تاۋەلسىزدىك كۇنى الدىنداعى تارتىستى تۋرنير (فوتو)

تاۋەلسىزدىك كۇنى الدىندا ەلىمىزدىڭ ءار ايماعىندا ءتۇرلى شارالار ۇيىمداسىتىرىلىپ جاتاتىن ءبىر ءداستۇر بار.

بۇگىن پق «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ ۇيىتقى بولۋىمەن الماتى شاھارىنداعى اۋەزوۆ اۋدانىنداعى 173 مەكتەپ-گينازيادا ءدۇبىرلى ءبىر الامان سپورتتىق جارىستار بولىپ ءوتتى.

ايتۋلى سپارتاكيادا باعدارلاماسىندا شاعىن فۋتبول، دارتس، شاحمات جانە ارقان تارتۋ سپورت سۇرلەرىنەن وسى قوعامداعى جەلتوقساننىڭ باتىرلارى باقتارىن سىناپ جەڭىس ءۇشىن ايانبادى.

نەگىزى سپورتتى دەنساۋلىقتىڭ كەپىلى دەيمىز عوي، جاستارىنىڭ الدى جەتپىستى ارتى الپىستى القىمداعان كەشەگى تاۋەلسىزدىكتىك قاhارماندارى وسىنداي جارىستاردى ساعىنا كۇتەدى. ويتكەنى، وسىنداي سپورتتى ءىس-شارالاردا باستارى قوسىلىپ، ءبىر شۇيىركەلىسىپ، ارقا جارقا بولىپ قالادى. سونىمەن قاتار، جارىس الاڭدارىندا بويدا، ويدا قالعان سپورتتارىنان سىن الاڭىندا بارىنشا كورسەتىپ ۇلكەن ءبىر ءلاززات الارى ءسوزسىز. «سىرلى اياقتىڭ سىرى كەتسە دە سىنى كەتپەگەن»، دەمەكشى، سپورت الاڭدارىندا جەلتوقسان باتىرلارىنىڭ ويىندارىن كورگەن جانكۇيەرلەر ريزا بولىپ دەمەۋ بەرىپ، قولداۋ جاساپ جاتىر.

حوش، سونىمەن سپارتاكيادانىڭ اشىلۋى سالتاناتى دا دابىرالى، دۋماندى بولدى. مەكتەپ وقۋشىلارى باتىر اتا-اپالارىنىڭ كەلۋىنە وراي تاماشا ءبىر كونتسەرتتىك باعدالارلاما دايىنداعان ەكەن. جاس تالانتتار ورتاعا شىعىپ، بار ونەرلەرىن سالىپ جەلتوقسان باتىرلارىنىڭ قوشەمەتىنە بولەندى.

سالتاناتتى اشىلۋ ءراسىمى اياقتالعان سوڭ جارىس تۇرلەرىنەن سپارتاكيادا باستالىپ كەتتى. كۇنى بويى سپورت الاڭدارىندا تەر توككەن باتىرلار كۇن ەڭكەيە بارىپ جەڭىمپازدار مەن جۇلدەگەرلەردى انىقتاپ، زور قوشەمەتپەن ماراپات ءراسىمى بولىپ ءوتتى.

وسىنداي جەلتوقسان باتىرلارىنا ارنالعان ءدۇبىرلى الامان سپارتاكيادانىڭ جوعارى ۇيىمداستىرىلعانىنا «جەلتوقسان اقيقاتى» رەسپۋليكالىق قوعامدىق بىرلەستىگىنىڭ توراعاسى بولات توقتاباي ۇلى قۇرىمباەۆ جوعارى باعا بەرىپ، بارشا جەلتوقسان قاhارماندارىنا زور دەنساۋلىق، ۇزاق عۇمىر تىلەپ ايىرىقشا ريزاشىلعىن ءبىلدىردى. جەلتوقسان باتىرلارىنا ارنالعان ءدۇبىرلى دودا وسىلايشا مارەسىنە جەتىپ، ارتىنان اۋەزوۆ اۋدانىنىڭ ۇيىمداستىرۋىمەن داستارحان جايىلىپ اس بەرىلدى.

نەگىزى وسىنداي جوعارى دەڭگەيدە جارىستى وتكىزىپ، جەلتوقسان باتىرلارىنا زور كوڭىل-كۇي تارتۋ ەتكەن اۋەزوۆ اۋداندانىڭ ۇيىمداستىرۋ القاسىنىڭ بەلسەندىلەرى الما مەن باتىرعا قالىڭ جۇرت ۇلكەن راحمەتتەرىن جاۋدىرىپ جاتتى. ءومىر-قوزعالىستان تۇراتىن بولسا، ارامىزدا سوناۋ جەلتوقساننىڭ ىزعارلى تۇنىندە تاۋەلسىزدىگىمىز ءۇشىن جان بەرىپ جان الىسقان باتىرلارعا قۇرمەت قوشەمەت كۇشەيە تۇسسە دەگەن تىلەك بار. بار بولىڭدار نار بولىڭدار تاۋەلسىزدىكتى جەڭىپ اپەرگەن جەلتوقساننىڭ باتىرلارى!.

اقىن ورداباي ۇلى،

الماتى