فۋتبولشى اسحات تاعىبەرگەن «پۋشكاش» سىيلىعىنا ۇسىنىلدى (ۆيدەو)

فۋتبولدان قازاقستان ۇلتتىق قۇراما كومانداسى مەن شىمكەنتتىڭ «ورداباسى» كلۋبىنىڭ كاپيتانى، جارتىلاي قورعاۋشىسى اسحات تاعىبەرگەن حالىقارالىق فۋتبول فەدەراتسياسى (فيفا) تاعايىنداعان «پۋشكاش» سىيلىعىنا ۇسىنىلدى. بۇل پريز ەڭ ادەمى گولدىڭ اۆتورىنا بەرىلەدى.

«پۋشكاش» سىيلىعىنا اسحات تاعىبەرگەنمەن بىرگە تاعى 10 ادام ۇسىنىلىپ وتىر. ولاردىڭ اراسىندا «تسينتسينناتي» كلۋبىنىڭ ويىنشىسى ارگەنتينالىق الۆارو باررەل، ءمادريدتىڭ «رەال» ايەلدەر كومانداسى مەن كولۋمبيا قۇراماسىنىڭ شابۋىلشىسى ليندا كايسەدو، انگليانىڭ «برايتون ەند حوۋۆ البيون» جاساعىنىڭ فورۆاردى حۋليو سەسار ەنسيسو (پاراگۆاي)، وڭتۇستىك كورەيانىڭ قورعاۋشىسى كان سون چجين، لوندوننىڭ «چەلسي» ايەلدەر كلۋبى مەن اۆستراليا قۇراماسىنىڭ شابۋىلشىسى سەم كەرر، ۋرۋگۆايدىڭ «پەنيارول» جاساعى مەن وسى ەلدىڭ باس كومانداسىنىڭ جارتىلاي قورعاۋشىسى برايان لوسانو، سان-پاۋلۋدىڭ «بوتافاگو» كومانداسى مەن برازيليانىڭ قورعاۋشىسى گيلەرمە ميراندا مادرۋگا گومەس، يسپانيانىڭ «راسينگ دە سانتاندەر» مەن وسى مەملەكەتتىڭ ۇلتتىق قۇراماسىنىڭ حاۆبەگى يۆان مورانتە، ليسسابوننىڭ «سپورتينگ» كلۋبى مەن پورتۋگاليانىڭ قورعاۋشىسى نۋنۋ سانتۋش، برازيليانىڭ ايەلدەر قۇراماسىنىڭ شابۋىلشىسى بەاتريس زانەراتتو جواو بار.

اسحات تاعىبەرگەن ۇلتتىق قۇراما ساپىندا 50 رەت الاڭعا شىعىپ، ەكى رەت قاقپانى ءدال كوزدەگەن. ال كلۋب ساپىندا ول 2008 جىلدان 2023 جىلعا دەيىن قىزىلوردانىڭ «قايسار»، اقتوبەنىڭ «اقتوبە»، قوستانايدىڭ «توبىل» كوماندالارىندا ويناعان. بيىلدان باستاپ تاعىبەرگەن شىمكەنتتىڭ «ورداباسى» كلۋبىنىڭ مۇشەسى. وسى ۋاقىت ارالىعىندا جارتىلاي قورعاۋشى قارسىلاستار قاقپاسىنا 46 گول سالعان.

داستان كەنجالين،

استانا

 

View this post on Instagram

 

A post shared by @askhat_tagybergen8