IV ازيا پارا ويىندارى: قازاقستان ەكى كۇندە قورجىنعا جۇلدەنى تولتىردى (ۆيدەو)

قىتايدىڭ حانچجوۋ قالاسىندا ءوتىپ جاتقان IV ازيا پارا ويىندارىندا قازاقستان سپورتشىلارى كۇمىس جانە قولا مەدالدەر يەلەندى.

اۋەلى  پارا دزيۋدوشى زارينا رايفوۆا  70 كەلى (J2) سالماقتا كۇمىس جۇلدەگەر اتاندى. ول فينالدا قىتاي ۆان حۋيۋنعا ەسە جىبەردى. ودان كەيىن سپورتتىڭ وسى تۇرىنەن 90 كەلىگە دەيىنگى سالماقتا ونەر كورسەتكەن جانبوتا امانجول (J2) كۇمىس مەدال يەگەرى اتاندى.

جانبوتا التىن جۇلدە ءۇشىن كۇرەستە  وڭتۇستىك كورەيا سپورتشىسى لي دجۋنگتەن جەڭىلىپ قالدى.

پارا تاەكۆوندودان دا ەلىمىز ءبىر كۇمىس جۇلدە الدى. بۇل مەدالگە 80 كگ سالماق دارەجەسىندە (ك44) نىشان ءومىرالى يە بولدى. ول فينالدا يراننان كەلگەن سپورتشىعا ەسە جىبەردى.

اۋىر اتلەتيكا جارىسىندا دا قازاقستان سپورتشىلارىنا التىن جۇلدە بۇيىرماي قالدى. بۇل سىندا 73 كگ سالماقتا ونەر كورسەتكەن راۋشان قويشىباەۆا  119 كگ زىلتەمىردى كوتەرىپ، كۇمىس مەدالدى قاناعات تۇتتى.

پارا دزيۋدودا ەرلان وتەپوۆ پارا دزيۋدودان كۇمىس مەدال الدى. 90+ كگ سالماقتا ونەر كورسەتكەن سپورتشى فينالدا موڭعوليادان كەلگەن سپورتشى گانبات داشتسەراندان ايلاسىن اسىرا المادى.

سەنبى جانە جەكسەنبىدە قازاقستان قورجىنىنا قولا جۇلدە كوپتەپ ءتۇستى. الدىمەن ۆەلوسپورتتان  ەرلەر قۇراماسى ساپىنداعى  كەنجەعۇل سەيتجان مەن انتون لاۆرەنتەۆ مارەگە 25 مينۋت 19:49 سەكۋندتا ءۇشىنشى بولىپ كەلىپ، ەلىمىزگە كەزەكتى جۇلدەنى سىيلاسا، ودان كەيىن سۋعا جۇزۋدەن ءنۇرالى سوۆەتقانوۆ جۇلدەگەر اتاندى.

ول 100 مەتر قاشىقتىقتى (براسس) 1 مينۋت 11:72 سەكۋندتتا ءجۇزىپ ءوتتى.

پارا تاەكۆوندودان ءماريام سالىمگەرەەۆا، نۇرلان دومباەۆ پەن الىشەر گاريپوللاەۆ دا ەلگە ءبىر جۇلدەمەن قايتاتىن بولدى. ءماريام 65 كگ سالماقتا ءۇشىنشى ورىن الىپ، قۇرمەت تۇعىرىنا كوتەرىلدى. نۇرلان ءۇشىنشى ورىن ءۇشىن بولعان جەكپە-جەكتە قىتاي سپورتشىسى 8:6 ەسەبىمەن جەڭدى. جەكپە-جەك 80 كگ (ك44) دەيىنگى سالماق دارەجەسىندەگى تاەكوندوشىلار اراسىندا بولدى. ال الىشەر J2  ساناتى بويىنشا 90 كەلىگە دەيىنگى سالماق دارەجەسىندە وزبەكستاننىڭ وكىلىنەن باسىم ءتۇستى.

وسى كۇندەرى پارادزيۋدوشىلار دا ەرلەدى. عالىمجان سماعۇل ۇلى 80+ كگ سالماق دارەجەسىندە جاپون چاكير يتونى 34:11 ەسەبىمەن جەڭدى.

ەرلان قونكيەۆ 90 كەلىدەن اسا سالماقتا ءۇشىنشى ورىن ءۇشىن بولعان جەكپە-جەكتە قىتاي پەن ءليدى 10:0 ەسەبىمەن جەڭسە، تالعات اجعاليەۆ تە (J2 ساناتى) وسى سالماق دارەجەسىندە يندونەزيالىق سپورتشىدان ايلاسىن اسىرىپ كەتتى.

پارا جۇزۋدە 4ح50 مەترگە ارالاس كەشەندى ەستافەتادا قازاقستان سپورتشىلارى مارەگە ءۇشىنشى بولىپ كەلدى. بۇل جارىستا ءبىرىنشى ورىندى قىتاي، ەكىنشى ورىندى جاپونيا كومانداسى يەلەندى.

قازاقستان قۇرامىندا زۋلفيا گابەدۋللينا، سيازبەك داليەۆ، ناتاليا زۆياگينتسەۆا مەن ايسۇلتان قۇلقاەۆ سىنعا ءتۇستى.

داستان كەنجالين،

استانا

فوتو: تۋريزم جانە سپورت مينيسترلىگى