Qazaqstan álem chempıonatynda tarıhı júldeni jeńip aldy

О́tken aptada Qazaqsttan sportshylary álem chempıonattaryna, birneshe halyqaralyq týrnırler men jarystarǵa qatysyp, júldeli oryndy ıelendi, dep habarlady Týrızm jáne sport mınısstrligi.

Frıstaıl-akrobatıka: Fınlıandııanyń Rýka qalasynda uıymdastyrylǵan frıstaıl-akrobatıkadan Álem kýbogynyń alǵashqy kezeńinde Janbota Aldabergenova qola júlde jeńip aldy.

Otandasymyz fınalda 77.43 upaı jınap, úzdikter qatarynan kórindi. Bir qyzyǵy, Janbota Rýkada ótken Álem kýbogynyń byltyrǵy kezeńinde de úshinshi orynnan kóringen edi. Ol kezde Aldabergenovaǵa 80,04 upaı jetkilikti bolǵan.

Mánerlep syrǵanaý: Horvatııa astanasy Zagrebte ótken mánerlep syrǵanaýdan ISU Challenger sanatyndaǵy Golden Spin týrnırinde Mıhaıl Shaıdorov kúmis júldeger atandy. Otandasymyz qos baǵdarlama qorytyndysy boıynsha 235,29 upaı jınap, jarysta ekinshi orynǵa taban tiredi. Altyn medaldi álem chempıonatynyń júldegeri qytaılyq zın Boıan ıelendi – 258,67. Úzdik úshtikti estonııalyq Aleksandr Selevko túıindedi – 224,24 upaı.

Aıta ketelik, Mıhaıl Shaıdorov osydan eki apta buryn Qytaıdaǵy Gran-prı týrnırinde qola medal jeńip alǵan bolatyn.

Praktıkalyq myltyq atý: Natalıa Mestoeva praktıkalyq myltyq atýdan álem chempıonatynda tarıhı júldeni jeńip aldy. Taılandta ótken týrnırde jerlesimiz bir altyn, bir qola medal oljalady. Sonymen qatar quramynda Natalıa Mestoeva, Lılııa Ývarova, Krıstına Asyqbaeva, Dana Qabasheva bar Qazaqstan áıelder komandasy komandalyq esepte ekinshi orynǵa ıe boldy. Kishi Sergeı Lıtvınov jekeleı synda tórtinshi orynǵa taban tiredi.

Sporttyq bı: Astanada uıymdastyrylǵan 10 túrli bıden jastar arasyndaǵy álem chempıonatynda Qazaqstan namysyn qorǵaǵan Neıdas Lenkıtıs pen Tamara Belenkaıa juby top jardy. Kúmis medaldi Adrıa Ernandes pen Emılıja Ýlsıneıttiń (Ispanııa), al qola medaldi Vladımır Chebaný men Sofııa Choreskýdiń (Moldova) ıelendi. Buǵan deıin el tarıhynda birinshi márte 2022 jyly Latvııa memleketinde uıymdastyrylǵan álem chempıonatynda Maksım Jılenkov pen Arına Molochnıkova chempıon atanǵan.

Tennıs: Grıgorıı Lomakın Mysyrdyń Sharm-el-Sheıh qalasynda ótken ITF týrnıriniń juptyq synynda top jardy. Jarystyń ekinshi raketkasy G.Lomakın men ýkraınalyq Vadım Ýrsý fınalda ıtalııalyqtar Fılıberto Fýmagallı – Semıýel Vınsent-Rýgıerıden 6:2, 4:6, 10:5 esebimen basym tústi.

Sonymen qatar taǵy bir otandasymyz, álemniń 504-raketkasy Dmıtrıı Popko Antalııadaǵy (Túrkııa) ITF týrnıriniń chempıony atandy. Ol fınalda dúnıejúzilik reıtıngte 728-orynda turǵan ózbekstandyq Sergeı Fomındi 6:4, 3:6, 6:2 esebimen jeńdi.

Kásipqoı boks: Janqosh Turarov (28-0, 20 KO) Almatydaǵy boks keshinde kezekti aıqasyn japonııalyq Akıhıro Kondomen (37-12-2, 21 KO) ótkizip, qarsylasyn upaı sanymen san soqtyrdy – 118:110, 120:108, 118:110. Osy jarqyn jeńisiniń arqasynda Turarov orta salmaqtaǵy IBO beldigin ózinde saqtap, WBA Gold vakantty beldigin ıelendi.