ماگومەد اديەۆ ۇلتتىق قۇرامانىڭ باس جاتتىقتىرۋشىسى قىزمەتىندە قالادى — قفف

قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ ۇلتتىق قۇراما كوماندانىڭ باس جاتتىقتىرۋشىسى ماگومەد اديەۆتىڭ قىزمەتىندە قالاتىنىن ايتتى، دەپ حابارلادى Bassport.kz.

ماگومەد اديەۆ ۇلتتىق قۇرامانىڭ باس جاتتىقتىرۋشىسى بولىپ قالادى. قازىر ءبىز فۋتبولدى دامىتۋ ءۇشىن ۇلكەن جوسپار قۇرىپ، جۇيەلى جۇمىس ىستەپ جاتىرمىز. ستراتەگيامىز بار. جوبا كوپ، — دەدى ول.

سونىمەن بىرگە اديەۆ قازاقستان پرەمەر-ليگاسىنداعى ءبىر كلۋبتىڭ جاتتىقتىرۋشىسى قىزمەتىن قوسا اتقارۋى مۇمكىن.

ماگومەد اديەۆ قازاقستان قۇراماسىن 27 ساۋىردەن باستاپ جاتتىقتىرىپ كەلەدى. ونىڭ جەتەكشىلىگىمەن ۇلتتىق قۇراما ۇلتتار ليگاسىنداعى س توبىندا ازەربايجان، سلوۆاكيا مەن بەلارۋس كوماندالارىنان وزىپ، ءبىرىنشى ورىنعا شىقتى.  وز توبىنىڭ جەڭىمپازى بولدى. ال ەۋروپا چەمپيوناتىنىڭ ىرىكتەۋ تۋرنيرىندە ن توبىندا 18 ۇپايمەن ءۇشىنشى ورىنعا يە بولدى. بۇل توپتا ەلىمىزدىڭ ابس كومانداسى 10 ويىننىڭ التاۋىن جەڭدى. بۇعان دەيىن ۇلتتىق قۇرامادا مۇنداي ناتيجە بولعان ەمەس.

ەندى ۇلتتىق قۇراماعا ەۋرو-2024 دوداسىنا جولداما الۋعا تاعى ءبىر مۇمكىندىك بەرىلەدى. كەلەسى جىلى ناۋرىز ايىندا قازاقستان كومانداسى «تورتتىك تۋرنيرىندە» سىرت الاڭدا گرەكيا جاساعىمەن وينايدى.

ەكىنشى جارتىلاي فينالدا گرۋزيا مەن ليۋكسەمبۋرگ كەزدەسەدى. وسى ماتچتاردا جەڭگەن كوماندالار ءبىر-بىرىمەن فينالدا كەزدەسىپ، ويىندى جەڭگەن قۇراما ەۋروپا چەمپيوناتىنا جولداما الادى. ەگەر قازاقستان قۇراماسى گرەكيا كومانداسىن جەڭسە، وندا ءوز الاڭىندا گرۋزيا-ليۋكسەمبۋرگ ماتچىندا جەڭگەن جاساقپەن كەزدەسەدى. بۇل مۇمكىندىك ەلىمىزدىڭ باس كومانداسىنا 2022/2023 جىلدارداعى ماۋسىمدا ۇلتتار ليگاسىنداعى س توبىندا ءبىرىنشى ورىن العانى ءۇشىن بەرىلىپ وتىر.