۆوندو، پارا وق اتۋ، پارا ساداق اتۋ، وتىرىپ ويناۋ ۆولەيبولى، پارا ۇستەل تەننيسى، پارا ۆەلوسپورت، پارا اكادەميالىق ەسۋ، شاحمات، بوچچا، كانوە سىندى جارىستارعا قاتىسادى.

ەسكە سالا كەتەيىك، سپورتشىلار مەن جاتتىقتىرۋشىلاردى ءبىر جولعى قارجىلاي قولداۋ ازيا ويىندارىنىڭ جۇلدەگەرلەرىمەن بىردەي مولشەردە بولادى. وسىلايشا، ازيا پارا ويىندارىنىڭ چەمپيونى اتانعان سپورتشى 10 000 اقش دوللارى كولەمىندە اقشالاي سىياقى الادى. ال التىن مەدال يەگەرىن جارىسقا دايىنداعان جاتتىقتىرۋشى – 5 000 اقش دوللارى. پاراازيادانىڭ كۇمىس جۇلدەگەرى 5 000 اقش دوللارى، ال ونىڭ جاتتىقتىرۋشىسى 3 000 اقش دوللارىن الادى. سونداي-اق قولا مەدال جەڭىپ العان ۇلتتىق قۇرامانىڭ سپورتشىسى ءۇشىن 3000 اقش دوللارى كولەمىندە اقشالاي ىنتالاندىرۋ جانە ونىڭ جاتتىقتىرۋشىسى ءۇشىن 2 000 اقش دوللارى كولەمىندەگى سىيلىق قاراستىرىلعان.

2018 جىلى يندونەزيانىڭ جاكارتا قالاسىندا وتكەن ازيا پارا ويىندارىنا ەلىمىزدەن 9 سپورتشى قاتىسقان بولاتىن. جالپى سانى 5 التىن، 15 كۇمىس، 13 قولا مەدال جەڭىپ الىپ، جالپىكوماندالىق ەسەپتە قازاقستان 13-ورىننان كورىندى.

داستان كەنجالين،

استانا

فوتو: تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى

 

View this post on Instagram

 

A post shared by سپورت كوميتەتى (@committee_sport)