رىباكينا ءۇشىن بار جاعدايدى جاساپ جاتىرمىز — تەننيس فەدەراتسياسى

قازاقستان تەننيس فەدەراتسياسىنىڭ ۆيتسە-پرەزيدەنتى دياس دوسقاراەۆ بيللي دجين كينگ كۋبوگىنىڭ فينالدىق كەزەڭىنە قاتىسقان ەل قۇراماسىنىڭ ويىنىن قورىتىندىلادى.

ول تەننيس فەدەراتسياسىنىڭ اتىنان قازاقستاننىڭ ايەلدەر  قۇراماسىنىڭ يسپانيانىڭ سەۆيليا قالاسىندا ءوتىپ جاتقان الەم چەمپيوناتىنداعى ساتسىزدىگىن ءتۇسىندىردى. فەدەراتسيانىڭ ۆيتسە- پرەزيدەنتى قازاقستان تەننيس قۇراماسىنىڭ «بيللي دجين كينگ كۋبوگىنىڭ» فينالدىق كەزەڭىنە جاقسى ويىنشىلارمەن بارعانىن ايتتى.  ونىڭ ايتۋىنشا، شىن مانىندە بيللي دجين كينگ كۋبوگىنىڭ فينالدىق كەزەڭىنە الەمنىڭ ۇزدىك تەننيسشىلەرى قاتىسادى.

فەدەراتسيانىڭ وكىلى قازاقستان قۇراماسىنا ساتتىلىك جەتىسپەگەنىن جاسىرمادى. ول الدىمەن جاراقاتىنا بايلانىستى ەلەنا رىباكينانىڭ ويناي الماعانىن تىلگە تيەك ەتتى. سونداي-اق قازاقستان تەننيس فەدەراتسياسىنىڭ ۆيتسە-پرەزيدەنتى رىباكينانىڭ دەنساۋلىعى جاقسى، ءوزى بابىندا بولعاندا، الەمنىڭ كەز كەلگەن تەننيسشىسىن جەڭە الاتىنىن ەسكەرتتى.

ەلەنا رىباكينانىڭ رولان گارروس تۋرنيرىنەن باستاپ جاراقاتپەن الىسقانىن كوردىك. سونىڭ كەسىرىنەن ۋيمبلدون چەمپيونى اتاعىن قورعاي المادى. اقش-تاعى جارىستار ويداعىداي ناتيجە بەرمەدى. سوعان قاراماستان، ءبىز ونىڭ دايىندىعى ءۇشىن بارلىق مۇمكىن جاعدايدى جاسادىق. وكىنىشكە قاراي، كورتتىڭ ساپاسى ناشار بولعاندىقتان، مەكسيكانىڭ كانكۋن قالاسىندا وتكەن WTA قورىتىندى تۋرنيرىندە ارقاسىنان جاراقات الدى. لەنا سەۆيلياعا ۇلكەن ۇمىتپەن باردى. دايىندالدى. بىراق ول ويىنعا 100 پايىز دايىن بولۋ كەرەك ەدى. الەمدىك رەيتينگتە قانشا جوعارى تۇرساڭ دا، تولىق دايىن بولماساڭ، ويناي المايسىڭ. كوماندالار قۇرامىنا قاراساق، يگا شۆەنتەك، دجەسسيكا پەگۋلا، كوري گاۋفف، كارولينا مۋحوۆا سياقتى ماڭدايالدى تەننيسشىلەر بارعان جوق. ال رىباكينا بىزبەن بىرگە بولىپ قانا قويماي، قوسالقى قۇرامدا كورتقا شىققان تەننيسشىلەرىمىزدى قولداپ وتىردى، — دەدى دياس دوسقاراەۆ.

ونىڭ ايتۋىنشا، ەلەنا رىباكينا قاشاندا ەل قۇراماسى ءۇشىن ويناۋدى باستى مىندەت دەپ ەسەپتەيدى. بۇعان بىلتىر گەرمانيامەن ماتچتا ەكى ماڭىزدى ۇپايدى كومانداسىنا الىپ بەرگەنى دالەل. سونىڭ ارقاسىندا قازاقستان الەم چەمپيوناتىنىڭ فينالدىق كەزەڭىنە جولداما الدى. بيىل دا پولشامەن كەزدەسۋدە ءدال سولاي بولدى.

ەكىنشى جاعىنان، باسقا تەننيسشىلەردىڭ كورتقا شىعۋىنا مۇمكىندىك بەرىلدى. يۋليا پۋتينتسەۆا ءبىرىنشى راكەتكا بولسا، اننا دانيلينا جەكەلەي سىندا ونەر كورسەتتى. ارينە، رىباكينا جەتىسپەدى.

ساتتىلىك تە قارسىلاستار جاعىندا بولدى. توپتاعى ءۇش كوماندانىڭ ۇپايلارى بىردەي بولىپ، تەك قوسىمشا كورسەتكىشتەردى ەسەپتەگەندە، جارتىلاي فينالعا شىعۋ ءۇشىن قازاقستان قۇراماسىنا نەبارى ەكى سەت جەتپەي قالدى. ءسويتىپ، توپتا سلوۆەنيا جەڭىمپاز اتانسا، قازاقستان ەكىنشى، الەمنىڭ جەتى دۇركىن چەمپيونى، وتكەن جىلعى فيناليست — اۆستراليا ءۇشىنشى ورىندا قالدى. بۇل باسەكەلەستىكتىڭ مىقتى ەكەندىگىن كورسەتەدى. وتكەن جىلى گلازگودا دا سەت ايىرماشىلىعىنان قازاقستان جارتىلاي فينالدان تىس قالعان ەدى، — دەدى دياس دوسقاراەۆ.

جالپى، بيىلعى الەم چەمپيوناتى قازاقستان قۇراماسى ءۇشىن تاعى ءبىر ساباق الاتىنداي جارىس بولدى. سوڭعى ەكى-ءۇش جىلدا الەمدىك رەيتينگىدە جوعارى كوتەرىلىپ كەلە جاتقان جىبەك قۇلامباەۆا العاش رەت جەڭىسكە جەتتى. قازىر جىبەك جۇپتىق سىندا الەمدىك رەيتينگىدە 149-ورىندا. سلوۆەنيامەن ماتچتا اننا دانيلينامەن بىرگە ويناعان قۇلامباەۆا ءوزىن جاقسى قىرىنان كورسەتتى.

جىبەك پەن اننا — ءبىزدىڭ بولاشاعىمىز. جىبەكتىڭ Team Kazakhstan اكادەمياسىنىڭ تۇلەگى ەكەندىگى قۋانتادى. وسى اكادەميادان تۇلەپ ۇشقان ارۋجان ساعىندىقوۆا دا قۇرامادا بولدى. بۇل ونىڭ ءوز شەبەرلىگىن ودان ءارى جەتىلدىرە تۇسۋىنە سەرپىن بەرەدى.