تۋريزم جانە سپورت مينيسترلىگى قوعامدىق كەڭەسىنىڭ ءبىرىنشى وتىرىسى ءوتتى

استانادا تۋريزم جانە سپورت ءمينيسترى ەرمەك مارجىقپاەۆتىڭ قاتىسۋىمەن  قوعامدىق كەڭەستىڭ العاشقى وتىرىسى ءوتتى.

جيىندا تۋريزم جانە سپورت ماسەلەلەرى جونىندەگى قوعامدىق كەڭەسىن قالىپتاستىرۋ، توراعاسىن سايلاۋ، حاتشىنى تاعايىنداۋ، ەرەجەنى بەكىتۋ، تورالقانى سايلاۋ سياقتى ماسەلەلەر قارالدى، دەپ حابارلادى ۆەدومستۆو.

كەڭەس قۇرامىنا سالالىق ۇيىمداردىڭ باسشىلارى، پارلامەنت سەناتىنىڭ دەپۋتاتتارى، سپورت ارداگەرلەرى، وليمپيادا جانە الەم چەمپيوندارى، تۋريستىك قاۋىمداستىق وكىلدەرى كىردى. اشىق داۋىس بەرۋ ارقىلى قوعامدىق كەڭەستىڭ توراعالىعىنا پارلامەنت سەناتىنىڭ دەپۋتاتى  بەكبولات ورىنبەكوۆ سايلاندى.

قوعامدىق كەڭەستىڭ جاڭا قۇرامى بەلگىلى بولعان سوڭ ەرمەك مارجىقپاەۆ ءسوز الىپ، اتالعان كەڭەستىڭ ماڭىزدىلىعىنا توقتالدى.

وزدەرىڭىزگە بەلگىلى، مەملەكەت باسشىسى قاسىم-جومارت كەمەل ۇلى توقاەۆ ءوز سوزىندە «قوعامدىق كەڭەستەر حالىق پەن بيلىكتىڭ اراسىنداعى دانەكەرگە اينالۋعا ءتيىس» دەپ ايرىقشا اتاپ وتكەن ەدى. تۋريزم جانە سپورت مينيسترلىگىنىڭ قايتا ۇيىمداستىرىلۋىنا بايلانىستى قوعامدىق كەڭەستىڭ جاڭا قۇرامىن بەكىتۋ بويىنشا جۇمىستار باستالعان بولاتىن. جۇمىس توبىنىڭ ۇيلەسىمدى قىزمەتىنىڭ ارقاسىندا قوعامدىق كەڭەستىڭ ساپالى قۇرامى جاساقتالدى. ول زاڭنامانىڭ بارلىق تالاپتارىنا جانە ۋاكىلەتتى ورگاننىڭ ۇسىنىمدارىنا تولىق سايكەس كەلەدى. ازاماتتىق قوعامنىڭ قوعامداعى ماڭىزدى ماسەلەلەرگە پىكىر ءبىلدىرۋى – قوعامدىق كەڭەس قىزمەتىنىڭ نەگىزگى ماقساتى. الداعى باسقوسۋلار ءبارىمىزدى ورتاق ماقساتقا جۇمىلدىرىپ، ەلىمىزدىڭ سپورتى مەن ءتۋريزمىن دامىتۋعا باعىتتالعان شەشىمدەر قابىلداۋعا سۇبەلى ۇلەس قوساتىنىنا سەنىمدىمىن!، — دەدى مينيستر.

سونىمەن قاتار جيىندا قوعامدىق كەڭەستىڭ حاتشىسى بولىپ تۋريزم جانە سپورت مينيسترلىگى ستراتەگيالىق جوسپارلاۋ جانە جوبالىق باسقارۋ دەپارتامەنتىنىڭ ديرەكتورى بولىپ جاڭىل مۇحتاروۆا سايلاندى. سونداي-اق قوعامدىق كەڭەس كوميسسيالارىنىڭ جۇمىسىن ۇيلەستىرۋ، كەڭەستىڭ قىزمەتىن ۇيىمداستىرۋ جانە اقپاراتتىق قولداۋدى قامتاماسىز ەتۋ جانە كەڭەس ۇسىنىمدارىنىڭ ورىندالۋ بارىسىنا مونيتورينگ جۇرگىزەتىن تۋريزم، سپورت جانە ويىن بيزنەسى بويىنشا دا كوميسسيانىڭ تورالقاسى سايلاندى.