Týrızm jáne sport mınıstrligi qoǵamdyq keńesiniń birinshi otyrysy ótti

Astanada týrızm jáne sport mınıstri Ermek Marjyqpaevtyń qatysýymen  qoǵamdyq keńestiń alǵashqy otyrysy ótti.

Jıynda týrızm jáne sport máseleleri jónindegi qoǵamdyq keńesin qalyptastyrý, tóraǵasyn saılaý, hatshyny taǵaıyndaý, erejeni bekitý, tóralqany saılaý sııaqty máseleler qaraldy, dep habarlady vedomstvo.

Keńes quramyna salalyq uıymdardyń basshylary, Parlament Senatynyń depýtattary, sport ardagerleri, Olımpıada jáne álem chempıondary, týrıstik qaýymdastyq ókilderi kirdi. Ashyq daýys berý arqyly Qoǵamdyq keńestiń tóraǵalyǵyna Parlament Senatynyń depýtaty  Bekbolat Orynbekov saılandy.

Qoǵamdyq keńestiń jańa quramy belgili bolǵan soń Ermek Marjyqpaev sóz alyp, atalǵan keńestiń mańyzdylyǵyna toqtaldy.

О́zderińizge belgili, memleket basshysy Qasym-Jomart Kemeluly Toqaev óz sózinde «qoǵamdyq keńester halyq pen bıliktiń arasyndaǵy dánekerge aınalýǵa tıis» dep aıryqsha atap ótken edi. Týrızm jáne sport mınıstrliginiń qaıta uıymdastyrylýyna baılanysty qoǵamdyq keńestiń jańa quramyn bekitý boıynsha jumystar bastalǵan bolatyn. Jumys tobynyń úılesimdi qyzmetiniń arqasynda Qoǵamdyq keńestiń sapaly quramy jasaqtaldy. Ol zańnamanyń barlyq talaptaryna jáne ýákiletti organnyń usynymdaryna tolyq sáıkes keledi. Azamattyq qoǵamnyń qoǵamdaǵy mańyzdy máselelerge pikir bildirýi – Qoǵamdyq keńes qyzmetiniń negizgi maqsaty. Aldaǵy basqosýlar bárimizdi ortaq maqsatqa jumyldyryp, elimizdiń sporty men týrızmin damytýǵa baǵyttalǵan sheshimder qabyldaýǵa súbeli úles qosatynyna senimdimin!, — dedi mınıstr.

Sonymen qatar jıynda Qoǵamdyq keńestiń hatshysy bolyp Týrızm jáne sport mınıstrligi Strategııalyq josparlaý jáne jobalyq basqarý departamentiniń dırektory bolyp Jańyl Muhtarova saılandy. Sondaı-aq qoǵamdyq keńes komıssııalarynyń jumysyn úılestirý, keńestiń qyzmetin uıymdastyrý jáne aqparattyq qoldaýdy qamtamasyz etý jáne keńes usynymdarynyń oryndalý barysyna monıtorıng júrgizetin týrızm, sport jáne oıyn bıznesi boıynsha da komıssııanyń tóralqasy saılandy.